Свет
(Видео) Четиригодишно девојче падна во море од крузерот на „Дизни“: таткото скокнал по него, двајцата спасени

Патниците на луксузниот крузер „Дизни“ беа сведоци на драматична сцена кога мало девојче падна од четвртата палуба, а нејзиниот татко скокна во морето по неа во обид да ја спаси.
Според очевидци, инцидентот се случил додека таткото ја фотографирал својата ќерка во близина на оградата на бродот. Бродот се движел со голема брзина во моментот на несреќата, а екипажот веднаш кренал тревога, извикувајќи „човек во морето“ и започнал спасувачка операција.
На социјалните мрежи се појавија видеа од патници кои извикуваат додека спасувачки брод ги извлекува од површината на морето. Таткото и ќерката биле во вода околу 10 минути пред да бидат спасени.
NEW: Father jumps overboard to save his 5-year-old daughter, who fell off a Disney cruise ship from the 4th deck into the ocean.
The ship was heading back to South Florida when the intense rescue was made.
"The ship was moving quickly, so quickly, it's crazy how quickly the… pic.twitter.com/PTGmAzZJ7O
— Collin Rugg (@CollinRugg) June 30, 2025
„Бродот се движеше неверојатно брзо. Во еден миг, тие беа само мали точки во водата, а потоа исчезнаа од видното поле“, рече патничката Лаура Амадор. „Капетанот го забави бродот, го сврте и го спушти спасувачкиот брод. Ги видовме како се спасуваат“, изјави таа за „Си-би-ес Њуз“.
Друг патник, Гар Франц, изјави за „Ен-би-си Њуз“: „Гледавме. Видовме две точки… беше ужасно, навистина ужасно“.
„Дизни Круз Лајн“ го потврди инцидентот и ја пофали брзата реакција на екипажот:
„Екипажот на „Дизни Дрим“ брзо спаси двајца гости од водата. Горди сме на нивната вештина и брза реакција, што им овозможи на двајцата гости безбедно да се вратат на бродот за само неколку минути“, соопшти компанијата.
Несреќата се случила на последниот ден од крстарењето. Бродот „Дизни Дрим“ со 4.000 патници се враќал во Форт Лодердејл, Флорида, по четиридневно патување на Бахамите. Се вратил во пристаништето според закажаното.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германскиот министер контра Фон дер Лајен: Фундаментално е погрешно да се зборува сега за распоредувањето сили во Украина

Германскиот министер за одбрана, Борис Писториус, денес ја критикуваше претседателката на Европската комисија, Урсула фон дер Лајен, поради јавно претставените планови за испраќање мултинационални сили во Украина како дел од долгорочни безбедносни гаранции.
Писториус изјави дека е „фундаментално погрешно“ да се разговара за такви опции пред мировните преговори.
„Европската Унија нема никаква одговорност ниту надлежност кога станува збор за распоредување на сили. Би се воздржал од потврдување или коментирање на такви размислувања на било кој начин“, рече министерот пред новинарите во објект на одбранбената индустрија во западногерманскиот град Тројсдорф.
Тој потврди дека владите размислуваат што би било можно „под кои услови и ограничувања“.
„Но мислам дека е целосно погрешно јавно да се дискутира за тоа во овој момент“, додаде Писториус.
Во интервју за „Фајненшл тајмс“, фон дер Лајен изјави дека Европа прави „доволно прецизни планови“ за распоредување на мултинационални сили во Украина.
Претседателката на Комисијата рече дека плановите би можеле да вклучат десетици илјади војници од европските земји, со поддршка од САД во области како разузнавање и командување.
Фон дер Лајен нагласи дека силните гаранции се „од најголема важност“ за заштита на Украина од идни руски напади и за зачувување на безбедноста на цела Европа.
Таа исто така ја поздрави подготвеноста на американскиот претседател Доналд Трамп да обезбеди она што го опиша како „безбедносна гаранција слична на член 5“ за Киев.
Идејата за стационирање на западни сили во Украина предизвикува длабоки поделби. Франција и Велика Британија разговараат за ова прашање, САД и земјите членки на НАТО, како Полска, ја исклучија можноста за испраќање трупи, додека некои земји се уште не се одлучни.
Свет
Трамп: Индијците сега понудија да ги намалат царините на нула, но доцна е

