Свет
(Видео) Сеул постави холограм на полицаец во парк: криминалот се намали за 22 процента

Секоја вечер помеѓу 19 и 22 часот холограм во природна големина на полицаец во паркот „Џудонг“ бр. 3 во Сеул повторува предупредувања за видеонадзор и ветува дека вистинските полицајци ќе реагираат веднаш, објавува Vice.
Оваа иницијатива не е маркетиншки трик, туку проект целосно поддржан од Агенцијата за полиција во Сеул. Холограмот е создаден од технолошката компанија Hologrammica, а резултатите се веќе видливи. Откога дигиталниот полицаец беше распореден во октомври минатата година како дел од иницијативата „Безбеден парк“, бројот на пријавени кривични дела во областа се намали за речиси 22 процента.
Иако холограмот не може да уапси никого, полицијата вели дека неговото присуство е доволно за да ги одврати потенцијалните престапници. „Иако по подетаљно испитување, јасно е дека лицето не е вистинско, самото чувство за присуство на полицијата имаше значаен ефект на одвраќање“, се вели во соопштението на полицијата.
Холограмот е висок над 170 сантиметри и е моделиран по вистинска личност. Неговиот изглед, особено кога свети во темница, е донекаде морничав. Додека некои на интернет го опишуваат како корисна и високотехнолошка алатка, други го споредуваат со светлечко страшило.
И покрај мешаните критики, психолошкото влијание се чини дека е позитивно. Шефот на полициската станица во Џунгбу, Ан Донг-хјун, рече дека холограмот „се етаблира како паметен безбедносен уред“ и најави планови за проширување на ваквите системи напојувани од вештачка интелигенција во други области.
Јужна Кореја е веќе позната по употребата на експериментална технологија за јавни цели, од препознавање лица во училиштата до виртуелни асистенти на железничките станици.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина и Европа подготвуваат мировен план од 12 точки за крај на војната

Европските земји во соработка со Украина изработуваат предлог од 12 точки за запирање на војната, кој би се темелел на задржување на постојните линии на фронтот, објави „Блумберг“.
Според изворите на агенцијата, планот предвидува прекин на огнот, враќање на украинските деца депортирани во Русија, размена на заробеници, гаранции за безбедност и финансиска помош за обнова на Украина, како и забрзан пат кон членство во Европската унија.
Спроведувањето на договорот би го надгледувал мировен одбор под раководство на американскиот претседател Доналд Трамп. Санкциите кон Москва би се укинале постепено, а околу 300 милијарди евра замрзнати руски средства би ѝ биле вратени дури по прифаќањето на руската финансиска помош за реконструкцијата на Украина.
Планот засега не е финализиран и може да претрпи измени. Европски претставници оваа недела ќе отпатуваат во Вашингтон за разговори, а целта е со договорот да се отвори пат за почеток на мировни преговори меѓу Киев и Москва, наведува Блумберг.
Регион
Хрватска урива стотина дивоградби покрај брегот

Во наредните три недели на плажата Зрќе во Новалија ќе бидат урнати 124 бесправно изградени објекти, соопшти Државниот инспекторат на Хрватска, пренесе „Јутарњи“. Од нив, 119 се наоѓаат во камп, а пет се угостителски објекти изградени без дозвола надвор од градежната зона.
Инспекторатот соопшти дека отстранувањето ќе се врши на трошок на сопствениците и е проценето на околу 720 илјади евра. Акции за уривање на нелегални градби ќе има и во други делови oд Хрватска.
Од 2019 година досега во таа земја се отстранети повеќе од 2300 нелегални градби, спроведени се повеќе од 42 илјади инспекциски надзори, поднесени се 334 кривични пријави, а изречените парични казни достигнуваат 16,5 милиони евра, соопшти Инспекторатот.
Свет
„Дојче веле“: Хамас и ИСИС добиваат пари од Германија

Терористички организации како Хамас и Исламска држава добиваат финансиска поддршка од Германија преку донации собрани на социјалните мрежи, објави Дојче веле. Според истражувањето, повици за „давање богатство за џихад“ кружат на интернет, а од германски следбеници се бараат пари за оружје.
Главна фигура во мрежата на финансирање, според германските истражители, е жена од Минхен, Елиф О., која како тинејџерка заминала во Сирија и наводно сега ги координира донациите за жените-припаднички на ИСИС. Судовите веќе осудиле неколку нејзини помагачи кои собрале околу 40 000 евра.
Поради правни ограничувања, тешко е да се докаже дека конкретна донација директно финансирала терористички чин. Затоа германското министерство за правда подготвува закон со кој би се казнувал и обид за финансирање тероризам.
Според експертот за тероризам Ханс-Јакоб Шиндлер, Германија треба да го следи американскиот модел каде секоја донација кон организација од листата се смета за финансирање тероризам и се казнува со најмалку десет години затвор.
Истражувањето наведува и пример со австрискиот активист Мустафа А. од Линц, кој преку својот Телеграм-канал „Gaza Now“ собирал крипто-донации во милионски износи, дел од кои, според американската компанија Chainalysis, завршиле кај Хамас. Тој е во притвор, а САД и Британија го ставиле на своите санкциски листи уште во март 2024 година.