Свет
(Видео) Тешко болните деца се лекувале и хранеле со производи со поминат рок во Романија

Бран истраги беше поведен по шокантните снимки од центрите за деца со попреченост во Муреш, Романија.
Надлежните отворија две кривични дела поради сомнение за организиран криминал и вршат многубројни контроли. Сè почна кога во четири центри во Тарг Муреш беа откриени деца што беа чувани во нехумани услови, затворени во соби и третирани со лекови со поминат рок, пренесуваат медиумите во регионот.
Инспекцијата од Управата за заштита на децата, како и мешовитата комисија формирана на ниво на префектурата Муреш, утрово ги почна проверките. Во текот на денот ќе бидат проверени сите центри во Тарг Мур,еш кои згрижуваат деца со пречки во развојот.
Ќе се разгледува документацијата, како и други аспекти пријавени од Центарот за правни ресурси, заедно со инспектори од Надзорниот совет, јавува „Антена обсерватор“.
Иинспекторите, според написите, денеска извршиле увид и изнеле шокантни заклучоци.
Во три од четирите центри во Тарг Муреш не се пронајдени само лекови со поминат рок и несоодветни услови за деца, туку и храна на која рокот ѝ истекол во 2023 година и била употребувана за деца со сериозни здравствени проблеми, пренесуваат медиумите.
Инспекторите ги прошириле истрагите и во друг центар во општина Чеуаш де Кампије, каде што постојат сомнежи дека вработените трошеле пари наменети за деца за оброци во ресторани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколку згради во Бангкок се евакуирани како мерка на претпазливост поради последиците од земјотресот

Неколку згради во Бангкок се евакуирани поради извештаи за вибрации и пукнатини кои се појавиле во зградите, објави Бангкок пост.
Bеше објавено и дека во ѕидовите се слушнало пукање, што предизвикало паника кај многу жители, како и кај владините службеници кои живеат во одредени згради во строгиот центар на Бангкок.
Евакуацијата започнала околу 10 часот. Меѓу погодените беа зградите на владиниот комплекс на патот Ченг Ватана, Министерството за труд во областа Дин Даенг и зградите на судот на патот Рачадаписек.
Луѓето беа евакуирани и од седиштето на Државната банка за домување во округот Хуаи Кванг, Кривичниот суд во Рачадафисек и Канцеларијата за социјално осигурување во Дин Даенг.
Свет
Трамп: Зеленски сака да се повлече од договорот за минерали, ќе има проблеми ако го направи тоа

Американскиот претседател Доналд Трамп изјави дека украинскиот претседател Володимир Зеленски сака да се повлече од договорот за минерали, пренесоа американските медиуми.
Трамп го предупредил украинскиот лидер дека ќе се соочи со големи проблеми доколку го стори тоа, наведува Ројтерс.
„Тој се обидува да се повлече од договорот за ретките земји. Но, ако го направи тоа, ќе има проблеми, големи, големи проблеми“, им рече Трамп на новинарите.
Зеленски на 28 март, по добивањето на новиот американски нацр-договор, кој според него е „драматично проширен“, изјави дека Киев нема да прифати никаков договор за ретки минерали, кој би ја загрозил интеграцијата во Европска Унија.
Свет
Жена спасена по 60 часа под урнатините, најмалку 1.700 загинати во земјотресот во Мјанмар

Три дена по силниот земјотрес што го погоди Мјанмар, властите проценуваат дека загинале најмалку 1.700 луѓе.
Спасувачките тимови се обидуваат да пронајдат уште преживеани под урнатините на зградите во Мјанмар и Тајланд, а во заедничка петчасовна спасувачка операција спроведена од кинески, руски и локални тимови, една жена е спасена по 60 часа под урнатините на хотелот Great Wall во градот Мандалеј, јавува Ројтерс.
Во објава на Фејсбук од кинеската амбасада во Мјанмар утринава се вели дека спасената жена е во стабилна состојба.
Во шест региони на Мјанмар е прогласена вонредна состојба по разорниот земјотрес со јачина од 7,7 степени според Рихтеровата скала.
Во исто време, спасувачките тимови во главниот град на Тајланд, Бангкок, продолжуваат со фанатична потрага по луѓе кои се уште се водат како исчезнати во урнатините на урнатата кула од 30 ката, јавува Франс 24.
Во Бангкок, според денешните официјални податоци на градската власт, загинале најмалку 18 лица, 33 се повредени, а 78 се водат како исчезнати.
Светската здравствена организација (СЗО) е на терен во двете земји, обезбедува итна помош и ги координира операциите за спасување, изјави во Женева портпаролот на СЗО Тарик Јашаревиќ.