Свет
(Видео) Нови информации и снимки од обидот за атентат на Трамп

Пристигнуваат нови информации за обидот за атентат на Доналд Трамп.
Се појави и ново видео на кое се гледа дека Томас Метју Крукс, 20-годишниот кој пукаше кон поранешниот американски претседател, слободно се шета околу местото каде што Трамп го одржа својот говор.
На видеото се гледа како Крукс непречено шета околу зградата еден час пред почетокот на собирот. Инспекторите утврдиле дека Крукс, всушност, бил на митингот неколку часа пред да пука кон Трамп.
New video shows Donald Trump’s would-be assassin lurking around the rally security perimeter one hour before he opened fire. (Video: WTAE) pic.twitter.com/fhCyN54Im4
— Mike Sington (@MikeSington) July 17, 2024
Се претпоставува дека го извидувал местото на кое се одржувал собирот и го планирал нападот. Муницијата што ја користел во пукањето ја купил само неколку часа пред самиот чин, а купил и скала, која на крајот не му требала бидејќи се качил на покривот на зградата преку клима-уредот.
До местото од кое пукал тој со себе носел мерач за далечина, што ја користат ловците и стрелците за да го измерат растојанието од својата позиција до целта, во неговиот случај до поранешниот претседател на САД.
Си-ен-ен пишува дека со мерачот на далечина поминал низ магнетометрите и така го привлекол вниманието на Тајната служба. Нејзините агенти го следеле сѐ додека не ја напуштил областа што ја набљудувале.
Инспекторите не се сигурни каде отишол кога го напуштил просторот за проверка, но се верува дека застанал покрај својот автомобил за да земе пушка.
Тој се вратил 40 минути пред да ги испука првите истрели, а нешто по 18 часот, зазел позиција на покривот од кој пукал.
Исто така, Си-ен-ен, повикувајќи се на полициски извори, пишува дека 20-годишникот во последните месеци примил неколку пакети означени како опасен материјал на домашна адреса.
До неговото тело на покривот на зградата, каде што беше застрелан од контраснајперски тим, е пронајден понов модел на телефон и сив предавател со 12 копчиња за кој се верува дека бил поврзан со две бомби на далечински управувач во автомобилот на Крукс.
Се претпоставува дека со експлозијата сакал да го одвлече вниманието при пукањето. Во автомобилот била пронајдена дополнителна муниција, дури стотина парчиња. А при претресот на домот во кој живеел пронајдени се панцир, бомба на далечинско управување и 3Д-печатач.
Од новите детали за овој случај се дозна дека неговите родители го барале неколку часа пред обидот за атентат, а потоа поради загриженост, повикале полиција и го пријавиле исчезнувањето.
Повикот во полиција од неговите родители бил упатен неколку часа пред Крукс да пука кон Трамп. Сѐ уште не е познат мотивот, а кој ФБИ се обидува да го расветли, пишува „Фокс њуз“.
Крукс требало да работи тој ден, но му рекол на својот шеф дека му треба слободен ден за да заврши некоја работа. Таткото на Крукс ѝ рекол на полицијата дека е убеден оти неговиот син отишол на стрелиштето со пушка. Мислел дека ќе се врати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Американски турист вознемирувал домородци во Индискиот Океан, приведен е

