Непозната болест во северозападниот дел на Конго уби повеќе од 50 луѓе, соопштија лекарите на терен и Светската здравствена организација (СЗО).

Интервалот помеѓу појавата на симптомите и смртта во повеќето случаи е 48 часа, што е сериозна загриженост, рече Серж Нгалебато, директор на болницата Бикоро, регионален центар за следење на болести, пренесе АП.

Избувнувањето на болеста во Конго започна на 21 јануари, а пријавени се 419 случаи, вклучувајќи 53 смртни случаи.

Според информациите од африканскиот оддел на СЗО, првиот случај во населбата Болоко започнал откако три деца изеле лилјак и починале 48 часа по појавата на симптомите на треска.

Постои долгогодишен страв од пренос на болести од животните на луѓето во регионите каде дивечот е популарен извор на храна. СЗО соопшти дека бројот на вакви епидемии во Африка е зголемен за повеќе од 60 отсто во последната деценија.

По втората појава на болеста во населбата Бомате на 9 февруари, примероци од 13 случаи беа испратени на тестирање во Националниот институт за биомедицински истражувања во Киншаса.

Сите примероци беа негативни за ебола и други вообичаени хеморагични трески како Марбург.

Некои примероци биле позитивни на маларија. Минатата година, беше регистрирана мистериозна болест слична на грип, која уби десетици луѓе во друг дел на Конго, која најверојатно била маларија, јави Танјуг.

Шефот на американското Министерство за владина ефикасност (DOGE), Илон Маск, одговори на петицијата со илјадници потписи од Канаѓани кои бараа да му се одземе канадското државјанство, објавувајќи на X дека Канада не е „вистинска земја“.

Претходно, повеќе од 160.000 Канаѓани потпишаа онлајн петиција со која бараат на Маск, кој е канадски државјанин од 1989 година, да му се одземе државјанството поради наводно мешање во канадските избори и дејствување против интересите на земјата. Петиција за одземање на канадското државјанство на Маск, поради неговите блиски врски со американскиот претседател Доналд Трамп, кој постојано јавно ја изразуваше својата желба Канада да стане дел од Соединетите Американски Држави, во Долниот дом беше покрената од Квалија Рид од Британска Колумбија.

Петициите, како оние што се започнати за одземање на државјанството на Маск, бараат 500 или повеќе потписи, да бидат одобрени за презентација во Долниот дом на Канада и потенцијално да добијат официјален одговор од владата.

Маск, кој е роден во Јужноафриканската Република и е на чело на американски компании, вклучувајќи ги Тесла, Спејс Икс и Платформа Х, има канадско државјанство преку неговата мајка Маја Маск и го предводи Одделот за владина ефикасност во администрацијата на Трамп.

Петицијата за одземање на државјанството на Маск, поднесена на 20 февруари, го обвинува дека тој како сојузник на Трамп, „е вклучен во активности кои се спротивни на националниот интерес на Канада“.

Во петицијата се тврди дека застанувањето на страната на Трамп го прави Маск „член на странска влада која се обидува да го избрише канадскиот суверенитет“ и го повикува канадскиот премиер Џастин Трудо веднаш да му ги одземе канадскиот пасош и државјанството, пренесува Танјуг.

Поранешниот француски лекар Жоел Ле Скварнек, обвинет за силување или сексуално злоставување на 299 луѓе, пред судот изјави дека направил „одвратни работи“ и дека е подготвен да преземе одговорност за нив.

„Направив одвратни работи. Целосно сум свесен дека овие рани ниту можат да зараснат, ниту да се избришат“, ја објавија медиумите изјавата на 74-годишниот Скварнек на првиот ден од судењето, кое започна во понеделникот во францускиот град Ван, во провинцијата Бретања.

За време на четиридневното судење, Скуарнек ќе се соочи со стотици свои жртви.

Доколку биде прогласен за виновен, му се заканува затворска казна до 20 години, покрај 15-годишната казна што веќе ја отслужува откако беше прогласен за виновен во 2020 година за силување на дете.

За време на претресот во домот на Скварнек, откриени се повеќе од 300.000 фотографии, 650 видео фајлови со педофилска содржина, како и дневници во кои тој ги детализирал своите активности, покажуваат судските документи.

Наводно, во една од своите белешки, Скварнек напишал: „Јас сум педофил и секогаш ќе бидам“, пренесува „The Guardian“.

Судењето во Ван ќе ги испита случаите на силување што тој го извршил помеѓу 1989 и 2014 година против 158 момчиња и 141 девојче, кои во просек имале 11 години во времето на силувањето и злоупотребата.