Свет
(Видео) Само двајца преживеани и 97 загинати во авионската несреќа во Пакистaн
Пакисанскте власти соопштија дека 97 луѓе загинале во пакистанскиот авион што се урна во градот Карачи на југот на земјата, а пронајдени се само двајца преживеани.
„Сега е потврдено дека загинале 97 луѓе од авионот“, рече Миран Јусуф, портпаролка на прокринското министерство за здравство.
Деведесет и еден патник и осум членови на екипажот се наоѓале во авионот „Ербас А320“, кој во петокот се урна во тесна улица во населено подрачје на Карачи, непосредно пред да слета на меѓународниот аеродром во овој град, потврди денеска портпаролот на пакистанската авиокомпанија. Ова значи и корекција на претходно споменатиот број на луѓе на летот ПК 8303, кога се сметаше дека биле вкупно 107, но офијално потврдена бројка е 99, пренесува АФП.
A Pakistani Airlines flight has crashed into a residential area, just before landing in Karachi#Pakistan pic.twitter.com/kqToUtj5Mo
— CNW (@ConflictsW) May 22, 2020
Според портпаролката, телата на патниците и екипажот биле пренесени во две болници, а досега се идентификувани 19 од нив.
Припадниците на армијата и службите за итни случаи ја минале ноќта користејќи тешки машини и хеликоптери за расчистување на областа, отстранувајќи ги урнатините од куќите и делови од остатоците на авионот.
Пронаоѓањето на двајцата преживеани, кои беа најдени уште на самиот почеток на спасувачката операција, остви надеж дека евентуално може да има и повеќе преживеани. Еден од преживеаните е претседател на Банката Панџаб, една од најголемите пакистански банки, изјави директорот на авиокомпанијата. Производителот на авиони „Ербас“ соопшти дека му дава техничка помош на Пакистан во истрагата за несреќата.
Шефот на „Пакистан интернешнл ерлајнс“ (ПИА), Аршад Малик, за чија компанија летал авионот на линијата ПК 8303, вети дека ќе спроведе транспарентна истрага со „Ербас“ за тоа што може да било причина за несреќата.
Авионот „Ербас“ летал од градот Лахор, на североистокот од земјата, кон Карачи на југ и се урнал во станбена зграда додека се приближувал кон аеродромот.
Пакистан ги продолжи домашните летови на 15 мај по карантинот поради коронавирусот. Меѓународните линии се во застој до крајот на мај.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.