Американскиот претседател Доналд Трамп соопшти дека Индија понудила да ги намали царините за американската стока на нула. Изјавата на Трамп доаѓа откако индискиот премиер Нарендра Моди јавно покажа солидарност со кинескиот и рускиот лидер, соочен со трговскиот притисок од Вашингтон.
Нарекувајќи ја врската меѓу САД и Индија „едностранa“, Трамп на својата платформа „Тру Соушал“ напиша: „Сега понудија да ги намалат царините на нула, но веќе е доцна. Требаше тоа да го направат пред многу години.“
Индијското амбасадорство во Вашингтон не одговори веднаш на коментарите на Трамп, кои следеа по воведувањето на вкупни царини до 50 проценти на индиска стока, што отвори прашања за иднината на американско-индијските односи.
Трамп го напиша тоа на „Икс“ во моментот кога Моди на самит во Кина се сретна со повеќе од 20 лидери на незападни земји од Шангајската организација за соработка, иницијатива што ја поддржува Кина, а која доби нов замав со глобалната царинска офанзива на Трамп.
Свет
Германскиот министер за финансии за данок на богатите, канцеларот против

Ќе воведе ли Германија поголеми даноци за богатите за да се затвори буџетската дупка од над 30 милијарди евра? Тоа е прашањето што го зафаќа политичкиот Берлин и се заканува да предизвика судир меѓу владејачките партии, пишува „Дојче Веле“.
Германскиот буџет за 2027 година се соочува со недостиг од повеќе милијарди евра. Министерот за финансии Ларс Клингбајл затоа не ја исклучува можноста за зголемување на даноците за оние со високи приходи. Демохристијаните (ЦДУ/ЦСУ) се огорчени. Клингбајл, кој е воедно и претседател на Социјалдемократската партија на Германија (СПД), во емисија на јавниот сервис АРД „Bericht aus Berlin“ го појасни својот став, нагласувајќи дека „сите мора да дадат свој придонес“.
„Никогаш немало влада со ваков предизвик“
Веќе неколку недели во Германија се расправа дали се потребни повисоки даноци за имотните граѓани за да се затвори дупката во државниот буџет. Клингбајл потсети дека тоа го најавил уште средината на август во летното интервју за ЗДФ, што веднаш наиде на жесток отпор од коалициските партнери од редовите на ЦДУ/ЦСУ.
Сега Клингбајл дополнително го брани и конкретизира својот став. „Мислам дека никогаш немало федерална влада која морала да затвори ваква голема буџетска дупка“, рече Клингбајл. „Советувам сите опции да останат отворени додека не можеме да објавиме дека тие 30 милијарди се отплатени и дупката е затворена“, додаде.
Клингбајл објасни дека недостатокот во буџетот за 2027 дополнително се зголемил поради проекти како „пензија за мајки“ и компензации за општините во рамки на иницијативата за „поттикнување економски раст“.
„Не смее да се кратат социјалните трошоци“
„Ме интересира кои идеи ќе ги предложат канцеларот и другите за да се затвори недостатокот од 30 милијарди“, порача Клингбајл, осврнувајќи се на одбивањето на демохристијаните да разговараат за зголемување на даноците.
Тој предупреди и на опасноста од преголеми кратења во социјалата. „Има некои, тоа го забележувам понекогаш во политичката дебата, кои изгледа мислат дека сите пари можат да се заштедат на пензии, здравство, нега и други работи“, рече шефот на СПД.
Нагласи дека сега мора да се донесе цел пакет мерки кој ќе биде праведен и балансиран.
„Ќе мора да побараме нешто од граѓаните, така е. Но многу е важно да постои чувство дека тоа се однесува на сите и дека сите треба да дадат свој придонес“, рече Клингбајл и додаде дека му е драго што дебатата за ова сега започнува. „Важно ми е да не почнеме дури кога ќе се приближи буџетот за 2027, туку тоа да го направиме во наредните недели.“
Сојузниот канцелар Фридрих Мерц во меѓувреме јасно ги отфрли идеите за зголемување на даноците. „Договорениот коалициски договор важи“, рече Мерц во летното интервју за јавниот сервис ЗДФ и нагласи дека ЦДУ/ЦСУ и СПД во коалицискиот договор се согласиле дека даноците нема да растат.
Потсети дека за оваа тема долго се расправало на преговорите. „СПД тоа добро го знае“, рече Мерц. „Тоа што СПД има поинакви ставови по ова прашање е исто толку во ред како и тоа што ние во други прашања имаме свои ставови. Ние не го бараме што нè дели. Ние го бараме она што ни овозможува заедно и одговорно да владееме“, додаде.
Шефот на ЦСУ, Маркус Зедер, исто така ги критикуваше предлозите на Клингбајл. „Не, сега не ги зголемуваме даноците. Мораме да ги намалуваме“, рече Зедер за весникот Handelsblatt.
„Кој потпишува коалициски договор треба и да го спроведе, а не да доведува сè во прашање по неколку месеци“, порача Зедер.
Тој ги отфрли и предлозите на поединечни пратеници од ЦДУ да ѝ понудат на СПД повисок данок за богатите во замена за реформи на социјалниот систем. „Тоа за мене е исклучено“, рече шефот на ЦСУ.