Свет
(Видео) Приврзаниците на Трамп ги пробија полициските барикади и влегоа во зградата на Конгресот

Во Конгресот на САД денеска започна седницата на која треба да се потврди Џо Бајден за претседател, последниот чин пред неговата инаугурација на 20 јануари.
Но, илјадници приврзаници на актуелниот американскиот претседател Доналд Трамп, кој денеска пред своите симпатизери изјави дека никогаш нема да го признае поразот, се собраа во Вашингтон и започна жесток протест.
BREAKING: Trump supporters have breached the Capitol building, tearing down 4 layers of security fencing and are attempting to occupy the building — fighting federal police who are overrun
This is the craziest thing I’ve ever seen in my life. Thousands, police can’t stop them pic.twitter.com/VVdTUwV5YN
— ELIJAH SCHAFFER (@ElijahSchaffer) January 6, 2021
Ситуацијата на Капитол Хил ескалираше. Заедничката седница на двата дома на Конгресот беше прекината откако демонстрантите упаднаа во зградата на Конгресот.
Pro-Trump protesters have breached the police lines around the East Front of the Capitol and are now crowded on the steps outside. pic.twitter.com/mjG2AKedCf
— Steven Portnoy (@stevenportnoy) January 6, 2021
На снимки се гледа како демонстрантите ја пробиваат привремената бариера поставена пред денешните настани.
„Фокс њуз“ објави дека се евакуирани двете згради на Конгресот поради извештаи за бомби. Забележани се и неколку сомнителни пакети.
Трамп кој според резултатите е губитник на изборите, денеска им се обрати на демонстрантите во парк во близина на Белата куќа, која Бајден треба да ја преземе за две недели, истакнувајќи дека никогаш нема да го признае поразот.
„Никогаш нема да се предадеме. Никогаш нема да признаеме пораз“, рече Трамп на митингот на неговите приврзаници пред Белата куќа.
„Ние победивме на тие избори и тоа убедливо“, нагласи тој.
Неговиот син Ерик ја загреа толпата, веејќи знамиња.
„Дали има некој што навистина мисли дека Џо Бајден победи на изборите?“, прашуваше Ерик, а демонстрантите извикуваа: „Не!“
Сите држави потврдија дека демократот Бајден е победник на изборите со 306 избирачки гласови, а обидите на Трамп да ја оспори неговата победа пред судовите низ целата земја пропаднаа. Бајден исто така доби седум милиони гласови повеќе, но Трамп одбива да ги признае резултатите од изборите за кои упорно тврди дека се наместени.
По немирите кои избувнаа, вработен во Си-ен-ен се обидел да ја напушти зградата, каде во моментов се одржува седница на Конгресот за да се потврди победата на Џо Бајден на претседателските, но не можел бидејќи полицијата соопштила дека зградата е под„блокада“.
Доналд Трамп се огласи на „Твитер“, но не го осуди хаосот создаден од неговите приврзаници. Тој сепак ги замоли да останат смирени.
„Ве молам, поддржете ја нашата полиција во Капитол и нашите сили за спроведување на законот. Тие се навистина на страната на нашата земја. Останете смирени“, напиша Трамп.
Последните информации се дека потпретседателот на САД, Мајк Пенс, кој претходно одби да го поддржи Трамп во неговите тврдења, е префрлен на тајна локација поради безбедносни прични.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Ватикан повторно нуди да биде домаќин на украинско-руските преговори

Ватикан ја повтори својата понуда да биде домаќин на мировни преговори меѓу Русија и Украина, откако Русија веќе ја отфрли понудата на папата Лав XIV минатиот петок.
Минатиот петок, рускиот министер за надворешни работи Сергеј Лавров ја отфрли идејата Ватикан да биде следната локација за разговорите, велејќи дека е непријатно за самата Света столица да биде домаќин на земји со мнозинство православно население.
„Но, замислете го Ватикан како локација за преговори. Би било малку несоодветно православните земји да користат католичка платформа за да разговараат за отстранување на корените на конфликтот. Не мислам дека би било многу удобно самиот Ватикан да биде домаќин на делегации од две православни земји под овие околности“, рече Лавров.
Државниот секретар на Ватикан, Пјетро Паролин, денес, меѓутоа, ја повтори понудата на новиот папа за одржување состаноци меѓу завојуваните страни на „неутрална и заштитена локација“.
Во исто време, како што објави италијанската агенција АНСА, кардиналот Паролин јасно стави до знаење дека Ватикан не мора нужно да се смета себеси за посредник во преговорите и дека медијацијата „мора да биде побарана од двете страни“.
Паролин додава дека се дискутираат и други локации за преговори, како што е Женева.
„Не е важно каде ќе се одржат преговорите, за кои сите се надеваме дека ќе се одржат. Она што е навистина важно е конечно да започнат овие преговори бидејќи е итно да се запре оваа војна“, рече Паролин.
Сè уште не е одреден датум за продолжување на разговорите, иако се шпекулира за средба во Ватикан кон средината на јуни.
За време на војната, која трае повеќе од три години, Светата столица под водство на папата Франциск постојано се обидуваше да посредува, но без успех.
Свет
Почва од Фукушима ќе заврши во цветна градина пред канцеларијата на премиерот

