Најмалку 11 лица загинаа во стампедо пред стадион за крикет во индискиот град Бенгалуру денес, додека навивачите ја славеа првата победа на „Ројал Челинџерс Бенгалуру“ во индиската Премиер лига, соопштија властите.

Најмалку 11 лица загинаа, а 47 се повредени во инцидентот, изјави главниот министер на државата Карнатака Сидарамаја, за новинарите. Илјадници луѓе, некои мавтајќи со црвеното знаме на домашниот тим, ги исполнија улиците околу стадионот Чинасвами додека тимот пристигнуваше со автобус, објавија телевизиските канали, а некои навивачи се качуваа по дрвјата и ѕидот на стадионот за подобар поглед.

Додека прославата продолжуваше, некои луѓе надвор без пропусници се обидоа насилно да се пробијат низ портите, а имаше и дополнителни проблеми при влегувањето во стадионот, соопшти полицијата. Сликите од местото на настанот покажуваат како луѓето се качуваат преку други.

Индија е позната по вакви несреќи, но досега тие се случиле претежно на религиозни настани. Најмалку 30 лица загинаа на хиндуистичкиот фестивал Маха Кумб во јануари, додека десетици милиони се собраа да се искапат во светите води.

Бенгалуру ја славеше својата победа над Пенџаб Кингс во финалниот натпревар од турнирот Т20 во 18-тото издание на IPL, најбогатата крикет лига во светот.