Свет
Владата на Велика Британија воведува строги мерки: два часа дневно за децата на „Tик-ток“

Владата на Велика Британија планира да воведе ограничувања за користење на социјалните медиуми од страна на децата во обид да го намали она што го нарекува прекумерно време пред екран. Министерот за технологија Питер Кајл изјави за Sky News дека е загрижен за тоа колку време децата поминуваат на апликациите, како и за содржината со која се среќаваат таму секој ден.
По разговорот со поранешни и сегашни вработени во технолошките компании, се разгледува воведувањето на ограничување од два часа по социјална мрежа. Се разгледуваат и ноќни забрани, како и забрана за време на училишните часови. Планот е целосно да се блокира пристапот на децата до апликации како „Tик-ток“ или „Snapchat“ откако ќе го достигнат зададениот лимит, наместо само да се предупредуваат за предолго скролање.
Официјалното објавување на новите мерки се очекува на есен.
„Наскоро ќе дадам повеќе детали, но многу внимателно го разгледуваме вкупното време што децата го поминуваат на апликациите“, рече Кајл. „Многу родители се чувствуваат немоќни и не знаат како да обезбедат поздрава дигитална средина за своите деца. Некои деца самите чувствуваат дека се зависни од социјалните медиуми и им е потребна помош за да ја вратат контролата врз нивниот онлајн живот.“
Министерот нагласи дека принципите на здраво детство во реалниот живот треба да се пренесат во дигиталниот простор.
„Се зборува многу за здраво детство офлајн, но истото важи и за она онлајн. Сонот е клучен, како и можноста за концентрирање на учењето“, рече Кајл, додавајќи дека сака да ги спречи децата да консумираат часови содржина што, иако не е нелегална, „не е здрава“.
Изјавите на министерот доаѓаат по анкета спроведена на 1.000 деца во Дарлингтон, претежно на возраст од 14 и 15 години. Резултатите покажаа дека 40% од децата поминуваат најмалку шест часа на ден онлајн, додека едно од пет поминува до осум часа. Повеќе од половина од оние под 16 години (55%) виделе несоодветна сексуална или насилна содржина, честопати без да ја побараат. Три четвртини од нив биле контактирани од непознати.
Некои тинејџери признаа дека поминуваат до 16 часа на ден онлајн.
Технологијата за спроведување на вакви ограничувања веќе постои. Во Обединетото Кралство наскоро ќе стапат во сила правила што ќе бараат од порнографските веб-страници строго да ја потврдат возраста на корисниците. Ова би можело да вклучува проверка на кредитни картички, лични карти или користење на вештачка интелигенција за проценка на возраста. Истите методи веројатно би се користеле за ограничување на пристапот до социјалните медиуми ноќе или за време на училишните часови.
Сепак, постојат голем број предизвици. Главните се загриженоста за приватноста и проблемите со ефикасноста. Технолошките компании би морале да собираат уште повеќе лични податоци, а тинејџерите би можеле брзо да научат како да ги заобиколат системите. Но, експертите велат дека вештачката интелигенција учи брзо и наскоро би можела сигурно да ги разликува децата од возрасните, дури и во возрасната група под 18 години.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Кремљ негира вмешаност во инцидентот со ГПС со авионот на Урсула фон дер Лајен во Бугарија

Портпаролот на Кремљ, Дмитриј Песков, ги отфрли тврдењата дека Русија се мешала во услугата на Глобалниот систем за позиционирање (ГПС) во времето кога авионот на претседателката на Европската комисија, Урсула фон дер Лајен, требаше да слета во градот Пловдив, Бугарија.
„Вашите информации се лажни“, изјави Песков за „Фајненшл тајмс“, кој прв ја објави веста.
Претходно денес, британскиот весник „Фајненшл тајмс“ напиша дека наводното руско мешање довело до прекини во ГПС навигацијата на авионот за време на приближувањето кон аеродромот.
Портпаролката на Европската комисија, Аријана Подеста, изјави дека инцидентот со летот на претседателката Урсула фон дер Лајен за Бугарија ја истакнал важноста на нејзината мисија во земјите-членки на првата линија.
Таа потврди дека, според информациите добиени од бугарската влада, наводниот руски напад врз Фон дер Лајен за време на нејзиниот лет во неделата ги оневозможил ГПС навигациските услуги на аеродромот Пловдив, принудувајќи го авионот да слета.
Регион
(Видео) Костадинов од Бугарија нападнал автомобил мислејќи дека во него е Урсула фон дер Лајен

