Свет
(Видео) Трамп за Израел и Иран: Тие не знаат што по ѓаволите прават
Претседателот на САД, Доналд Трамп, денес упати директно предупредување до Израел, велејќи дека не смее да извршува воздушни напади врз Иран, бидејќи тоа би било „сериозно кршење“ на договореното примирје.
„Сите авиони ќе се свртат и ќе се вратат дома. Никој нема да биде повреден, прекинот на огнот е на сила“, рече Трамп во објава на платформата Truth Social, пред неговото заминување за самитот на НАТО во Хаг.
Во разговор со новинарите подоцна, Трамп продолжи со своите критики кон постапките на Израел, велејќи дека Тел Авив мора веднаш да ги прекине операциите.
„Мораме да го смириме Израел затоа што утрово отидоа на мисија“, рече тој. „Морам да ги смирам.“
Кога беше прашан за наводни прекршувања на примирјето од двете страни, тој рече: „Не сум сигурен дека го направиле тоа намерно. Не успеаја да ги спречат луѓето.“
Тој додаде дека „не му се допаднала“ непосредната реакција на Израел по постигнувањето на договорот: „Наводно, една ракета била испукана по истекот на рокот и сега Израел стапува во акција. Овие луѓе треба да се смират“.
Трамп најави дека ќе се обиде лично да интервенира: „Штом ќе се оддалечам од вас, ќе се обидам да го спречам тоа“.
„Тие не знаат што по ѓаволите прават“.
Израелското воено радио објави дека израелската војска нападнала радар во близина на Техеран.
Иранските медиуми, исто така, објавија дека Израел го нападнал градот Баболсар на северот од земјата.
Иранската новинска агенција Тасним објави дека Иранската револуционерна гарда во вторникот изјавила дека најновиот бран ирански ракети против Израел бил лансиран неколку минути пред да се спроведе прекинот на огнот како одговор на смртоносните израелски напади.
Во соопштението се вели дека 14 ракети биле лансирани кон воени центри низ Израел, додавајќи дека вооружените сили на Иран ќе продолжат да ги следат „непријателските движења со отворени и будни очи“, објави Тасним.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

