Свет
(Видео) Јорданскиот принц тврди дека е во домашен притвор
Јорданскиот принц Хамза преку видео испратено до светските медиуми објави дека командантот на јорданските вооружени сили му рекол да не ја напушта куќата и да не комуницира со луѓе, неколку часа откако армијата тврдеше дека не е во домашен притвор.
Врховниот командант Јусеф Ахмед ал-Хунаити негираше дека поранешниот престолонаследник и полубрат на кралот Абдула бил приведен или е во домашен притвор. Но, принцот Хамза објави видео, кратко потоа.
„Утрово ме посети командантот на Генералштабот на јорданската армија кој ме извести дека не смеам да излегувам, да комуницирам со луѓе или да ги исполнувам обврските затоа што имаше критики кон кралот на состаноците на кои присуствував или на социјалните мрежи за моите посети“, рече тој на англиски јазик во видеото објавено од Би-Би-Си.
Хамза рече дека тој не е обвинет лично за изговарање критики кон кралот Абдула Втори. Тој исто така кажа дека му е отстрането осигурувањето и дека му се прекинати телефонските и интернет врските.
„Овој сателитски интернет е мојот единствен начин за комуникација“, рече тој, додавајќи дека компанијата му рекла дека ќе биде прекинат и тој.
„Јас не сум одговорен за неуспесите во управувањето, за корупцијата и за неспособноста што владееше во нашите управувачки структури во последните 15 до 20 години“, додаде принцот.
Хамза (41) беше престолонаследник од 1999 до 2004 година кога кралот Абдула го отстрани и го постави неговиот син за престолонаследник.
Хамза потоа во писмо објавено од државните медиуми напиша дека верно ќе го поддржи Абдула.
Според „Вашингтон пост“, Хамза е во домашен притвор во рамки на истрагата за планирање на пуч. Ал-Хунаити го негираше ова, но рече дека на принцот Хамза му било речено да се воздржува од активности што можат да ја нарушат стабилноста на кралството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Захарова: Русија не ги доживува санкциите како привремени или целни мерки
Портпаролката на руското Министерство за надворешни работи, Марија Захарова, денес изјави дека Русија е убедена дека западните санкции не се привремени или целни мерки, туку механизам за системски притисок врз Москва.
Таа нагласи дека западните земји, нивните сојузи и нивните поврзани сателити спроведуваат агресивна кампања против Русија.
„Целта е отворено декларирана: финансиска и технолошка изолација, поткопување на перспективите за долгорочен социоекономски развој и нанесување максимална штета на граѓаните со цел дестабилизација на внатрешнополитичката ситуација. Веруваме дека санкциите не се привремени или целни мерки, туку механизам за системски стратешки притисок врз нашата земја“, изјави таа за ТАСС на маргините на форумот „Произведено во Русија“.
Таа истакна дека Западот се обидува да воведе секундарни санкции против суверените држави, „обидувајќи се да ги казни за соработка со Русија, поради фактот што овие земји ги бранат своите национални интереси“.
Како што изјави таа, санкциите станаа реалност на новата фаза на развој во која влезе глобалната економија.
„Неподготвеноста на западните земји да признаат дека нивните производствени и финансиски модели ја губат конкурентската битка од глобалното мнозинство води кон хаос и нерамнотежа во сите области на глобалната економија“, нагласи Захарова.
Според неа, бројните пакети санкции воведени не само против Русија, туку и против други земји, како и одбивањето да се користат клучни резервни валути во меѓународните порамнувања, замрзнувањето на суверените фондови, трговските војни, неоколонијалните пристапи кон финансирање на развојот и спонзорирањето на „сателити“ преку меѓународните институции, „де факто ја укинаа глобализацијата“.
„Глобалната економија стана фрагментирана, а оние кои претходно се залагаа за отворени граници и отстранување на разни бариери се вратија на блоковски пристап“, заклучи таа.
Фото: принтскрин
Свет
Германија сака да ги подготви децата за војна преку училишна програма: „Тоа е разумна подготовка“
Германскиот сојузен министер за внатрешни работи Александар Добриндт (CSU) предложи учениците во училиштата систематски да се учат како да реагираат во кризни ситуации и во случај на војна. Тој планира да го презентира својот план во ноември на конференција на државните министри за внатрешни работи, а тој би вклучувал воведување на специјални двочасовни предавања.
„Важно е младите луѓе да разберат какви закани може да постојат и како да се подготват за нив. Децата се важни пренесувачи на знаење во семејството“, изјави Добриндт за весникот Ханделсблат, објави DW.
Остри реакции во Бундестагот
Предлогот предизвика жестоки реакции во германскиот парламент. Опозициската левица верува дека ова „шири страв кај децата и младите“, додека десничарската радикална Алтернатива за Германија (AfD) го обвини министерот за „подбуцнување војна“. Пратеникот на AfD, Готфрид Курио, тврди дека Добриндт сака „да ја направи војната неизбежен дел од секојдневниот живот“.
Од друга страна, Зелените веруваат дека идејата има смисла, но дека не е доволна. Нивниот претставник, Леон Екерт, предлага постојниот „Ден на предупредување“ да се прошири во национален ден за вежбање со цел практично да се подготват граѓаните за кризни ситуации.
Ова не е прв пат слична идеја да се дискутира во Германија. Уште за време на мандатот на претходната влада, тогашната министерка за образование Бетина Старк-Вацингер (ФДП) презентираше сличен предлог, осврнувајќи се на практиката во Велика Британија, каде што вежбите за вонредни ситуации се дел од училишната програма.
Добриндт, исто така, најави нов „пакт за заштита на населението“, кој би вклучувал подобрување на системот за предупредување, означување на заштитни зони и обезбедување основни потреби во вонредни околности.
„Нема ништо лошо во тоа секој да има основна залиха од храна, батерии и радио дома. Тоа не е паника, тоа е разумна подготовка“, рече Добриндт. Тој додаде дека интересот на граѓаните за прирачниците за цивилна заштита е голем, што покажува дека луѓето „сакаат да бидат подготвени“ во случај на криза.
Фото: принтскрин
Свет
Зеленски: Украина и нејзините сојузници ќе работат на план за прекин на огнот во наредните денови
Украина и нејзините сојузници се согласија да работат на план за прекин на огнот во следните десет дена, изјави претседателот Володимир Зеленски за „Аксиос“ по предлогот на американскиот претседател да се запре војната на сегашните граници.
„Неколку брзи точки како план за прекин на огнот. Одлучивме дека ќе работиме на тоа во следната недела или десет дена“, изјави украинскиот лидер за „Аксиос“ во интервју објавено во понеделникот.
Зеленски додаде дека Украина, за да изврши притисок врз Русија за разговори, бара од американската администрација не само ракети „томахавк“ туку и слични работи што не бараат долгорочна обука, пренесува „Ројтерс“.
Фото: принтскрин

