Свет
(Видео) Јамајка се подготвува за најлошиот ураган во историјата
Три лица веќе загинаа на Јамајка, додека островот се подготвува за најсилната бура во светот оваа година, а можеби и најсилната досега регистрирана на островот. Американските метеоролози предупредуваат на „катастрофални и опасни по живот“ услови.
Со ветрови до 282 км/ч, ураганот Мелиса е бура од категорија 5 (највисоката можна). Се засилува дополнително и се очекува да го погоди карипскиот остров денес.
Најновите податоци од Националниот центар за урагани на САД (NHC) покажуваат дека, врз основа на максималната брзина на ветерот и нискиот централен притисок, Мелиса е најсилната бура во светот досега оваа година.
Incredible footage from inside the eye of Category 5 Hurricane Melissa. Filmed during a reconnaissance flight by the US Air Force’s 53rd Weather Reconnaissance Squadron, the video reveals the sharply defined eyewall and the deceptive calm at the storm’s center; conditions that… pic.twitter.com/WCevRvU8wG
— AviatorsMaldives (@AviatorsMaldive) October 28, 2025
Со својата моментална сила, тоа би бил најсилниот ураган што ја погодил Јамајка откако започнале официјалните мерења во 1851 година, објави Си-би-ес.
Тројца мртви на Јамајка
Иако ураганот сè уште не стигнал до копното, три лица веќе загинаа, а 13 се повредени, изјави јамајканскиот министер за здравство Кристофер Тафтон.
Луѓето загинаа додека сечеле дрвја, додека другите беа повредени главно при паѓање од скали и покриви.
Тафтон ги повика жителите на Јамајка да бидат внимателни додека се подготвуваат. Тој исто така рече дека треба да се осигурат дека имаат доволно залихи од вода за пиење и нерасиплива храна.
Владата, исто така, соопшти дека околу 50.000 луѓе останале без електрична енергија додека се приближувал ураганот, претежно во западниот дел од земјата.
Премиерот на Јамајка: Се молам
„На колена се молам“, изјави за медиумите јамајканскиот премиер Ендру Холнес, додавајќи дека бил во контакт со светските лидери. „Се чини дека целиот свет се моли за Јамајка“, рече тој.
Во остро предупредување до жителите, Холнес рече дека „во регионот нема инфраструктура што може да издржи ураган од категорија 5“.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Метеоролог од Јамајка: Ова би можело да биде невиден настан
Иако Јамајка доживеала разорни урагани, како што е ураганот Гилберт од категорија 4 во 1988 година, директниот удар од бура од категорија 5 би бил без преседан, рече Еван Томпсон од Метеоролошката служба на Јамајка. Мелиса се движи и многу побавно од Гилберт, што значи дека жителите ќе мора да бидат засолнети со денови, а некои заедници би можеле да бидат отсечени со недели.
Стравот е опиплив кај локалното население, извести Ројтерс. Дамијан Андерсон, наставник во градот Хагли Геп во Сините Планини, рече дека патиштата веќе се непроодни.
„Не можеме да се движиме. Исплашени сме. Никогаш порано не сме виделе нешто вакво да трае со денови“, рече тој.
фото: принтскрин
Свет
Четири лица загинаа во обилните дождови на Хаити и Доминиканската Република
Ураганот Мелиса веќе ја покажа својата деструктивна моќ. На Хаити и Доминиканската Република, обилните дождови одзедоа најмалку четири животи. На Хаити, земја опустошена од насилство меѓу бандите, повеќе од 3.650 луѓе се сместени во привремени засолништа.
Подготовките се во полн ек и во Куба, каде што властите евакуираа повеќе од 500.000 луѓе од крајбрежните и планинските области.

Само во областа околу Сантијаго де Куба, вториот по големина град на директната патека на ураганот, повеќе од 250.000 луѓе се однесени во засолништа. Наредби за евакуација издаде и премиерот на Бахамите, Филип Дејвис, за јужните и источните делови од архипелагот.
фото: принѕтскрин
Свет
Кризата во САД се поголема, вчера беа одложени 7.000 летови
Кризата со воздушниот сообраќај во САД се продлабочи откако речиси 7.000 летови беа одложени низ целата земја во понеделник, додека бројот на отсуства од работа на контролорите на воздушниот сообраќај нагло се зголеми поради тоа што федералната влада влезе во 27-миот ден блокада.
Федералната администрација за воздухопловство (ФАА) го наведе недостигот на персонал како причина за доцнењето вчера, кое ги погоди аеродромот Њуарк во сојузната држава Њу Џерси, аеродромот во Остин во Тексас и меѓународниот аеродром Далас Форт Ворт. Летовите на југоистокот претходно доцнеа поради значителен недостиг на персонал во радарскиот контролен центар Atlanta Terminal Radar Approach Control.
Илјадници работници работат без плата
Околу 13.000 контролори на воздушниот сообраќај и 50.000 вработени во Администрацијата за безбедност на транспортот (TSA) се принудени да работат без плата откако републиканскиот претседател Доналд Трамп и демократите во Конгресот не успеаја да постигнат договор за буџетот, што предизвика блокада на владата.
Администрацијата на Трамп предупреди дека воздушниот сообраќај ќе биде дополнително нарушен бидејќи контролорите на воздушниот сообраќај ќе останат без својата прва целосна плата во вторник.
Во неделата, повеќе од 8.800 летови беа одложени.
Претставник на Министерството за транспорт на САД изјави дека 44 проценти од доцнењата во неделата биле предизвикани од отсуство на контролорите на летање, што е далеку над вообичаените пет проценти.
Зголемениот број на доцнења и откажувања на летови го зголемува незадоволството на јавноста и го зголемува притисокот врз политичарите да најдат решение и да го прекинат затворањето на владата.
Министерот за транспорт Шон Дафи беше во Кливленд во понеделник на состанок со контролорите, додека синдикатот на Националното здружение на контролори на летање планира да одржи митинзи на бројни аеродроми во вторник за да предупреди за првата пропуштена плата.
фото: принтскрин