Во неделата, додека претседателката на Европската комисија, Урсула фон дер Лајен, престојуваше во посета на фабриката за оружје во бугарскиот град Сопот, лидерот на националистичката партија „Преродба“, Костадин Костадинов, бил снимен како блокира влез на автомобилот за кој демонстрантите верувале дека се наоѓа таа внатре.
Според извештаите, Костадинов, кој претходно повикувал Бугарија да излезе од НАТО, организирал демонстрации со друга националистичка партија пред фабриката „Вазов“, противејќи се на европскиот пат на Бугарија и барајќи заштита на националниот суверенитет.
На видеото објавено на социјалните мрежи се гледа како демонстрантите со бугарски и руски знамиња го опкружуваат автомобилот, кој потоа почнува да се движи, но е неколку пати удрен со транспарент. Костадинов се расправа со полицијата, додека демонстрантите продолжуваат да го блокираат возилото со повици „нацисти“ и свирежи.
Не е јасно дали претседателката била во автомобилот за време на инцидентот. Костадинов подоцна тврдел дека фон дер Лајен во фабриката во Сопот пристигнала со хеликоптер, а не со автомобил.
Партијата „Преродба“ редовно организира протести против ЕУ и бара Бугарија да излезе од Унијата, а нејзините приврзаници претходно ја вандализирале и делегацијата на ЕУ во Софија, фрлајќи црвена боја и обидувајќи се да запалат врати, пренесе „Б92“.
Претходно беше објавено и дека авионот во кој претседателката на Европската комисија леташе за Бугарија остана без ГСП-навигација и мораше да слета со помош на хартиени мапи. Тројца службеници запознаени со инцидентот изјавија за „Фајненшл тајмс“ дека се сомневаат во руско попречување.
Свет
Германскиот министер контра Фон дер Лајен: Фундаментално е погрешно да се зборува сега за распоредувањето сили во Украина

Германскиот министер за одбрана, Борис Писториус, денес ја критикуваше претседателката на Европската комисија, Урсула фон дер Лајен, поради јавно претставените планови за испраќање мултинационални сили во Украина како дел од долгорочни безбедносни гаранции.
Писториус изјави дека е „фундаментално погрешно“ да се разговара за такви опции пред мировните преговори.
„Европската Унија нема никаква одговорност ниту надлежност кога станува збор за распоредување на сили. Би се воздржал од потврдување или коментирање на такви размислувања на било кој начин“, рече министерот пред новинарите во објект на одбранбената индустрија во западногерманскиот град Тројсдорф.
Тој потврди дека владите размислуваат што би било можно „под кои услови и ограничувања“.
„Но мислам дека е целосно погрешно јавно да се дискутира за тоа во овој момент“, додаде Писториус.
Во интервју за „Фајненшл тајмс“, фон дер Лајен изјави дека Европа прави „доволно прецизни планови“ за распоредување на мултинационални сили во Украина.
Претседателката на Комисијата рече дека плановите би можеле да вклучат десетици илјади војници од европските земји, со поддршка од САД во области како разузнавање и командување.
Фон дер Лајен нагласи дека силните гаранции се „од најголема важност“ за заштита на Украина од идни руски напади и за зачувување на безбедноста на цела Европа.
Таа исто така ја поздрави подготвеноста на американскиот претседател Доналд Трамп да обезбеди она што го опиша како „безбедносна гаранција слична на член 5“ за Киев.
Идејата за стационирање на западни сили во Украина предизвикува длабоки поделби. Франција и Велика Британија разговараат за ова прашање, САД и земјите членки на НАТО, како Полска, ја исклучија можноста за испраќање трупи, додека некои земји се уште не се одлучни.