Американските разузнавачки агенции предупредија во февруари дека Израел веројатно ќе се обиде да нападне објекти кои се критични за нуклеарната програма на Иран оваа година.

Израелскиот премиер Бенјамин Нетанјаху повеќе пати заговараше за воена опција за запирање на нуклеарната програма на Иран.

Според неодамнешните извештаи од американската разузнавачка заедница, Израел сега се обидува да ја искористи штетата предизвикана врз иранските постројки за производство на ракети и воздушната одбрана по израелското бомбардирање во октомври.

Во еден таков извештај се наведува и дека Израел, генерално, продолжува да се стреми кон поширока цел – да предизвика промена на режимот во Иран.

За Израел, Иран е егзистенцијална закана
За Израел, Иран е егзистенцијална закана: со години, израелските власти тврдат дека Израел има најмногу да изгуби ако Иран, кој одбива да го признае правото на Израел да постои, развие нуклеарна бомба.

Израел и Иран со децении водат „војна во сенка“ преку посредници и тајни операции. Техеран поддржува вооружени групи во регионот кои директно се спротивставија на Израел, како што се Хезболах во Либан, Хамас во Газа и Хутите во Јемен.

Од почетокот на војната на Израел во Газа, нападите од групите поддржани од Иран се интензивираа во знак на солидарност со Палестинците.

Домашни политички мотиви
Нетанјаху под притисок дома: Противставувањето на новиот закон за задолжителна воена служба предизвика политички ќорсокак, а израелскиот парламент, Кнесетот, одржа дискусии за можно распуштање, што би можело да доведе до предвремени избори што Нетанјаху би ги изгубил, според анкетите.

Парламентот го отфрли предлогот за распуштање во среда, давајќи му на Нетанјаху повеќе време да ја реши кризата.

Зошто токму сега?
Се поставува и прашањето зошто Израел одлучи да нападне сега.

Нуклеарно надзорниот орган на Обединетите нации во четврток усвои резолуција со која Иран е прогласен за виновен за кршење на своите обврски според Договорот за неширење на оружје.

Техеран одговори со најава дека ќе ги забрза своите нуклеарни активности, предупредувајќи дека „нема друг избор освен да одговори“.

Ураниумот е нуклеарно гориво кое, доколку е високо збогатено, може да се користи за производство на бомба. Иран вели дека неговата нуклеарна програма е само за мирни цели.

Израелските медиуми објавија дека сите ирански дронови лансирани кон Израел се успешно пресретнати. Командата за цивилна заштита, која издава упатства за засолниште, објави дека граѓаните повеќе не мора да остануваат во близина на засолништата, но сепак се повикуваат да бидат внимателни.

Нападот со беспилотни летала се смета за почеток на иранска одмазда, како одговор на серијата израелски напади во текот на ноќта. Според израелската војска, Иран лансирал повеќе од 100 беспилотни летала, а постои загриженост дека ова би можело да биде само првиот бран од поширок одговор, вклучително и ракетни напади, насочени кон совладување на израелската воздушна одбрана.

Дописникот на Би-би-си истакнува дека времето на оваа ескалација е особено значајно бидејќи американските и иранските претставници требаше да се сретнат во недела за да се обидат да најдат дипломатско решение за кризата околу нуклеарната програма на Иран. Сепак, утрово имаше индикации од Иран дека Техеран нема да учествува во разговорите.

Израелските власти веќе некое време тврдат дека постои добра можност за напад. Иранската воздушна одбрана беше сериозно оштетена во минатогодишните израелски напади, а проиранските групи во регионот, особено Хезболах во Либан, исто така беа ослабени. Израелски извори со месеци алудираа на можна воена акција.

Вечерва тоа се случи: нападот беше насочен кон нуклеарни објекти, воени бази, системи за воздушна одбрана, високи офицери и научници. Иако првиот бран ирански беспилотни летала за одмазда е соборен, речиси е сигурно дека Иран нема да застане тука.

Кина изрази длабока загриженост поради нападот на Израел врз Иран, предупредувајќи за можните сериозни последици што конфликтот би можел да ги предизвика во регионот.

„Кина се спротивставува на какво било кршење на суверенитетот, безбедноста и територијалниот интегритет на Иран, како и на дејствија што дополнително ги влошуваат тензиите или го прошируваат конфликтот“, изјави портпаролот на кинеското Министерство за надворешни работи, Лин Џиан.

„Ненадејното повторно оживување на тензиите на Блискиот Исток не е во интерес на ниту една страна. Кина ги повикува сите вклучени страни да дејствуваат во насока на мир и стабилност и да избегнат понатамошна ескалација“, додаде тој, нагласувајќи дека Пекинг е подготвен да игра конструктивна улога во смирувањето на ситуацијата.

Кина е еден од клучните економски и политички партнери на Иран, негов најголем купувач на нафта и постојан критичар на санкциите на САД.