Европа
(Видео) Русите велат дека ништо не се случило синоќа, Украинците објавија снимка од акцијата

Украинската одбранбена разузнавачка служба потврди дека синоќешната специјална операција во близина на Крим довела до уништување руски десантни бродови од класата „Серна“ со екипаж и оклопни возила, пишува „Украинска правда“. Украинските разузнавачи споделија и видео од операцијата.
„Украинските војници погодија мали десантни бродови на руската Црноморска флота за време на ноќна операција во областа на привремено окупираниот Крим. Тие се бродови од класата ‘Серна’. На бродот се наоѓаа екипажот и оклопните возила, вклучително и ‘БТР-82’“, се вели во соопштението.
Претходно, украинската јавна телевизија „Суспилне“ објави дека два руски брода биле погодени во близина на селото Чорноморск повикувајќи се на свои извори. Разузнавачката служба додаде дека специјалната операција била успешна благодарение на поддршката на владината иницијатива United24, платформа што собира средства за борба против војната.
Претставниците на разузнавањето забележаа дека Русите активно користеле десантни летала од класата „Серна“ за време на окупацијата на Змискиот Остров за да преместат воена опрема и војници. Покрај тоа, тие инсталираа противвоздушни ракетни системи „Тор-М2“ на бродовите за да обезбедат мобилна заштита на нивната група на островот и во украинскиот дел на Црното Море.
Малиот десантен брод од класата „Серна“ може да достигне голема брзина и е способен да превезе до 45 тони товар. Русите ги користат овие чамци за истоварување маринци или за евакуација. Покрај тоа, таквите пловни објекти со противвоздушни системи на палубата служеа како заштита за воените бродови на руската Црноморска флота по серијата напади на украинските безбедносни и одбранбени сили.
Руското Министерство за одбрана тврди дека во текот на ноќта над Крим биле соборени два дрона. Рускиот медиум „База“ објави за напад на складиште за нафта во градот Феодосија на Крим, кој бил одбиен. Феодосија се наоѓа на југоисточниот брег на окупираниот Крим, ка Чорноморск е на западниот брег.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.