Американскиот претседател Доналд Трамп изјави дека верува оти Русија „ја држи картата“ во какви било мировни преговори за ставање крај на војната во Украина бидејќи „зазела многу територија“.

„Мислам дека Русите сакаат да го видат крајот на војната, јас навистина сакам. Мислам дека ги имаат картите, бидејќи зазедоа многу територија. Тие ги имаат картите“, изјави Трамп за Би-би-си додека се враќаше во Вашингтон по говорот на инвестицискиот самит во Флорида, кој беше поддржан од Саудиска Арабија.

Трамп, исто така, рече дека верува оти Москва сака да види крај на војната што ја започна пред речиси три години со целосна инвазија на Украина.

Трамп го нарече украинскиот претседател Володимир Зеленски „диктатор“ по втор пат во еден ден за време на говорот на Флорида. „Тој ги отфрла изборите. Тој е на ниско ниво на украинските анкети. Како можете да бидете високо додека секој град се уништува“, рече Трамп.

Зеленски неговата изјава ја нарече „дезинформација“, обвинувајќи го Трамп дека живее „во простор на дезинформации што доаѓаат од Москва“. Неговиот петгодишен мандат требаше да истече во мај годинава, но изборите беа прекинати поради воената состојба која е на сила од февруари 2022 година.

Трамп тврдеше дека Зеленски има само 4 отсто поддршка во Украина, но Би-би-си објави дека анкетата спроведена овој месец покажа дека 57 отсто од Украинците имаат доверба во својот претседател.

Изјавите на Трамп предизвикаа критики од европските лидери, а германскиот канцелар Олаф Шолц рече дека е „едноставно погрешно и опасно да се негира демократскиот легитимитет на претседателот Зеленски“.

Европските лидери предупредуваат дека не треба да се постигне договор без учество и согласност на Украинците, а бараат и ЕУ да има свое седиште на масата во мировните преговори. Во овој контекст, Трамп бара Европа да биде гарант за прекинот на огнот во Украина со испраќање свои војници во Украина.

Велика Британија и Франција не го отфрлија предлогот, но низ целиот континент постои резервираност кон таквата идеја. „Не можеме да испраќаме војници без да постигнеме праведен мир“, рече германската министерка за надворешни работи Аналена Баербок.

Во меѓувреме, американските и руските официјални лица ги одржаа своите први разговори на високо ниво лице в лице од почетокот на војната, но Украина и европските лидери не беа поканети.

Трамп подоцна дополнително ја засили својата реторика, обвинувајќи ја Украина за војната. Тој ја отфрли украинската загриженост дека тие биле исклучени од состанокот, додавајќи дека требало да започнат разговори многу порано.

„Денес слушнав ‘ох, не бевме поканети’. Па бевте тука три години, требаше да го завршите тоа… никогаш и не требаше да го започнете. Требаше да постигнете договор“, рече Трамп.

Holy shit. Trump says Zelenskyy “should have never started” the war with Russia.

Putin started the war by invading Ukraine. He is literally spreading Putin talking points from the podium. What a disgraceful asshole.

pic.twitter.com/EdNAJn46Cm

— CALL TO ACTIVISM (@CalltoActivism) February 18, 2025

Зеленски одговори со тврдењето дека Русија лажела за време на состанокот и дека изјавата на Трамп е опасна. „Со сета почит кон претседателот Доналд Трамп како лидер… тој живее во овој простор на дезинформации“, рече Зеленски.

Коментирајќи ги преговорите, рускиот претседател Владимир Путин рече дека Русија никогаш не ја исклучила можноста за преговори за Украина и дека не ги прекинала контактите ниту со Европејците, ниту со Киев.

Според него, европските и украинските власти биле тие кои ги прекинале или забраниле овие контакти. Путин истакна дека Украина нема да биде исклучена од преговарачкиот процес за ставање крај на војната.

Според него, за време на телефонскиот разговор американскиот претседател Доналд Трамп му рекол дека во преговорите ќе биде вклучен и Киев. „Се разбира, САД претпоставуваат дека преговарачкиот процес ќе се одвива со учество на Русија и Украина“, рече Путин и додаде: „Никој не ја исклучува Украина од овој процес“.

Иако и САД и Русија го оценија почетокот на преговорите како позитивен, Москва продолжува да нагласува дека не се откажува од главните цели на „специјалната воена операција“, а тоа се признавањето на четири украински региони како руски и ветувањето дека Украина нема да влезе во НАТО.