Дваесет и четиригодишен американски турист е уапсен откако се обидел да воспостави контакт со изолирано домородно племе на Северен Сентинел, ограничена област во Индискиот Океан.
Хуманитарната организација „Срвајвал интернешнал“ предупредува дека овие акции на влијателите на социјалните мрежи претставуваат нова и растечка закана за непознатите племиња.
Михаило Викторович Полјаков, наводно, дошол на брегот на островот, оставил лименка Кока-Кола и кокос, ја снимил посетата со камера и на крајот се обидел да го привлече вниманието на припадниците на племето со свирежи, пренесе АФП, повикувајќи се на локалната полиција.
Северен Сентинел е дел од Андаманските и Никобарските Острови, кои припаѓаат на Индија. Поради заштита на племињата кои живеат таму, строго е забрането да се приближува на островот на помалку од 5 километри. Сентинелезите се едно од последните познати племиња кои живеат целосно изолирани, без контакт со современиот свет.
Наводно, Пољаков двапати претходно се обидел да стигне до островот. Минатиот октомври тој бил запрен од хотелот додека се обидувал да пристапи до островот со кајак. Оваа недела тој конечно е фатен и изведен пред локалниот суд, кој му одреди тридневен притвор за вознемирување на племето.
Според снимките од неговата „ГоПро“ камера, Полјаков свиркал од брегот околу еден час за да го привлече вниманието на припадниците на племето, а потоа влегол на островот околу пет минути. За тоа време оставил подароци, земал примероци од островот и снимил видео.
Портпаролот на „Срвајвал Интернешнал“, Џонатан Мазовер изјави за Би-Би-Си дека таквите обиди не само што ги загрозуваат животите на љубопитните луѓе, туку и животите на членовите на племето.
„Сентинелите со години јасно покажуваат дека не сакаат контакт со надворешниот свет. Нивниот имунолошки систем не е подготвен за болести кои ненамерно би можеле да им ги пренесеме. Една настинка може да биде фатална за нив“, вели Мазовер.
„Срваајвал интернешнал“ предупредува дека социјалните медиуми уште повеќе ја влошуваат ситуацијата бидејќи се повеќе инфлуенсери се обидуваат да добијат „ексклузивна“ содржина за прегледи и лајкови.
„Покрај веќе познатите закани како што се уништувањето на шумите и рудниците во Амазон, сега имаме се повеќе влијателни лица кои сакаат да прават вакви работи поради популарноста. Тоа станува еден вид опсесија на социјалните мрежи“, вели Мазовер.
Според достапните податоци, Сентинелезите се ловци-собирачи, живеат во мали заедници и се во одлична физичка кондиција. Тие се сметаат за најизолираните домородни луѓе во светот, а се проценува дека ги има околу 200, иако точната бројка не е позната.
Ова не е прв пат некој да се обиде да воспостави контакт со Сентинеленците. Во ноември 2018 година, американскиот мисионер Џон Ален Чау беше застрелан и убиен веднаш штом пристигна на островот. Тогашните истраги покажале дека тој им платил на локалните рибари за илегално да го превезат таму.
Американската амбасада соопшти дека е запознаена со инцидентот и ја следи ситуацијата. Индија има национална програма за заштита на племенските заедници, но во последниве години беше критикувана за слабо спроведување на заштитните мерки и принудното раселување на домородните групи.
Свет
Кина воведува дополнителни ограничувања за американските фирми

Кина најави нови ограничувања за американските компании со дополнително појаснување дека овој пат не се работи само за контрамерки против царината, туку и за безбедносни причини и за прашањето на Тајван.
Кинеските власти објавија дека 16 американски субјекти се додадени на листата за контрола на извозот објаснувајќи дека нивното однесување може да ги загрози националната безбедност и интересите на Кина. Ова значи забрана за извоз на стоки, софтвер и технологија со двојна употреба – оние што може да се користат и за цивилни и за воени цели – на овие субјекти.
Пекинг исто така додаде 11 странски компании на таканаречената листа на несигурни субјекти, што им овозможува на властите да воведат казнени мерки против нив. Министерството за трговија наведува дека овие компании учествувале во т.н. воена и техничка соработка со Тајван.
Дополнително, на шест американски компании им беа одземени дозволите за извоз наводно поради загриженост за безбедноста на храната.
Претходно, Пекинг најави и дека ќе воведе дополнителни 34 отсто царини за американските стоки.
Свет
Шефот на полската дипломатија: Трамп е посветен на НАТО

Американскиот претседател Доналд Трамп останува посветен на членот 5 од НАТО за колективна одбрана и ќе присуствува на самитот на НАТО во јуни во Хаг, изјави денеска на новинарите во Брисел полскиот министер за надворешни работи, Радослав Сикорски.
Безбедносната политика на Трамп во Европа предизвика сомнеж, а многумина се прашуваат дали САД ќе им помогнат во случај на напад, со што се доведува во прашање посветеноста на Вашингтон на принципот на колективна одбрана.
Сепак, на состанокот на министрите за надворешни работи на НАТО во Брисел, американскиот државен секретар Марко Рубио во четвртокот им рече на сојузниците дека Вашингтон останува посветен на западната воена алијанса, но дека се очекува тие да потрошат повеќе за одбраната и дека ќе им биде дадено време да го сторат тоа.
На прашањето дали верува дека САД сè уште се подготвени да ги бранат териториите на земјите од НАТО, Сикорски одговори потврдно.
„Да, претседателот Трамп им го потврди тоа на лидерите. Тоа е сепак точно и колку што слушаме, претседателот Трамп ќе присуствува на самитот во Хаг“, рече Сикорски.
Лидерите на земјите од НАТО се состануваат во Хаг од 24 до 26 јуни.