Украинските и американските тимови одржуваат уште една рунда разговори во Ријад за да разговараат за прекин на огнот во Црното Море и 30-дневен прекин на нападите врз енергетската инфраструктура, изјави за „Блумберг“ лице запознаено со разговорите.

Американска делегација разговараше со руските колеги во понеделникот повеќе од 12 часа за истите прашања по состанокот со Украинците во неделата, според американскиот медиум.

Украинскиот претседател Володимир Зеленски во синоќешното обраќање до јавноста најави дека делегациите од Украина и САД треба да се сретнат денеска во Саудиска Арабија откако претходниот ден се одржаа разговори меѓу руски и американски претставници за ограничен прекин на огнот во Црното Море.

Разговорите во Саудиска Арабија во понеделникот меѓу руски и американски претставници се сметаа за чекор во напорите на американскиот претседател Доналд Трамп да стави крај на тригодишната војна, објави „Ројтерс“.

Унгарскиот министер за надворешни работи Петер Сијарто изјави дека ако претседателот на Соединетите Американски Држави, Доналд Трамп, не може да донесе мир во Украина, никој не може.

„Унгарија многу ја цени посветеноста на новиот американски претседател за мир. Ако Трамп не може да постигне мир во Украина, никој не може. Целосно ги поддржуваме напорите на Трамп“, рече Сијарто синоќа по средбата со вршителот на должноста на американската амбасада во Будимпешта, Роберт Паладин.

Како што наведе тој, безобразно е тоа што Брисел го попречува успехот на овие потфати, пренесе МТИ.

Сијарто исто така рече дека разговорот со Паладин бил одличен и додаде дека односите меѓу Унгарија и САД се проткаени со заемно почитување.

Полицијата уапси 43 демонстранти во центарот на Истанбул, објави турскиот министер за внатрешни работи, Али Јерликаја, на социјалните мрежи.

Во понеделникот вечерта повторно се одржа митинг на опозицијата на плоштадот Сарачане во близина на градското собрание, на кој присуствуваа неколку илјади луѓе, пренесува „РИА новости“.

Помали групи демонстранти се обидоа да одржат демонстрации и во други делови на Истанбул, соопшти агенцијата.

Политичката криза во Турција се продлабочува. Илјадници граѓани со денови протестираат на улиците на градовите во земјата поради апсењето на Екрем Имамоглу, сега веќе поранешен градоначалник на Истанбул и главен политички ривал на актуелниот претседател Реџеп Таип Ердоган.

Истовремено, опозициската партија на Имамоглу, Републиканската народна партија, го номинира за кандидат на изборите за претседател. Новиот претседател на државата ќе биде избран во 2028 година.