Европа
(Видео) Трагична сообраќајна несреќа во Германија: загинаа мајка и две деца кога автомобил удрил во нив на тротоар
Германија вчера ја потресе трагична сообраќајна несреќа. Пешак и нејзините два сина биле удрени од автомобил во Еслинген кај Штутгарт, а сите тројца загинале на местото на несреќата. Истрагата е во тек, а полицијата интензивно трага по сведоци на трагедијата.
39-годишна жена и нејзините два сина на возраст од шест и три години загинаа кога автомобил удрил во нив на тротоарот во Еслинген покрај реката Некар откога 54-годишниот возач од непозната причина излетал од патот и ги прегазил.
Во моментот на несреќата возачот удрил и во друго возило, чиј возач исто така бил пренесен во болница.
Drei Tote: Fußgänger von PKW erfasst in #Esslingen – #Weil https://t.co/DJuKGnyiH9 pic.twitter.com/V42LdiWJgk
— 7aktuell (@7aktuell) October 22, 2024
По наредба на Државното правобранителство во Штутгарт, ангажиран е вештак за расветлување на околностите и причината за несреќата. „Засега нема индикации за намерно дело“, изјави портпаролот на полицијата.
Локалната заедница ја потресе трагедијата, а очевидци велат дека полицајците плачеле кога ги виделе сцените од оваа трагедија.
На местото на настанот, покрај многуте полицајци, пожарникари и итните служби, имало и неколку стручни лица за итна психосоцијална помош, кои им дале поддршка на сведоците и членовите на семејството.
Истрагата треба да даде одговори на прашањето зошто се случила несреќата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Објавено кои седум земји не сакаат да ја поканат Украина во НАТО, пренесува „Политико“
Претседателот Володимир Зеленски има проблем со планот за победа, кој се заснова на тоа Украина да добие покана за членство во НАТО. Имено, некои од клучните членки на алијансата не сакаат тоа да се случи, пренесува „Политико“.
Германија и САД се меѓу главните земји што не сакаат да ја исполнат желбата на Зеленски за итна покана за членство во НАТО, изјавија за „Политико“ четворица претставници и дипломати од САД и НАТО, кои сакаа да останат анонимни.
Во својот план за победа Зеленски побара итна покана, но призна дека вистинското приклучување во алијансата ќе биде можно само по завршувањето на војната со Русија. Да потсетиме дека тој неодамна инсистира на тоа дека е од фундаментално значење Украина да добие покана за време на војната.
Но, клучните членови на алијансата се загрижени дека ќе паднат во замката на војната со Русија.
Амбасадорката на САД во НАТО во заминување, Џулијан Смит, во интервју за „Политико“ ја истакна американската позиција. „До денес алијансата не стигна до точка на која е подготвена да понуди членство или покана за Украина“, рече таа.
Самиот Зеленски призна дека Олаф Шолц, канцеларот на Германија, кој е веднаш зад Америка во испораката на оружје за Украина, нема да ја поддржи идејата за избрзана покана за Украина за членство во НАТО.
„Имам многу добри односи со Шолц. Ценам дека помага. Германија е втора по поддршка“, им изјави Зеленски на новинарите претходно оваа недела. „Но, германската страна е скептична за нашиот влез во НАТО… Сите ќе треба многу да работиме со германската страна. Но, САД сè уште ќе имаат влијание врз тоа“.
Германија и САД не се единствените земји што ја блокираат брзата покана на Украина за НАТО.
Против се Унгарија и Словачка, но од други причини. Нивните сегашни популистички лидери заземаат про-Кремљ позиции, при што унгарскиот премиер Виктор Орбан ги блокира фондовите на ЕУ за вооружување на Украина, како и програмата на НАТО за испраќање воена помош во Киев.
Во објава на социјалните мрежи Орбан го нарече планот на Зеленски за победа повеќе од застрашувачки.
Словачкиот премиер Роберт Фицо претходно овој месец предупреди дека дозволувањето на Украина да му се приклучи на НАТО „би било добра основа за третата светска војна“ и вети дека „никогаш нема да се согласи со тоа“.
Има и други земји што не сакаат бргу да ја поканат Украина во НАТО.
„Зад САД и Германија се кријат земји како Белгија, Словенија или Шпанија“, рече еден од претставниците на НАТО. Друг функционер рече дека овие земји „ја поддржуваат Украина апстрактно, но кога идејата ќе се приближи до имплементација“, тие ќе почнат јавно да се спротивставуваат на тоа.
