Свет
Во Шангај рекорден број заразени, се’ повеќе кинески градови воведуваат мерки
Рекорден број на луѓе заразени со Ковид-19 беа регистрирани денеска во Шангај, а другите кинески градови воведоа ограничувања според методот „брзо чистење“ што го користи земјата за елиминирање на заразната варијанта на омикрон.
Во северозападна Кина, во градот Ксиан, поради десетици случаи на зараза со Ковид-19, жителите во петокот беа предупредени да избегнуваат непотребни излези надвор од станбените комплекси, а компаниите се охрабруваат да воведат работа од дома или работниците да живеат во работното место.
Владиниот функционер од Ксиан денеска им кажа на жителите кои стравуваат од недостиг на храна дека во соопштението не се споменува заклучување и дека градот нема да го воведе.
Шангај – ново кинеско жариште
Шангај, новото кинеско жариште, денеска објави рекорден број на симптоматски случаи на инфекција, 3.590 и уште 19.923 асимптоматски случаи.
Бројот на заразени без симптоми незначително се зголеми во однос на претходниот ден кога имаше 19.872. Вкупниот број на луѓе заразени во тој град го сочинува најголемиот дел од вкупните случаи низ Кина, иако повеќето од 25-те милиони жители на Шангај се во карантин.
Ограничувањата кои остануваат на сила или се прошируваат дополнително ги влошуваат нарушувањата во снабдувањето и тоа може да предизвика одложување на испораката до компании како Apple. Економистите исто така тврдат дека ограничувањата негативно ќе се одразат на економскиот раст на земјата оваа година.
Градот Сужоу во близина на Шангај денеска ги повика сите работници кои можат да работат од дома да го направат тоа, а станбените населби и работничките населби треба да избегнуваат непотребен влез на луѓе и возила. Во тој град во последниот бран се забележани 500 случаи на зараза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Американците понудиле безбедносни гаранции за Украина, Зеленски не е задоволен
САД му понудија на Киев 15-годишни безбедносни гаранции, но Украина сака повеќе и смета на период од најмалку 30 години, изјави украинскиот претседател Володимир Зеленски на маргините на Минхенската безбедносна конференција.
Според него, Украина работи со сите партнери за безбедносни гаранции.
„Општо земено, ние сме блиску до тој проект. Имавме средба со американски сенатори. Рековме дека навистина сакаме да ги продолжиме безбедносните гаранции, за да бидат поефикасни за инвеститорите на кои им се потребни гаранции повеќе од пет до десет години“, рече Зеленски, пренесоа украински медиуми.
Тој додаде дека американската страна синоќапредложила гаранции од 15 години, додека Украина сака да додаде 20 години на тоа, за периодот да биде помеѓу 30 и 50 години.
„Зависи од тоа што ќе одлучат администрацијата и Конгресот, ќе видиме“, рече Зеленски.
Свет
Зеленски очекува корисна следна рунда мировни преговори
Претседателот на Украина, Володимир Зеленски, денеска во Минхен изјави дека очекува следната рунда мировни преговори да биде сериозна, суштинска и корисна. Сепак, тој додаде дека понекогаш се чини како „страните да зборуваат за сосема различни работи“.
Нова рунда разговори меѓу претставниците на Русија и Украина, со посредство на САД, ќе се одржи во Женева во вторник и среда.
Зборувајќи на Минхенската безбедносна конференција, Зеленски рече дека клучниот фокус во мировните преговори е да се обезбеди дека „за четири години, цивилизираниот свет нема да биде принуден повторно да се оправдува, да ја префрла одговорноста и да бара некој друг да го обвини“ за уште една војна.
„Украина е подготвена за договор што ќе ни донесе вистински мир нам, на Украина и на Европа“, додаде тој и изјави дека Европа „практично не е присутна на преговарачката маса“, но треба да биде.
„Тоа е голема грешка“, рече тој.
Зеленски истакна дека би било илузија да се верува дека оваа војна сега може сигурно да се заврши со поделба на Украина. Тој повтори дека на Русија „не смее да ѝ се даде никаква надеж дека може да остане неказнета за ова злосторство“.
Тој вели дека Москва била најсериозна во врска со преговорите кога била погодена од длабоки украински напади на сопствената територија.
„Колку сме посилни, толку пореален станува мирот“, рече тој.
Свет
Грчките земјоделците го завршија протестот во Атина
Со сирени и свирење, исто како што и пристигнаа, тракторите на грчките земјоделци претпладнево си заминаа од Атина, откако во текот на ноќта останаа паркирани пред грчкиот Парламент. Околу 50 трактори вчера пристигнаа во Атина, поминаа низ низа централни улици, каде што беа пречекани и поздравени од граѓаните и случајните минувачи, а на ист начин си заминаа денеска.
Во текот на вечерта тракторите останаа паркирани на плоштадот Синтагма пред Парламентот, откако претходно, протестот заврши мирно, а свои обраќања имаа земјоделци од различни делови на земјата, пренесувајќи ги нивните ставови и барања поврзани со примарниот сектор.

