Малезиската полиција уапсила четврто лице осомничено за убиството на 40-годишниот Ким Џонг-нам, полубратот на северноорејскиот комунистички диктатор Ким Џунг-ун, и според локалните медиуми станува збор за 47-годишен државјанин на Северна Кореја.

Според малезиските медиуми, полицијата во петокот вечерта по локално време во главниот град Куала Лумпур уапсила маж кој наводно е поврзан со убиството на Ким Џонг-нам, кој е на 47-годишна возраст. Во моментот на апсењето кај него е пронајден пасош на Северна Кореја, а сега се проверува неговата валидност. Се истакнува дека во пасошот на приведениот маж имало штембили дека повеќепати престојувал во Малезија.

Полицијата прецизира во соопштение дека осомничениот е идентификуван како Ри Џонг-чол, роден на 6-ти мај 1970 година. „Осомничениот е вмешан во убиството на северноорејскиот маж“, се наведува во соопштението.

Покрај тоа, весникот China Press пишува дека полицијата распространила до сите полициски станици фотографии на четворица мажи, осомничени за убиството, по кои е распишана потерница.

Претходно беше објавено дека полицијата уапсила две жени за убиството на Ким Џонг-нам, кој некогаш беше сметан за можен лидер на Северна Кореја, 29-годишна државјанка на Виетнам и 25-годишна државјанка на Индонезија, а потоа и 26-годишен државјанин на Малезија, кој бил во врска со Индонезијката.

Ким Џонг-нам почина оваа седмица по напад на меѓународниот аеродром во Куала Лумпур, за кој е сомнева дека било труење со отров со брзо дејство. Јужнокорејските и американските функционери соопштија дека го убиле агенти на Северна Кореја.

Според различните верзии, Кин Џонг-нам може да е прободен со отровни игли со кои во него е инјектирана токсична супстанција или му е ставено на лицето многу отровна материја со некој тампон. Јужнокорејските медиуми повикувајќи се на експерти, наведуваат дека нападот најверојатно е изведен со високо токсичниот нервно парализирачки агенс VX. Засега нема официјален заклучок за причината за смртта.

Северна Кореја соопшти во саботата дека категорично ќе ги отфрли резултатите од обдукцијата во Малезија и ја обвини оваа земја за „заговор со надворешни сили“, притоа алудирајќи на Јужна Кореја. Пјонгјанг во петокот вечерта побара телото на Ким Џонг-нам веднаш да биде предадено, а претходно се обидуваше да ги увери малезиските власти да не ја направат обдукцијата.

„Малезиската страна ја изведе обдукцијата без наша дозвола и присуство“, изјави за новинарите севернокорејскиот амбасадор Канг Чол пред болницата во којашто се наоѓа телот на Кон Џонг-нам.

Ким Џонг-нам, наводно бегал од Северна Кореја и се сокрил во Малезија, откако неговиот брат го ликвидираше нивниот чичко Јанг Сонг-таек, откако јавно ја критикувал династијата поради контролите врз животите на граѓаните кои ги води во изолираната нуклеарно вооружена комунистичка земја.

Станува збор за најстариот син на Ким Џонг-ил, поранешниот севернокорејски водач, кој преживеа обид за атентат во Макао веднаш по починувањето на неговиот татко. Неговата мајка е познатата севернокорејска актерка Сонг Хе-рим. Мајка на актуелниот севернокорејски диктатор, пак, е севернокорејската актерка и танчарка од јапонско потекло Ко Јонг Хуи.

Додека своевремено го сметаа за наследник на неговиот татко на чело на комунистичка Северна Кореја, тој Ким Џонг-нам падна во немилост на тамошните власи и политичка елита откако во 2001 година се обиде да влезе во Јапонија со фалсификуван пасош, придружуван од две жени и дете. Оттогаш живее во странство, најчесто во Макао./крај/мф/сн