Свет
Во Кина прогласен најголемиот карантин во историјата
Кинеските власти во средата прогласија најголем карантин во историјата за да спречат ширење на новиот корона вирус за кој во моментот нема лек или вакцина.
Властите воведоа ограничувања за патувањата во и надвор од дури три големи града – Хуанганг, Ежоу и Вухан, во кои вкупно живеат 20 милиони луѓе.
Правилата стапија во сила утрово, а со нив најпрвин беа прекинати железничките линии и авионските летови во и од 11-милионскиот Вухан, најголемиот град во централна Кина, кој се смета за жариште на ифекцијата. Властите исто така го стопираа јавниот превоз во градот – автобусите, подземната железница и траектите. Покрај тоа, наредено е сите пешаци на улиците да носат заштитни маски.
Властите уште во средата во 10 часот по локално време почнале да ги спроведуваат мерките. До средата напладне сообраќајот со автомобили сè уште бил дозволен, меѓутоа, по ова, почнало затворањето на автопатиштата кон Вухан. Во средата исто така беше објавено дека здравствените власти ќе им ја мерат температурата на сите што влегуваат и излегуваат од градот.
Голем број Кинези на социјалните мрежи, вклучувајќи и блогери, вчера тврдеа дека мерката е премногу задоцнета и дека се прекриваат вистинските размери на епидемијата поради што некои побараа оставка од градоначалникот на Вухан, Жоу Ксијанванг. Болеста во меѓувреме се прошири речиси во сите кинески провинции вклучувајќи го и Хонгконг.
Вирусот во средата беше потврден во шест земји надвор од Кина.
Најголемиот карантин во историјата е воведен во Кина кога бројот на заболени и смртни случаи во еден ден, од вторникот до средата, практично се удвои – од 270 првично заболени бројката скокна на 570, а бројот на починати се зголеми од 9 на 17. До утрово бројот на смртни случаи се искачи на најмалку 25.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Тинејџер загина во Будва, со „ситроен“ излетал од патот со двајца патници
Тинејџерот Лазар Ф. (15) загина во неделата во тешка сообраќајна несреќа што се случила во Будва кога автомобилот што го управувал излетал од патот.
Во незгодата се повредени две лица, од кои едното е полнолетно – Ј. М., а другиот е малолетник – М.М.
Повредените веднаш биле префрлени во болницата во Котор.
Во полициското соопштение се наведува дека несреќата се случила во близина на стадионот, кај плажата Јаз, и се додава дека возилото удрило во дрво.
Тинејџерот управувал автомобил „ситроен“ со будвански регистарски таблички.
Свет
Ерменскиот премиер: Војната може да почне до крајот на неделата
Доколку Ереван не ги исполни барањата на Баку за враќање на пограничните села на Азербејџан, кои Ерменија ги смета за своја територија, може да избие војна, изјави ерменскиот премиер Никол Пашинјан.
„Нашата задача е да имаме граница која ќе стане бариера од меѓународна гледна точка и де јуре, а пукањето на оваа граница нема да биде прифатено, ќе изградиме патишта, ќе им обезбедиме на жителите на пограничните села се што им треба. Онаму каде што е потребно, ќе платиме дополнителен надомест. Но, сакам да опишам друго сценарио. Можеме да заминеме одовде, да заминеме и да кажеме различни работи. Тоа значи дека до крајот на неделата ќе започне војната“, посочи Пашинјан.
Тој додаде дека дури знае како ќе заврши таквата војна, односно дека ќе го пречекаат на Плоштадот на Републиката во Ереван, каде граѓаните ќе му замеруваат за неговата неактивност, иако ги имал потребните информации, пренесува РИА Новости.
Прес-службата на вицепремиерот на Азербејџан Шахин Мустафаев на 9 март објави дека Баку бара ослободување на селата за кои тврди дека биле окупирани од Ерменија, како дел од процесот на демаркација.
Истовремено, азербејџанската страна не ги признава извештаите кои кружат во ерменските медиуми дека наводно 31 село се под окупација на Азербејџан.
Ерменските власти забележаа дека при демаркацијата ќе биде неопходно да се земе предвид постоењето на конкретни територијални ентитети, имено ерменската енклава Арцвашен на територијата на Азербејџан и азербејџанската енклава во Ерменија.
Пашинјан смета дека овој предлог на Баку е неприфатлив поради патиштата кои минуваат низ ерменската енклава и го поврзуваат Ереван со Иран и Грузија.
Азербејџанскиот претседател Илхам Алиев изјави во декември 2023 година дека азербејџанската страна не сака војна со Ерменија, а целосната контрола над азербејџанската територија е суверено право на Баку.
Коментирајќи ја изјавата на Пашинјан, портпаролката на Министерството за надворешни работи, Марија Захарова, на каналот Телеграм напиша дека моменталната ситуација е резултат на консултациите на Ереван со Западот и на никаков начин не е поврзана со Русија.
Свет
Вонредна состојба во регион во Русија, поради несреќа во рудник, затрупани 13 лица
Во Амурската област на рускиот далечен исток воведена е вонредна состојба поради инцидентот во рудникот за злато „Пионир“ во областа Зеја, каде што 13 лица останаа заробени под урнатините поради пад на карпа, соопштија од тој регион.
„Во Амурската област е воведена регионална вонредна состојба поради инцидентот во рудникот ‘Пионир’ во областа Зеја, со цел да се мобилизираат сите сили и ресурси. Оваа одлука е донесена на вонредна седница што ја одржа регионалниот гувернер“, се вели во соопштението на локалната самоуправа.
Претставник на службата за вонредни состојби за „РИА новости“ изјави дека во рудникот во моментот на уривањето имало 13 лица. Групата спасувачи, главно од Руската Република Јакутија, се состои од 25 вработени, а со нив пристигнале и четири парчиња опрема.
Покрај тоа, хеликоптерот „ми-8“ на руското Министерство за вонредни ситуации полета од територијата Хабаровск до местото на несреќата, пренесува „Интерфакс“. Од оперативните служби за „Интерфакс“ велат дека, според првичните информации, луѓето се на длабочина од 100 до 150 метри, а засега нема информации за можни жртви.