Јапонија објави дека планира да искористи дел од почвата отстранета од близина на нуклеарната централа Фукушима Даичи во цветните леи пред канцеларијата на премиерот Шигеру Ишиба. Целта е да се покаже дека радиоактивната почва е безбедна за повторна употреба.
Почвата беше отстранета како дел од работата за деконтаминација по нуклеарната катастрофа во 2011 година и оттогаш е во привремено складирање. Дел од почвата оттогаш достигна ниво доволно безбедно за повторна употреба, велат официјалните лица.
Владата соопшти дека планира да ја користи почвата од Фукушима за цветни градини и други цели на земјиште на владини агенции. Планот е базиран на упатства усвоени од Министерството за заштита на животната средина во март и одобрени од Меѓународната агенција за атомска енергија.
Катастрофата во Фукушима резултираше со ослободување на големи количини радиоактивни материјали од електраната, предизвикувајќи загадување во околните области.
За време на работата за деконтаминација, собрани се големи количини почва, дрвја и друг отпад. Просторниот објект, кој се протега помеѓу градовите Футаба и Окума, во близина на нуклеарната централа Фукушима, складира 14 милиони кубни метри почва и други материјали.
Јапонската влада има за цел да пронајде депонии за почвата до 2045 година, а официјалните лица сугерираат дека материјалот со низок ризик би можел да се користи за изградба на патишта и во други проекти за јавни работи низ целата земја.
Министерството за заштита на животната средина објасни дека почвата ќе се користи како основен материјал и ќе биде покриена со горен слој почва доволно дебел за да се одржи зрачењето на занемарливо ниво. Сепак, постои голема загриженост кај јавноста.
Владата веќе беше принудена да го запре планот за употреба на радиоактивна почва во цветните леи во неколку јавни паркови во и околу Токио по протестите.
Свет
Трамп: Путин не сфаќа дека ако не бев јас, многу лоши работи ќе ѝ се случеа на Русија

Американскиот претседател, Доналд Трамп, повторно го критикуваше рускиот претседател, Владимир Путин.
„Она што Владимир Путин не го сфаќа е дека ако не бев јас, многу лоши работи веќе ќе ѝ се случеа на Русија, мислам навистина лоши. Тој си игра со оган“, напиша Трамп на социјалната мрежа Truth Social.
Ставовите на Трамп кон Путин се менуваа од почетокот на неговиот мандат. Иако повремено упатуваше остри критики и размислуваше за санкции, тој зборуваше и за можностите за намалување на трговските бариери и привлекување американски инвестиции во Русија.
Но, во неделата, тој беше невообичаено остар. „Го познавам долго време, отсекогаш сме имале добри односи, но сега тој испраќа ракети врз градови и убива луѓе, а тоа воопшто не ми се допаѓа. Додека разговараме, тој испраќа ракети врз Киев и други градови. Тоа воопшто не ми се допаѓа“, рече Трамп.
„Волстрит џурнал“, повикувајќи се на извори блиски до Трамп, објави дека Трамп размислува за воведување нови санкции врз Русија, бидејќи е сè повеќе фрустриран од континуираните напади на Русија врз Украина и бавниот напредок на мировните преговори.
Според еден извор, санкциите веројатно нема да вклучуваат нови мерки против банките, но се разгледуваат други опции за да се изврши притисок врз рускиот претседател Владимир Путин да се согласи на отстапки, вклучително и 30-дневен прекин на огнот поддржан од Украина, што Русија досега цврсто го отфрла.
Според истите извори, Трамп го губи трпението со мировниот процес и размислува целосно да го напушти доколку последниот обид не успее – ненадеен пресврт за претседател кој водеше кампања со ветување дека ќе ја заврши војната уште на првиот ден на функцијата. Не е јасно што би се случило ако САД се повлечат од преговорите или дали Трамп ќе продолжи да ѝ обезбедува воена помош на Украина.
„Претседателот Трамп е јасен – тој сака договор за мир преку преговори. Исто така, мудро е да ги држи сите опции отворени“, изјави портпаролката на Белата куќа, Каролин Ливит, во изјава за „Волстрит џурнал“.