Aмериканскиот мултимилијардер Илон Маск се осврна на случајот со починатиот милијардер, педофилот Џефри Епштајн во објава на социјалната мрежа „Икс“.

„Воау, не можам да верувам дека Епштајн се самоубил пред да сфати дека сето тоа е измама“, напиша Маск.

Американскиот претседател Доналд Трамп ги налути своите поддржувачи кога соопшти дека нема да објави никакви дополнителни досиеја за Епштајн, богат финансиер и осуден сексуален престапник кој почина под сомнителни околности во затвор во 2019 година.

Маск објави пред неколку недели дека името на Трамп се појавило во тие досиеја. Минатата недела, ФБИ информира дека списокот на клиенти на Епштајн не постои, неколку месеци откако главниот обвинител на Трамп, Пам Бонди, тврдеше дека копија од списокот се наоѓа на нејзината маса.

Со години, Трамп ги уверуваше своите поддржувачи дека ќе го објави познатиот „список на клиенти“ на Епштајн, кој наводно вклучува познати личности и политичари од висок профил.

Дополнително, ФБИ и Министерството за правда го отфрлија тврдењето дека Епштајн бил убиен во затвор, инсистирајќи дека неговата смрт била самоубиство.

Трамп, кој се појавува во најмалку едно видео старо неколку децении на забавата на Епштајн, ги негираше тврдењата дека неговото име е во досиејата. Тој исто така изјави дека немал директен контакт со Епштајн, односно дека не бил пријател со него најмалку 18 години пред неговата смрт.

Руските сили ја презедоа контролата врз три села во три различни делови од фронтовата линија во Украина, објави вчера руското Министерство за одбрана.

Официјалните украински извештаи за активностите по должината на фронтот долг 1.000 километри го оспорија делот од рускиот извештај, особено во врска со клучно село на југоисток.

Според извештајот на руското министерство, трите окупирани населби се Камјанско во југоисточниот регион Запорожје, Дехтјарне во североисточниот регион Харков и Попив Јар во регионот Донецк.

Руските сили полека напредуваат кон запад, главно низ регионот Донецк, а Москва речиси секој ден најавува освојување на нови села, пишува Ројтерс.

Портпаролот на украинската армија, Владислав Волошин, за liga.net изјави дека држењето на населбата Камјанско, југоисточно од главниот град на Запорошката област, е важно за да се заштити тој град од напади.

Сепак, селото беше речиси срамнето со земја за време на долгите периоди на борби, и како што рече Волошин, украинските сили излегоа од селото и успешно ги нападнаа руските сили секогаш кога мали групи повремено се осмелуваа да влезат во него.

Ројтерс, исто така, наведува дека украинската страна не го потврди руското заземање на селото Попив Јар, кое се наоѓа североисточно од Покровск, кое со месеци е во фокусот на руските напади во регионот Донецк.

Во среда, руската армија го објави заземањето на селото Новохацко, југозападно од Покровско. Друг украински воен портпарол, Виктор Трехубов, вчера потврди за јавната телевизија Суспилне дека селото е во руски раце.

Унгарскиот премиер Виктор Орбан предупреди дека непознати лица запалиле црква во украинскиот регион Закарпатија, оставајќи знак на кој пишува „Унгарците на нож“.

„Присилно регрутирање, убиства, палење цркви, поттикнување и заплашување. Сето ова им се случува на Унгарците во Закарпатија. Нема да го дозволиме тоа, можете да сметате на нас“, напиша Орбан на Фејсбук, споделувајќи фотографија на која се гледа спорниот знак.

Закарпатската полиција објави дека инцидентот се случил во среда околу 22 часот во селото Палад-Комаривци. Тие откриле дека неидентификувано лице влегло во црковниот комплекс, ја запалило влезната врата и напишало провокативен натпис на фасадата со намера да поттикне национално и религиозно непријателство.

Полицијата, во соработка со Безбедносната служба на Украина, моментално спроведува истрага за да ги идентификува одговорните.

Унгарија го повика амбасадорот на Украина минатата недела да поднесе протест по медиумските извештаи дека унгарски државјанин починал во Закарпатија, наводно откако бил претепан од воени службеници.

Украинците тврдат дека со форензичко испитување е утврдено дека причината за смртта на човекот е белодробна емболија. Неколку дена подоцна, унгарскиот министер за надворешни работи, Петер Сијарто, предложи Европската унија да воведе санкции против тројца украински функционери во врска со наводно насилната смрт на унгарскиот државјанин.