Свет
(Видео) Шест луѓе убиени среде пустина во Калифорнија

Шест лица се пронајдени мртви во пустината Мохаве во јужна Калифорнија.
Полицијата истражува кој стои зад убиствата откако шест тела беа пронајдени расфрлани во оддалечен дел од пустината, соопшти Канцеларијата на шерифот на округот Сан Бернардино. Полицајците што ја примија дојавата ги открија телата во вторникот вечерта во оддалечена област во близина на автопатот 395 во близина на Ел Мираж, околу 95 километри североисточно од Лос Анџелес, изјави за новинарите портпаролката на шерифот, Мара Родригез.
Засега нема информации за идентитетот на загинатите. Официјални лица рекоа дека причината и начинот на смртта допрва треба да се потврдат, но „Виктор Вели њуз“ објави дека сите жртви биле застрелани. Првично беа пријавени пет тела, но Родригез рече дека во текот на истрагата биле пронајдени останките и на шестата жртва.
Телевизиската станица КТЛА-ТВ во Лос Анџелес соопшти дека снимките од воздух од местото на настанот покажуваат повеќе крвави тела на земјата со десетици траги и патрони околу нив. Некои од жртвите исто така се чинеше дека се изгорени, објави медиумот додавајќи дека сцените биле премногу ужасни за да се емитуваат.
На местото на настанот се пронајдени и две возила – син џип и бело комбе. КТЛА известува дека теренецот бил изрешетан со куршуми, а стаклата биле искршени, додавајќи дека едно од телата било пронајдено во едно од возилата.
Полицијата соопшти дека нема уапсени и не понуди објаснување за мотивот или околностите за убиствата. Ел Мираж е заедница што се наоѓа во близина на рамно, суво езерско корито во западната долина Виктор во пустината Мохаве.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.