Свет
Владата на Мадуро повикува на смиреност откако земјата повторно остана без струја

Владата на Николас Мадуро повика на смиреност откако милиони Венецуелци повторно останаа без електрична енергија.
Во телевизиска емисија доцна во понеделникот министерот за комуникации, Хорхе Родригез, тврдеше дека прекинот на електрична енергија е резултат на „брутален“ напад врз една хидроцентрала.
Ситуацијата, која сè уште не беше разрешена во вторникот наутро, се случи две недели откако практично целата земја беше парализирана од шестдневниот прекин на електрична енергија.
„Сакаме да ги замолиме луѓето од Венецуела да ни помогнат во овој процес на закрепнување, продолжувајќи да ги покажуваат истите смиреност и сила што ги покажавме во последниве денови, бидејќи ќе успееме да победиме во оваа војна за електрична енергија што се води против луѓето од Венецуела“, рече Родригез.
Претходно, неговата сестра Делис Родригез, која е потпретседател на државата, ја обвини „фашистичката десница“ на Венецуела и нејзините „империјални господари“ во Вашингтон, дека предизвикуваат уште еден голем прекин на електричната енергија.
Ниту еден од нив не понуди докази дека „антимадуро саботерите“ стојат зад прекинот. Многу луѓе се сомневаат дека истиот се должи на распаѓањето на инфраструктурата предизвикана од години корупција, неспособност и недоволно инвестирање.
Други, пак, се убедени во точноста на тврдењата на владата дека прекините се дел од американскиот заговор за дестабилизација на земјата и соборување на Мадуро.
„Доналд Трамп нема да стапне во нашата земја. Ова е слободна и суверена нација“, рече Таис Коа, 56-годишна директорка на едно училиште кое беше затворено поради прекин на електричната енергија.
На еден неодамнешен промадуро митинг во Каракас, историчарот Хозе Коредор тврдеше дека прекинот на електрична енергија е „масло“ на опозицијата и Белата куќа со цел да се предизвика хаос што ќе им овозможи да ја преземат власта, а со тоа и природните ресурси на Венецуела.
„САД сакаат да владеат со светот“, рече тој.
Политичарите од опозицијата, пак, рекоа дека инцидентот од понеделникот е дополнителен доказ дека наследникот на Хуго Чавез треба да си даде оставка од функцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Мораме да ги натераме да се плашат од нас“: Макрон за трговскиот договор меѓу САД и ЕУ

Францускиот претседател Емануел Макрон денес изјави дека Европската Унија не успеала да го искористи својот огромен единствен пазар и доволно да ги исплаши САД за да прифатат подобар договор од оној постигнат во неделата.
„Мораме да ги натераме да се плашат од нас“, им рече Макрон на министрите на денешниот состанок, изјави француски функционер близок до претседателот за „Политико“.
Макрон беше забележливо тивок откако американскиот претседател Доналд Трамп и претседателката на Европската комисија, Урсула фон дер Лајен, постигнаа договор, според кој ЕУ ќе плаќа царини од 15 проценти за поголемиот дел од својот извоз во САД, анализира медиумот.
Денес, тој го критикуваше договорот, но со многу поблаг тон од премиерот Франсоа Баиру, кој рече дека тоа е „црн ден за Европа“.
Денес, претседателот на Франција истакна дека верува оти сè уште има време договорот да се подобри и рече: „приказната не е завршена, нема да застанеме тука“.
Францускиот министер за трговија Лоран Сен Мартен и министерот за Европа, Бенџамин Хадад, ја повикаа Европската комисија да престане да го користи таканаречениот инструмент против принуда, алатка дизајнирана да одговори на економскиот притисок што му дава на Брисел моќ да го ограничи пристапот на американските компании до јавни набавки, странски директни инвестиции и финансиски пазари во ЕУ.
Брисел, пак, ги обвини сите критичари дека одлучиле да „играат квотербек“ кога сè беше договорено и тврди дека овој договор е најдобриот што можеле да го добијат и дека претставува значително подобрување во однос на царините од 30 проценти со кои се закани администрацијата на Трамп.
Фото: принтскрин
Свет
Претседателката на Молдавија: Русија од есен сака да ја контролира нашата држава

Претседателката на Молдавија, Маја Санду денес ги прогласи корупцијата и нелегалното финансирање од Русија за најголема закана за парламентарните избори што се одржуваат на 28 септември во таа источноевропска земја.
„Руската Федерација сака да ја контролира Република Молдавија од есен па натаму и подготвува невидено влијание врз изборите во септември“, рече молдавската претседателка на прес-конференција во Кишињев.
Кремљ ги отфрли тврдењата дека Русија се мешала во изборниот процес на земјата со два и пол милиони жители.
„Најголемата опасност од руско влијание врз нашите внатрешни работи е тоа што претставува директна закана за националната безбедност, суверенитетот и европската иднина на нашата земја“, рече Санду.
Кишињев тврди дека Русија ќе дејствува преку поткуп на гласачи, кибернапади, платени протести и дезинформации. „Финансирање вредно околу 100 милиони евра е планирано само преку криптовалути“, рече Санду, без да даде докази за тврдењето.
Регион
Украинско комбе се судри со руски камион во Словенија, петмина загинати

На автопатот кој ги поврзува Марибор и Љубљана, во близина на излезот Словенска Коњица, во правец на Љубљана, се случи тешка сообраќајна несреќа во која загинаа пет лица, а две се повредени. Несреќата се случила кога патничко комбе удрилo во камион. Сите жртви биле странски државјани, соопшти словенечката полиција, јавуваат медиумите во регионот.
Според досега утврденото, возачот на комбе со украински регистарски таблички, кое превезувало седум лица, поради несоодветна брзина, удрил во задниот дел од приколка која стоела во ред поради работи на автопат. Пет лица загинале во комбето на местото на несреќата.
Возачот, кој ја предизвикал несреќата, е полесно повреден, додека патничка е тешко повредена. Двајцата повредени се пренесени во болница, а тешко повреденото лице е пренесено со хеликоптер. Идентитетот на загинатите сè уште се утврдува.
Возачот на камионот, руски државјанин, не е повреден, но му е понудена психолошка помош поради сериозноста на несреќата, објавува Радиотелевизија Словенија. Несреќата се случила непосредно пред одморилиштето Тепање, на дел од автопатот каде што се во тек големи работи – се реновираат 13 километри пат, два тунела и три вијадукти. Полицијата потврди дека несреќата се случила пред работната зона каде што се формираат долги редици поради затворени ленти.
Фото: принтскрин