Свет
Во Газа бомбардиран магацин за хуманитарна помош на палестинската Црвена полумесечина

Турската Црвена полумесечина соопшти дека магацинот за хуманитарна помош на палестинската Црвена полумесечина во Газа станал неупотреблив поради силните бомбардирања, јавува „Anadolu“.
Во соопштението од турската Црвена полумесечина се наведува дека добиле информации и снимки кои покажуваат дека магацинот за хуманитарна помош на палестинската Црвена полумесечина е тешко оштетен и станал неупотреблив.
Магацинот претходно беше изграден со поддршка на турската Црвена полумесечина.
„Станува збор за магацинот на палестинската Црвена полумесечина, со која соработуваме во активностите за хуманитарна помош. Ние немаме сопствен магацин на Црвената полумесечина на Турција во Газа“, се наведува во соопштението.
„Силно го осудуваме секој напад врз работниците и објектите на хуманитарната помош, вклучително и вработените во палестинската Црвена полумесечина и волонтерите кои очајнички работат на обезбедување хуманитарни потреби во многу тешки услови“, се додава.
Турската Агенција за управување со катастрофи и вонредни состојби (АФАД) се огласи поради тврдењата дека наводната зграда во Газа што ја користи АФАД е тешко оштетена.
Израелската војска ги прошири воздушните и копнените напади врз Појасот Газа, кој е под воздушни напади по ненадејната офанзива на палестинската група Хамас на 7 октомври. Повеќе од 1.538 Израелци се убиени во нападите на Хамас.
Министерството за здравство во Газа во понеделникот објави дека 8.306 Палестинци загинале во израелското бомбардирање во Појасот Газа. Меѓу загинатите има 3.457 деца и 2.136 жени, додека повеќе од 21.048 луѓе се повредени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.