Наредби за евакуација се во сила во делови од американската сојузна држава Калифорнија во очекување на големо невреме, а гувернерот Гевин Њусом прогласи вонредна состојба, пренесува АП.

Регионот, кој во минатото беше погоден од шумски пожари, е меѓу првите места на кои им е наредена евакуација поради загриженоста од поплави и лизгање на земјиштето.

Невремето се очекува да донесе до 152 милиметра дожд во делови од заливот Сан Франциско, каде што предупредувањето за поплави ќе важи во текот на денот.

Во јужна Калифорнија невремето се очекува да го достигне врвот во текот на ноќта и денеска, а најсилните врнежи ќе бидат во окрузите Санта Барбара и Вентура, соопштија синоптичарите.

Гувернерот на американската сојузна држава Калифорнија прогласи вонредна состојба поради невремето, втора што ја погоди државата за една недела.

„Очекуваме дека ова може да биде една од најпредизвикувачките и највлијателни серии на бури што ја погодија Калифорнија во последните пет години“, рече Ненси Вард, директорка на Канцеларијата за итни служби на гувернерот на Калифорнија.

Градоначалникот на Сан Франциско, Лондон Брид, на прес-конференција објави дека градот „се подготвува за војна“.

Екипите ги расчистуваат затнатите канали и се обидуваат да ги префрлат бездомниците во засолништата и да дистрибуираат итни резерви на оние што одбиле да се евакуираат.

Синоптичарите велат дека циклонот, тип на бура што бргу се засилува, се формира и ќе биде опасен за луѓето.

Се очекува најтешко да биде погодена северна Калифорнија.