Ова ги доведува во конфликт со балтичките земји и Полска, кои се многу поентузијасти за поканата за Украина
Полска е посветена на „отворање на НАТО перспективата за Украина“, изјави полскиот премиер Доналд Туск за време на минатонеделниот самит на лидерите на ЕУ. „Тоа не се промени. Во оваа смисла ние стоиме во солидарност со Украина“.
„Се грижиме НАТО да не стане страна во војната за таа да не се претвори во многу поголема катастрофа“, им рече Шолц на новинарите за време на минатонеделната посета на американскиот претседател Џо Бајден на Берлин.
Сепак, официјалните претставници, кои разговараа за „Политико“, беа внимателни да нагласат дека ниту САД ниту Германија не ја исклучува можноста за евентуално пристапување на Украина во алијансата.
Ставот на администрацијата на Бајден долго време беше дека влезот во НАТО ќе дојде по завршувањето на војната – но не е дадена временска рамка за да се избегне гневот на рускиот лидер Владимир Путин.
Иако Бајден помогна во заживувањето и проширувањето на НАТО, а САД се главен донатор на воена помош за Украина, неговата администрација исто така верува дека повеќето европски престолнини нема да поддржат брза покана за Украина да му се приклучи на НАТО, според висок американски функционер. Секоја идна понуда до НАТО исто така ќе биде поврзана со неопходните реформи за борба против корупцијата во Украина, рече претставникот.
Белата куќа не изрази изненадување од можноста Зеленски да ја засили кампањата за притисок за да добие обврска за НАТО пред изборите во САД плашејќи се дека доколку победи Доналд Трамп, тој драматично ќе ја намали помошта за Киев.
Европа
Русија: Зазедовме две села во источна Украина; Киев: Борбите се интензивни
Руските сили ги зазедоа селата Серебријанка и Миколаивка во областа Доњецк во источна Украина, соопшти синоќа руското Министерство за одбрана, додека воените блогери известуваат за рускиот напредок во близина на клучните градови на фронтот.
Украинската војска не призна дека некое село паднало во руски раце, но рече дека двете области на фронтот биле зафатени со интензивни борби. Блогерите од двете страни известија за интензивен руски напад врз градот Селидове.
Украинскиот Генералштаб соопшти дека неговите сили ги одбиле сите 12 руски напади во областа околу Серебријанка, во северната граница на регионот Доњецк. Се вели дека жестоки борби ги зафатиле градовите на приодот кон Покровск, следниот клучен логистички град во постојаниот продор на руската војска кон запад во регионот на Доњецк.
Популарниот украински воен блогер „Дип Стејт“ рече дека украинските војници се соочиле со тешка задача да го одбранат Селидове, град кој се наоѓа југозападно од Миколаивка. Заземањето на Селидово би го отворило патот за руското напредување кон Покровск.
„Дип Стејт“ рече дека руските сили со „предноста на бескрајните ресурси на пешадија и опрема“ вршат притисок врз украинската одбрана и напредуваат и од север и од југ.
Ројтерс не можеше независно да ги потврди извештаите од бојното поле од ниту една страна.
Европа
Познат идентитетот на загинатите во терористичкиот напад во Анкара
Откриен е идентитетот на загинатите во вчерашниот терористички напад во Анкара, јавува Анадолија.
Во терористичкиот напад загинаа Џенгиз Чоскун, кој работел како офицер за контрола на квалитетот во TUSAS, машинскиот инженер Захиде Гуцлу, вработениот Хасан Хусеин Чанбаз, службеникот за безбедност Атакан Сахин Ердоган и таксистот Мурат Арслан.
22 повредени лица се згрижени во различни болници.
Една од загинатите, Захиде Гуцлу, отишла до влезот на кампусот за да собере цвеќе испратено од нејзиниот сопруг, кога се случил нападот.
Наведено е дека терористите го убиле таксистот Мурат Арслан откако влегле во неговото возило, а потоа неговото тело го сокриле во багажникот на возилото.
Од 22 повредени лица, само едно е се уште во критична состојба, рече министерот за внатрешни работи, додавајќи дека тројца веќе се отпуштени од болница.
Тој вели дека седуммината повредени се припадници на одредот за специјални операции на турската полиција.