Свет
Во стан на Американка пронајдени смрзнати тела на четири бебиња, нема да и се суди

Мајката на четири бебиња пронајдени во замрзнувач во стан во Бостон пред повеќе од една година нема да одговара. Последниот извештај покажува дека се уште има „многу неодговорени прашања“ за тоа што се случило со бебињата, пренесува Си-би-ес.
Окружниот обвинител на округот Сафолк рече дека не верува дека случајот против Алексис Алдамир може да оди на судење. Братот на Алдамир и неговата сопруга повикале полиција откако ги пронашле „замрзнатите“ бебиња на 17 ноември 2022 година, додека го чистеле станот во кој Алдамир живеела од 1982 година.
Истрагата покажала дека Алдамир е мајка на бебињата, две момчиња и две девојчиња, пронајдени во замрзнувачот. Алдамир сега живее во здравствена установа. Инспекторите тврдат дека за време на сослушувањето таа „изгледала збунето и не разбирала каде е и со кого разговара“.
Лекарот не можеше да утврди дали бебињата се родени живи или колку долго биле замрзнати, се вели во извештајот. Причината за смртта беше наведена како „неодредена“. Во извештајот се вели дека нема знаци на траума или очигледни повреди, а нема знаци на храна или млеко во стомакот на бебињата.
На сите четири бебиња сè уште им била прикачена папочната врвца. Бебињата биле пронајдени во кутии за чевли и биле завиткани во фолија. ДНК тестот го идентификуваше таткото на четирите деца, но тој починал во 2011 година. Инспекторите рекоа дека тој и Алдамир имале уште едно дете заедно, кое го дале на посвојување.
Алдамир работела за сметководствена фирма во Бостон од 1980 до октомври 2021 година, се вели во извештајот. Нејзините колеги ја опишаа пред инспекторите како „вредна работничка која ретко одела на одмор“.
„Тие рекоа и дека е покрупна жена која има склоност да носи широка облека без оглед на сезоната. Во ниту еден момент ниту еден од соработниците на Алдамир не знаел дека е бремена“, се вели во извештајот.
Окружниот обвинител на округот Сафолк, Кевин Хејден, ја нарече истрагата „една од најкомплексните, невообичаените и најзбунувачките што ги сретнал неговата канцеларија“. Објаснувајќи ја одлуката да не се обвини Алдамир, во извештајот се вели дека обвинителите не можеле да докажат дека бебињата биле живи и не верувале дека Алдамир е способна да издржи судење.
„Никогаш нема да знаеме точно каде и кога се родени четирите бебиња пронајдени во станот на Алексис Алдамир. Никогаш нема да знаеме дали четирите бебиња се родени живи, и никогаш нема да знаеме точно што се случило со нив. Никогаш нема да знаеме како Алексис Алдамир ја криела бременоста или зошто одбра да го направи тоа“, заклучи Хејден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел тврди дека бродот со активистите и Грета Тунберг нема да стигне до Газа

Израелскиот министер за одбрана Израел Кац денес изјави дека ќе го спречи бродот со хуманитарна помош што ги носи Грета Тунберг и други активисти да стигне до Појасот Газа и со тоа ќе ја прекине поморската блокада на палестинската територија, која наводно има за цел да го спречи Хамас да се здобие со оружје.
Тунберг, активистка за климатски промени, е меѓу 12-те активисти, вклучувајќи го и актерот од „Игра на тронови“, Лиам Канигкем, кои се наоѓаат на бродот, чија цел е да се стави крај на блокадата на Газа и да се достави хуманитарна помош, а воедно да се подигне свеста за растечката хуманитарна криза.
Активистите изјавија дека планираат да стигнат до Газа уште денес.
Рима Хасан, француска европратеничка од палестинско потекло, исто така е дел од тимот. Нејзе ѝ беше забранет влезот во Израел поради нејзиното противење на политиката на Израел кон Палестинците. По тримесечна целосна блокада, Израел минатиот месец почна да дозволува основна помош во Газа, но хуманитарните работници предупредија на глад доколку блокадата и војната не се прекинат.
Минатиот месец, обидот на друг брод од истата организација да стигне до Газа не успеа, откако бродот беше нападнат од беспилотни летала додека пловеше во меѓународни води крај Малта. Групата го обвини Израел за нападот, во кој беше оштетен предниот дел на бродот.
Свет
Повеќе од 60 лица повредени во руски напад врз Украина

Најмалку четири лица се убиени, а повеќе од 60 се ранети, вклучувајќи и едно бебе, во еден од најсилните руски напади врз источниот украински град досега, а според украинските власти, руската армија извршила стотици напади врз населени места во Запорожјето во изминатите 24 часа.
Според украинските сили, само до девет часот утрово биле неутрализирани 40 руски беспилотни летала во источниот, јужниот, северниот и централниот дел од земјата, пренесува Укринформ.
Во исто време, руското Министерство за одбрана објави дека силите за воздушна одбрана уништиле околу 60 украински беспилотни летала над осум региони во Русија во текот на изминатата ноќ.
Девет дронови беа соборени над Москва, објави градоначалникот на руската престолнина, Сергеј Собјанин.
Свет
Ирачанец со автомобил удри во група луѓе во Германија – повредени пет лица

Полицијата претпоставува дека мажот кој вчера со автомобил удрил во група луѓе во градот Пасау на југот на Германија, повредувајќи пет лица, вклучувајќи ја и сопругата и нивното петгодишно дете, најверојатно бил вмешан во правна битка за старателство над детето.
„Во текот на кривичната истрага постојат индиции дека можната битка за старателство била причина за инцидентот“, соопшти полицијата.
Парот и детето живееле во областа на Пасау. Мажот, 48-годишен државјанин на Ирак, е уапсен и се наоѓа на сослушување.
Денеска треба да му биде определен притвор. Истрагата ја презеде криминалистичката полиција заедно со јавниот обвинител на Пасау. Според досегашните сознанија, мажот се товари за обид за убиство.
Сопругата и ќерката, заедно со уште тројца повредени, се пренесени во болница. Ниту едно од повредените лица не е во животна опасност, потврди портпаролот на полицијата.