Рускиот претседател Владимир Путин денеска за прв пат се состанa во Париз со украинскиот претседател, Володимир Зеленски, на самитот насочен кон воспоставување мир во источна Украина.

Зеленски и Путин разговараа и со лидерите на Франција и Германија, претседателот Емануел Макрон и канцеларката Ангела Меркел, пренесе Ројтерс.

По серијата одделни билатерални состаноци во Елисејската палата, Путин и Зеленски влегоа во просторијата за состаноци на четворицата лидери, се погледнаа, но не разменија насмевка, додава агенцијата.

Двајцата лидери не се ракуваа пред камерите.

Денешниот самит е првпат четворицата лидери да се сретнат во т.н. Нормандиски формат, од 2016 година.

Веднаш штом пристигна во Париз, Путин се состана со Ангела Меркел, додека Макрон разговараше со Зеленски во неговата резиденција.

Состанокот, со посредство на лидерите на Франција и Германија, има за цел да ги оживее напорите за решавање на петгодишниот конфликт на Киев со проруските сили, кои држат делови од територијата на југоисточна Украина од 2014 година.

Повеќе од 13.000 луѓе ги загубија животите во конфликтот, а илјадници се раселени.

Главни теми на разговорите се детали од Договорот од Минск, мировниот план со 13 точки од 2015 година, кој предвидува враќање на границите со Русија под украинска контрола, одржување избори во сепаратистичките региони и разоружување и евакуација на руските сили во југоисточниот дел на Украина.