Свет
(Видео) Саудијците го пречекаа Трамп како крал – му купија и мобилен „Мекдоналдс“

Саудиска Арабија подготви раскошен пречек за американскиот претседател Доналд Трамп во Ријад, каде што тој слета денес, буквално на тепих од лаванда.
Во 2021 година, Саудиска Арабија го замени традиционалниот црвен тепих со лаванда, наведувајќи дека бојата е инспирирана од „природното наследство на Саудиска Арабија“, имено сезонските цветања на лаванда во пустинските региони на земјата.
Саудиска Арабија очигледно се погрижи на американскиот претседател ништо да не му недостасува за време на неговата посета на Блискиот Исток, дури ни неговата омилена брза храна.
Според американските медиуми, Саудијците обезбедиле мобилен ресторан на „Мекдоналдс“ во случај Трамп да не стигне до една од многуте постоечки филијали во земјата.
Yes, it’s a mobile @McDonalds here in Riyadh. pic.twitter.com/Y6T2EBDbQf
— Mordechai Wagenheim (@Mike_Wagenheim) May 13, 2025
Трамп е познат по својата склоност кон брза храна, а за време на кампањата дури и им служеше на гостите во „Мекдоналдс“ во Пенсилванија.
Но, разликата во протоколот беше видлива и на друго ниво, политичкото.
За разлика од посетата на поранешниот американски претседател Џо Бајден во 2022 година, кога саудискиот престолонаследник Мохамед бин Салман испрати делегација да го пречека на аеродромот, Трамп денес беше лично пречекан од бин Салман на скалите од претседателскиот авион.
Да потсетиме дека пред да пристигне во Саудиска Арабија, Бајден изјави дека ќе го „изолира кралството“ поради убиството на новинарот Џамал Кашоги и кршењата на човековите права. Трамп, од друга страна, одржува блиски политички и деловни врски со кралското семејство уште од својот прв мандат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лажна медицинска сестра на Флорида лекувала повеќе од 4.000 пациенти

Млада жена е уапсена на Флорида под сомнение дека лажно се претставувала како медицинска сестра и лекувала речиси 4.500 пациенти, објавува Би-Би-Си. Полициската истрага е почната кога болницата го раскинала договорот со Отумн Бардис поради сомневања во нејзините квалификации.
Истражителите откриле дека 29-годишната жена давала медицински услуги на дури 4.486 пациенти помеѓу јуни 2024 и јануари 2025 година. „Ова е еден од највознемирувачките случаи на медицинска измама што некогаш сме ги истражувале“, рече шерифот на округот Флаглер, Рик Стали.
Бардис била вработена во болницата во Палм Коуст од јули 2023 до јануари 2025 година. Таа е обвинета за фалсификување лажни документи и користење број на лиценца што ѝ припаѓал на медицинска сестра со исто име, вработена во друга болница од истата здравствена установа.
Во јануари оваа година на Бардиса ѝ било понудено унапредување, но потоа колега ја пријавил кај властите откога било утврдено дека нејзината лиценца за медицинска сестра е истечена. Нејзиниот договор бил веднаш раскинат, а полицијата почнала седуммесечна кривична истрага.
Детективите добија налог за нејзино апсење по седум точки за практикување медицина без лиценца и седум точки за лажна употреба на лични податоци. Таа беше уапсена во својот дом на 5 август и носеше медицинска униформа во моментот на апсењето.
„Оваа жена потенцијално загрози илјадници животи преправајќи се дека е некој што не е и кршејќи ја довербата на пациентите, нивните семејства и на целата медицинска заедница“, додаде шерифот Стали. Бардис моментно е во притвор со кауција од 70.000 долари.
Свет
Путин: Немам ништо против средбата со Зеленски, но условите сè уште не се создадени

Рускиот претседател Владимир Путин изјави дека нема ништо против средбата со украинскиот претседател Володимир Зеленски, но додаде дека сè уште нема услови за таква средба.
Путин зборуваше и за можна средба со американскиот претседател Доналд Трамп велејќи дека интересот за одржување самит меѓу САД и Русија е заемен и дека Обединетите Арапски Емирати се едно од можните места за таква средба.
На прашањето за условите што Трамп наводно ги поставил за средба со Путин, вклучително и подготвеноста на Путин да разговара со Зеленски рускиот претседател рече:
„Веќе многупати реков дека во принцип немам ништо против, можно е. Но, за ова мора да се создадат одредени услови. За жал, сè уште сме далеку од тоа“.
Во мај оваа година украинскиот претседател јавно го покани Путин на состанок во Истанбул за да разговараат за евентуален крај на војната. Кремљ никогаш не одговори на таа покана, според написите во медиумите.
Денес, Путин ја откри идејата за средба со украинскиот претседател во време на зголемена дипломатска активност, но сè уште без конкретни чекори кон преговори.
Регион
Полицијата на Истра уапси Германец: снимал голи деца со рачен часовник

Истарската полиција приведе германски државјанин (31), кој е обвинет за експлоатација на деца за порнографија откога е откриено дека снима голи деца на плажа со рачен часовник со интегрирана камера.
Граѓаните ја известиле полицијата во вторникот околу 18 часот кога забележале дека мажот снима деца со рачен часовник. Полицијата ги претресла неговите простории, автомобилот и друга техничка опрема и пронашла инкриминирачки снимки. Еден ден подоцна тој бил предаден на притворската единица на Полициската управа на Истра со кривична пријава.
„Полицијата апелира до родителите да ги следат своите деца и да гледаат каде се и што прават на плажа. Облечете ги вашите деца во костими за капење, а доколку забележите сомнително лице што снима деца, веднаш известете ја полицијата на 192“, велат од полицијата додавајќи дека ваквите акции покажуваат дека јавноста е сè повеќе свесна за проблемот со снимањето деца и дека препознавањето на сомнителното однесување овозможува навремен одговор и апсење на сторителот“.
Фото: принтскрин