Русија продолжува да работи на нацрт-меморандум за принципите за евентуален мировен договор за завршување на војната во Украина, соопшти денес руското Министерство за надворешни работи.

Рускиот претседател Владимир Путин, по телефонскиот разговор со неговиот американски колега Доналд Трамп претходно овој месец, изјави дека Москва е подготвена да соработува со Украина на меморандум за иден мировен договор.

Путин рече дека меморандумот ќе ги дефинира принципите на можно решение, временската рамка за потенцијален мировен договор и деталите за евентуален прекин на огнот.

Портпаролката на Министерството за надворешни работи, Марија Захарова, изјави дека работата на рускиот нацрт-документ сè уште е во тек и дека документот ќе ѝ биде предаден на Украина кога ќе биде готов.

„Русија продолжува да развива нацрт-меморандум за иден мировен договор, кој дефинира голем број позиции, како што се принципите на решавање, временската рамка за можен мировен договор и евентуален прекин на огнот за одреден временски период доколку се постигне соодветен договор“, рече таа.

Министерството за одбрана на Холандија објави дека последните 24 борбени авиони Ф-16 се испорачани во Украина, со што е завршена испораката на овој вид воена помош од страна на Холандија.

Последните холандски авиони Ф-16 наменети за Украина ја напуштија воздухопловната база Волкел на југот на Холандија во понеделник и се упатија кон Белгија, каде што ќе бидат технички подготвени за конечна испорака. На испраќањето на авионите присуствуваше и претставник на холандското Министерство за одбрана, Рубен Брекелманс.

„Ф-16-се од клучно значење за Украина поради секојдневните руски воздушни напади. Тие ни овозможуваат да ја држиме руската агресија подалеку од нас“, рече Брекелманс.

Покрај испораката на авионите, Холандија помага во одржувањето на нивната борбена готовност и учествува во организирањето на обука на пилоти во Европскиот центар за обука за летање (EFTC) во Романија.

Украина ја прими првата пратка холандски авиони Ф-16 во октомври 2024 година, а втората во февруари 2025 година. Претседателот Володимир Зеленски во март објави дека пристигнала уште една пратка од Холандија.

Украинскиот претседател Володимир Зеленски ја обвини Русија дека планира нова офанзива. „Нема знаци дека рускиот претседател Владимир Путин сериозно размислува за дипломатско решение“, рече Зеленски во своето вечерно видео обраќање.

„Од информациите добиени од разузнавачките служби, можеме да видиме дека Путин и неговата придружба не планираат да ја завршат војната. Напротив, постојат изобилство докази дека тие подготвуваат нови офанзивни операции“, рече тој.

Зеленски истакна дека ова го покажува презирот на Москва кон сите оние што се обидуваат да постигнат мир, што веројатно се однесува на американскиот претседател Доналд Трамп, кој откако ја презеде функцијата во јануари се претстави како посредник за мирно решавање на конфликтот.

„Големите напади на руските сили врз украинските градови со балистички и крстосувачки ракети и повеќе од 900 дронови во текот на изминатите три дена беа воено бесмислени“, додаде Зеленски. Тој предупреди дека ова само предизвикува уништување и го повтори повикот за зголемен притисок врз Москва со дополнителни санкции.