Свет
(Видео) „Се чувствуваше како земјотрес“ – исплашени граѓани сведочат за уривањето на катната гаража во Њујорк

Сведоци на уривањето на катната гаража во Њујорк раскажуваат дека сцената личела на земјотрес, а луѓето во паника барале засолниште.
Очевидци велат дека колапсот се случил бргу и без предупредување. „Сè се случи толку бргу“, рече Тај Нгуен (35).
„Нашата продавница е две згради подалеку од гаражата, а до нас има хотел. Луѓето втрчаа внатре прашувајќи дали може да се засолнат во нашата продавница“.
„Се чувствуваше како земјотрес“, изјави студентот на Универзитетот „Пејс“, Лијам Гаета, за „Еј-би-си њуз“. Тој рече дека слушнал многу силен звук и набргу сè се урнало и следела евакуација.
Катна гаража на четири ката се урна вчера во долниот дел на Менхетн, Њујорк, во близина на Универзитетот „Пејс“, при што најмалку еден работник загина, а пет други се повредени, соопштија властите.
Пожарникарите беа извлечени од урнатата конструкција поради нестабилни услови и сега трагаат по жртви со помош на роботски уреди.
„Немаме причина да веруваме дека се работи за нешто друго, освен структурен колапс“, изјави за новинарите началникот на градската полиција, Кичант Севел. Видеоснимката од местото на настанот емитувана од Си-би-ес и на Еј-би-си покажува спасувачка операција во тек и повеќе автомобили наредени еден врз друг во урнатата гаража.
Кај едно лице била констатирана смрт на самото место, а уште четири поради повредите се пренесени во болница. Едно повредено лице одбило медицинска помош, изјави Џон Еспосито, шеф на противпожарните операции на Њујоршката противпожарна служба. Тој рече дека сите шестмина биле работници, кои биле таму во моментот на падот.
„Ова беше исклучително опасна ситуација за нашите пожарникари“, рече тој на брифингот со новинарите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколку згради во Бангкок се евакуирани како мерка на претпазливост поради последиците од земјотресот

Неколку згради во Бангкок се евакуирани поради извештаи за вибрации и пукнатини кои се појавиле во зградите, објави Бангкок пост.
Bеше објавено и дека во ѕидовите се слушнало пукање, што предизвикало паника кај многу жители, како и кај владините службеници кои живеат во одредени згради во строгиот центар на Бангкок.
Евакуацијата започнала околу 10 часот. Меѓу погодените беа зградите на владиниот комплекс на патот Ченг Ватана, Министерството за труд во областа Дин Даенг и зградите на судот на патот Рачадаписек.
Луѓето беа евакуирани и од седиштето на Државната банка за домување во округот Хуаи Кванг, Кривичниот суд во Рачадафисек и Канцеларијата за социјално осигурување во Дин Даенг.
Свет
Трамп: Зеленски сака да се повлече од договорот за минерали, ќе има проблеми ако го направи тоа

Американскиот претседател Доналд Трамп изјави дека украинскиот претседател Володимир Зеленски сака да се повлече од договорот за минерали, пренесоа американските медиуми.
Трамп го предупредил украинскиот лидер дека ќе се соочи со големи проблеми доколку го стори тоа, наведува Ројтерс.
„Тој се обидува да се повлече од договорот за ретките земји. Но, ако го направи тоа, ќе има проблеми, големи, големи проблеми“, им рече Трамп на новинарите.
Зеленски на 28 март, по добивањето на новиот американски нацр-договор, кој според него е „драматично проширен“, изјави дека Киев нема да прифати никаков договор за ретки минерали, кој би ја загрозил интеграцијата во Европска Унија.
Свет
Жена спасена по 60 часа под урнатините, најмалку 1.700 загинати во земјотресот во Мјанмар

Три дена по силниот земјотрес што го погоди Мјанмар, властите проценуваат дека загинале најмалку 1.700 луѓе.
Спасувачките тимови се обидуваат да пронајдат уште преживеани под урнатините на зградите во Мјанмар и Тајланд, а во заедничка петчасовна спасувачка операција спроведена од кинески, руски и локални тимови, една жена е спасена по 60 часа под урнатините на хотелот Great Wall во градот Мандалеј, јавува Ројтерс.
Во објава на Фејсбук од кинеската амбасада во Мјанмар утринава се вели дека спасената жена е во стабилна состојба.
Во шест региони на Мјанмар е прогласена вонредна состојба по разорниот земјотрес со јачина од 7,7 степени според Рихтеровата скала.
Во исто време, спасувачките тимови во главниот град на Тајланд, Бангкок, продолжуваат со фанатична потрага по луѓе кои се уште се водат како исчезнати во урнатините на урнатата кула од 30 ката, јавува Франс 24.
Во Бангкок, според денешните официјални податоци на градската власт, загинале најмалку 18 лица, 33 се повредени, а 78 се водат како исчезнати.
Светската здравствена организација (СЗО) е на терен во двете земји, обезбедува итна помош и ги координира операциите за спасување, изјави во Женева портпаролот на СЗО Тарик Јашаревиќ.