Украинскиот претседател Володимир Зеленски уште еднаш јавно му честиташе на Доналд Трамп за изборната победа, а потоа имаше и телефонски разговор со него.

„Тоа е навистина посебен ден, бидејќи една вест го привлекува глобалното внимание. Убедливиот резултат од изборите во САД. Јасното водство на претседателот Трамп. Му честитам на оваа победа“, рече украинскиот лидер.

Тој додава дека за него било „исклучително важно“ да ги слушне зборовите на Трамп „мир преку сила“, кои Трамп ги користел за време на неговото претходно претседателствување од 2016 до 2020 година. Зеленски смета дека „САД и целиот свет дефинитивно ќе имаат корист од оваа политика“.

„Не е случајно што сега толку често се споменува Роналд Реган – луѓето сакаат самодоверба, сакаат слобода, сакаат нормален живот“, додаде тој. Токму Реган го повторуваше мотото „мир преку сила“. Зеленски нагласи дека на Украина и треба „силна Америка“ и „силни сојузници“ воопшто.

„Имаме потенцијал за посилна соработка. Тоа е она што ќе ги направи Украина, Америка и целиот слободен свет поуспешни“, рече тој.

Зеленски набрзо на Х објави дека разговарал со Доналд Трамп по телефон и лично му честитал за победата. „Имав одличен разговор со претседателот Доналд Трамп и му честитав за неговата историска убедлива победа“, напиша тој.

Тој тврди дека се договорил со Трамп за одржување близок дијалог и понатамошна соработка. „Силно и непоколебливо лидерство на САД е од суштинско значење за светот и за праведен мир“, рече тој.

Најмалку 89 лица се уште се водат како исчезнати по смртоносните поплави во југоисточна Шпанија, соопшти регионалната судска власт во Валенсија.

Во бројката се вклучени само оние чие исчезнување го пријавиле членовите на семејството. Семејствата дадоа лични податоци и биолошки примероци за да се овозможи идентификација на исчезнатите.

Сепак, може да има и други лица чие исчезнување не е пријавено или чии информации се уште не се дадени.

„Се уште има исчезнати лица кои треба да се најдат“, рече премиерот Педро Санчез на прес-конференција во Мадрид.

Пред една недела реките се излеаја по обилните дождови, а поројот однесе најмалку 217 животи. Форензичарите досега идентификувале 133 лица.

„Домовите и деловните објекти се уништени, затрупани под кал, а се уште има многу луѓе без потребната храна. Мораме да продолжиме да работиме“, рече Санчез.

Тој додаде дека Владата ќе одвои 10,6 милијарди евра за помош на настраданите.

Метеоролошката служба АЕМЕТ во вторникот извести дека „нестабилноста ќе се зголеми во медитеранската област и на Пиринеите во наредните денови“.

„Очекуваме обилни врнежи на Балеарските Острови, Каталонија и провинцијата Валенсија. Но, нема да има ни приближно толку дожд како минатата недела“, објави АЕМЕТ преку социјалната мрежа Икс.

Градоначалничката на Паипорта, град во Шпанија каде жителите фрлаа кал врз кралот и премиерот, нарекувајќи ги „убијци“, рече дека тоа е „крик на очај од луѓето напуштени“ во поплавите.

„Ја разбирам фрустрацијата и очајот на луѓето“, рече 45-годишната градоначалничка Марибел Албалат во телефонски разговор за јавната телевизија ТВЕ.

„Тоа беше крик на очај од напуштени луѓе“, додаде таа.

BREAKING: King of Spain attacked by angry people while visiting the disaster area in Valencia pic.twitter.com/fE8K1HQI12

— AlexandruC4 (@AlexandruC4) November 3, 2024

Паипорта се наоѓа на 7 километри југозападно од градот Валенсија. Тоа е најпогоденото место од поплавите во кои од вторникот вечерта загинаа најмалку 217 луѓе во југоисточна Шпанија.

„Повеќе од 70 луѓе загинаа во нашиот град. Но, тоа е информација од пред два дена, не добивме нови информации“, рече Албалат.

Таа рече дека знаела дека ќе има трагична несреќа штом реката почне да се излева во вторник навечер.