Резултатите од обдукцијата над телото на полубратот на севернокорејскиот водач може да бидат објавени најрано во среда, соопшти министерството за здравство на Малезија во понеделникот.

„Станува збор за вообичаен период потребен да се изврши обдукција и да се добијат резултат“, изјави малезискиот министер за здравство Субрананјам Саташивам пред новинарите како одговор на прашањето кога ќе бидат објавени наодите.

Малезиските власти им дадоа на најблиските роднини на жртвата Ким Џонг-нам две седмици да се јават за да помогнат во истрагата,

Северна Кореја настојуваше да ја спречи Малезија, барем самостојно да ја изврши обдукцијата, и бараше телото на најстариот син на покојниот водач Ким Џонг-ил да му биде предадено на Пјонгјанг.

Малезиското министерство за надворешни работи го повика севернокорејскиот амбасадор во понеделникот, поради неговите обвинувања за начинот на кој Малезија ја спроведува истрагата.

Министерството соопшти дека севернокорејскиот амбасадор Канг Чол е повикан за да ги „објасни обвинувањата коишто ги изрече против малезиската влада на прес-конференцијата на 17-ти февруари“. Се додава дека тогаш амбасадорот „инсистирал дека … малезиската влада ‘нешто крие’. Амбасадорот, исто така, ја обвини Малезија дека е во ‘заговор со галерија странски сили““, се додава.

Малезија, покрај тоа, го повикала својот амбасадор во Пјонгјанг поради „консултации“, соопшти министерството за надворешни работи.

Ким Џонг-нам почина на 13-ти февруари откако беше нападнат на меѓународниот аеродром во Куала Лумпур, од каде што чекал лет за Макао каде што повеќе години живее се семејството.

Јужнокорејски и американски функционери тврдат дека е нападнат од севернокорејски агенти, и дека во нападот е користен отров со брзо делување.

Тројца од четворица државјани на Северна Кореја за кои малезиските власти се сомневаат дека се поврзани со нападот, наводно одлетале од Џакарта во Дубаи истата вечер кога е извршен смртоносниот напад. Тие се идентификувани како Ри Џае-нам, Хонг Сонг-хак и Ри Џи-хјон, соопшти портпаролот на индонезискиот оддел за имиграција за Reuters. Во неделата беше објавено дека е осомничен и четврти маж, но за него деталите не се објавени.

Малезиската полиција во неделата соопшти дека четворица Севернокорејци осомничени за убиството одлетале од Малезија по нападот од 13-ти февруари. Малезискиот дневен весник The Star објави дека тие требало да се вратат во Пјонгјанг, преку Џакарта, Дуба и Владивосток.

Според малезиските медиуми, полицијата во петокот вечерта по локално време во главниот град Куала Лумпур уапсила маж кој наводно е поврзан со убиството на Ким Џонг-нам, кој е на 47-годишна возраст. Во моментот на апсењето кај него е пронајден пасош на Северна Кореја, а сега се проверува неговата валидност. Се истакнува дека во пасошот на приведениот маж имало штембили дека повеќепати престојувал во Малезија. Полицијата прецизира во соопштение дека осомничениот е идентификуван како Ри Џонг-чол, роден на 6-ти мај 1970 година. „Осомничениот е вмешан во убиството на северноорејскиот маж“, беше наведено во соопштението.

Покрај тоа, весникот China Press пишува дека полицијата распространила до сите полициски станици фотографии на четворица мажи, осомничени за убиството, по кои е распишана потерница.

Претходно беше објавено дека полицијата уапсила две жени за убиството на Ким Џонг-нам, кој некогаш беше сметан за можен лидер на Северна Кореја, 29-годишна државјанка на Виетнам и 25-годишна државјанка на Индонезија, а потоа и 26-годишен државјанин на Малезија, кој бил во врска со Индонезијката./крај/мф/сн