Свет
Во Јемен на секои 10 минути умира по едно дете

Фотографии од ужасот во Јемен го обиколија светот. Војната беснее, а милиони луѓе умираат од глад и болести. Околу 14 милиони луѓе се на работ на глад, а за 22 милиони е неопходна хуманитарна помош. Најмногу страдаат најмалите. Над 85.000 деца помлади од пет години умреле од неухранетост, за време на тригодишната војна. Во Јемен, според податоците на Уницеф, на секои десет минути умира по едно дете.
Во болницата Ел Шаба, за која велат дека е најдобрата детска болница во Сана, на секој кревет лежат по четири деца.
Сите кои ќе ги доведат своите деца се исплашени и нетрпеливи.
На одделението за интензивна нега се наоѓаат деца кои боледуваат од неухранетост, менингитис, колера, туберкулоза и воспаление на белите дробови. Тоа се смртоносни болести во оваа земја, бидејќи нема лекови, а нема ни храна.
Тринаесетгодишно девојче, кое со родителите избегала од војната, боледува од туберкулоза и има само 16 килограми. Како што пренесуваат медиумите, таа вели дека нема пари, ниту лекови, а дека многу ја болат стопалата.
Во Јемен е уништена инфраструктурата, водоводната мрежа и канализацијата, а поради ситуацијата во здравството, ОН ситуацијата во таа заливска земја ја прогласи за една од најлошите хуманитарни катастрофи на модерното време.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.