Свет
(Во живо) Прва приватна вселенска прошетка – историска мисија на „Спејс икс“
Мисијата Polaris Dawn на „Спејс икс“ ги лансира американскиот милијардер Џаред Исакман и уште тројца астронаути во орбитатата со цел за време на петдневен лет да ја извршат првата приватна обиколка во вселената. Командант на мисијата е самиот Исакман, пилотот е пензионираниот потполковник на американските воздухопловни сили, Скот (Кид) Потет, специјалист за мисијата е Сара Гилис, шеф на вселенските операции на „Спејс икс“ за обука на астронаути, а медицинскиот службеник е Ана Менон.
Тоа е првиот од трите вселенски летови на програмата „Поларис“ и вториот што Исакман лично го финансира. „Спејс икс“ го ажурира времето на вселенската прошетка и објави дека ќе се одржи денес во 11.58 часот. Во случај на непредвидени тешкотии, прошетката може да се одложи за петок, 13 септември. Вселенската прошетка, која ќе ја водат Џаред Исакман и Сара Гилис, може да се следи во живо.
Историската вселенска прошетка, односно периодот што екипажот ќе го помине во вакуум, треба да трае два часа. Кога ќе дојде време сите четворица астронаути во мисијата Polaris Dawn ќе облечат вселенски костими и потоа ќе ја депресурираат капсулата „Драгон“ за да може Исакман и Гилис да излезат надвор од отворот, пишува „Спејс.ком“.
Двајца членови на екипажот ќе излезат од капсулата околу 15-20 минути и ќе останат делумно надвор од отворот за да ги тестираат костимите ЕВА (вселенски) дизајнирани и развиени од „Спејс икс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Татко и син од Хрватска со автомобил удриле во камион во Италија, и двајцата загинаа
Две лица од околината на Крижевци загинаа во тешка сообраќајна несреќа што се случи утринава, нешто пред 5.15 часот, на автопатот на северот на Италија.
Како што неофицијално дознава „Подравски.хр“, загинале двајца мажи, татко и син на 40 и 65 години, а несреќата се случила помеѓу Сан Џорџо ди Ногара и Латисана во правец кон Венеција.
Италијанските медиуми пишуваат дека до судирот дошло кога автомобил на лентата за престигнување силно се залетал и удрил во камионот што се движел пред него.
„Според првите информации, двете возила се движеле во иста насока, на средната лента за престигнување, во моментот на несреќата сообраќајот се одвивал нормално. Од засега неутврдени причини патничкото возило удрило во задниот дел од камионот што се движел пред него“, опишале тие. Италијанците додале дека пожарникарите ги извлекле Хрватите од автомобилот и дека ги реанимирале, но повредите биле претешки.
На местото на несреќата пристигнаа сообраќајна полиција, пожарникари, хеликоптерска брза помош, итната медицинска помош и работници на автопатот.
Свет
Поранешната шефица во Мосад: Нападот со пејџери и воки-токи беше совршено извршен
Нападот врз оперативците на Хезболах со помош на пејџери успеа совршено, рече Сима Шајн, поранешен шеф на истражување и анализа на израелската разузнавачка агенција Мосад.
Шајн за „Скај њуз“ изјави дека детонацијата на пејџерот била „комбинација од три елементи, кои функционирале совршено“. Тие елементи, според неа, се „разузнавањето, технологијата и оперативните способности“. „Комбинацијата на тие три фактори ја направи оваа операција успешна“. Таа тврди дека операцијата била „насочена кон оперативци на Хезболах, а не кон цивили“.
„Мислам дека кога ќе го видите големиот број повредени, ќе сфатите дека операцијата била многу прецизна и дека целта била само оперативци на Хезболах, а не цивили. Жал ми е за она што се случи во двата случаја на смрт на деца, но тоа не беше целта“.
Главната причина за нападот беше да се осигури дека голем број членови на Хезболах „нема да може да учествуваат во борбата и ќе бидат зафатени во помагањето на повредените“, додаде таа.
Таа иницира и големо прашање зошто е повреден иранскиот амбасадор. „Се поставува прашањето зошто амбасадорот на една земја е вклучен во мрежата на терористичка организација во Либан“, заклучи таа.
Европа
Французинот што донел 50 мажи да ја силуваат сопругата; еден од нив призна: Не се согласи, жал ми е
Еден од 50-те мажи обвинети за силување на Французинката Жизел Пелико во случајот за масовно силување денеска пред судот ѝ кажа дека му е жал за тоа што го направил.
Лионел Родригез е еден од малиот број обвинети што признаа дека ја силувал Пелико, која била малтретирана од десетици непознати во текот на речиси една деценија додека била во несвест, дрогирана од сопругот Доминик, без нејзино знаење.
Доминик Пелико, кој поканувал непознати мажи преку интернет во семејната куќа за да ја силуваат неговата сопруга, во понеделникот пред судот ги призна своите злосторства. „Јас сум силувач, исто како и другите (обвинети) во оваа соба“, рече тој.
Родригез, 44-годишен татко на три деца, во четвртокот ѝ се извини на 72-годишната жртва. „Извинете, не можам да го замислам кошмарот низ кој сте поминале… И јас сум дел од него. Знам дека моето извинување нема да го промени она што се случи, но сакав да ви кажам“, рече тој.
Случајот предизвика протести во Франција за поддршка на Жизел Пелико, која побара судењето да не се одржува зад затворени врати за да се открие злоупотребата.
Родригез во текот на истрагата признал дека ја силувал Жизел Пелико. На суд денеска повтори дека немал намера да ја силува, но сфаќа дека ја силувал.
„Да знаев дека не е свесна, немаше да го сторам тоа. Не разговарав со неа, па не можев да добијам нејзина согласност. Се чувствувам виновен за она што го направив“, рекол тој.
Родригез исто така се обиде да префрли дел од вината на Доминик Пелико велејќи му на судот дека го направил она што му рекол нејзиниот сопруг.