Свет
Германија ќе ја поддржи Украина во производството на ракети со долг дострел
Германија ќе ја поддржи Украина во производството на ракети со долг дострел, беше соопштено по средбата на германскиот канцелар Фридрих Мерц и украинскиот претседател Володимир Зеленски во Берлин.
„Сакаме да овозможиме оружје со долг дострел. Сакаме да овозможиме и заедничко производство“, рече германскиот канцелар Фридрих Мерц (Христијанско-демократската унија ЦДУ) на заедничката прес-конференција по средбата со украинскиот претседател во Берлин.
Мерц конкретно не ги спомна испораките на германските крстосувачки ракети Таурус, но спомна заедничко производство на соодветно оружје.
„Министрите за одбрана на Германија и Украина, Борис Писториус и Рустем Умеров наскоро ќе потпишат писмо за намери“, рече Мерц.
Нагласи дека станува збор за производство на ракети без ограничување на дострелот, кои Украина ќе може да ги користи против воени цели лоцирани далеку од нејзината територија.
„Во моментов не можеме да откриеме повеќе детали, но можете да тргнете од фактот дека руското отфрлање на примирјето и водење преговори сега ќе имаат последици“, рече Мерц, додавајќи дека тоа е „нова форма на воено-индустриска соработка“.
„Ќе продолжиме да и помагаме на Украина и ќе ја прошириме таа помош“, рече Мерц.
Володимир Зеленски објасни дека станува збор за финансирање на постоечки воени проекти во самата Украина и соработка на ниво на воена индустрија.
Во исто време, украинскиот претседател изјави дека Украина „се уште се надева“ на испорака на крстаречки ракети со долг дострел од типот Таурус.
„Што се однесува до ракетите со долг дострел од Германија и производството на други земји, тие сè уште ни се потребни и секако дека ќе продолжиме да разговараме за ова прашање“, рече Зеленски.
Истовремено, тој нагласи дека Украина сака мир и дека за таа цел украинскиот министер за одбрана разговара со неговиот руски колега.
Германија веќе подолго време разговара за испорака на ракети Таурус во Украина. Поранешниот канцелар Олаф Шолц го одбил од страв да не ја вовлече Германија во војна.
Канцеларот Мерц по средбата со Володимир Зеленски најави и дека германските министри оваа година ќе одржат заеднички консултации со украинската влада.
Мерц рече дека Германија и Украина се зближиле од почетокот на целосната руска инвазија на Украина во 2022 година и дека германските и украинските власти тесно соработуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Фото) Филмски грабеж во Њујорк: се маскирале како работници и украле 3 милиони долари
Најмалку тројца мажи, од кои двајца биле маскирани како градежни работници, извршиле грабеж во Њујорк и избегале со сеф и накит во вредност од повеќе од 3 милиони долари. Филмскиот грабеж се случил сред бел ден, на 16 октомври, во населбата Јамајка Хилс во Квинс, а полицијата објави детали и снимки од надзорните камери овој вторник, пишува nbcnews.com.
Според соопштението на Полициската управа на Њујорк (NYPD), крадците насилно ја отвориле задната врата од куќата околу 14:20 часот. Откако влегле на локацијата, лицата извадиле сеф и накит, чија вредност се проценува на приближно 3,2 милиони долари. По кражбата, тие избегале со сино Хјундаи Елантра, кое е снимено со камери за надзор.
Истражителите објавија детални описи на тројцата мажи со надеж дека некој ќе ги препознае. Еден од мажите што влегол во домот носел црна маица, црни панталони, црни патики, неонски елек, бела кацига, заштита за очи и бил виден како носи црн ранец.
Другиот носел црна маица, црни панталони, сиви патики, неонска јакна, бела кацига, заштита за очи, црна маска за лице и носел црн ранец, соопшти полицијата.
Третиот осомничен, кој возел, носел бела маица со качулка, црни панталони, сиви патики и црни ракавици.
За среќа, никој не е повреден во грабежот, а потрагата по сторителите е во тек.
Регион
Сирија го призна Косово
Претседателката на Косово, Вјоса Османи, објави дека Сирија ја признала независноста на Република Косово, пренесува Анадолу.
Османи, која е во официјална посета на Ријад, изјави дека со поддршка на саудискиот престолонаследник Мохамед бин Салман, е постигнат договор со кој Сириската Арапска Република ја признава Република Косово.
Османи му се заблагодари на сирискиот претседател Ахмед ал-Шарија за одлуката за признавање на Косово, како и за неговата поддршка за Косово.
„Народот на Косово и Сирија многу страдаше и жртвуваше за да постигне слобода. Затоа, ова меѓусебно признавање денес не е само признавање на државниот суверенитет, туку и признание на жртвите на многу генерации за слободен живот“, рече Османи.
Таа, исто така, му се заблагодари на саудискиот престолонаследник „што го овозможи овој историски чин меѓу двете земји“. Со признавањето од Сирија, сега 120 земји ширум светот го признаа Косово.
Свет
Боинг ја одложува испораката на авиони, се соочува со казна од 5 милијарди долари
Авиокомпанијата Боинг објави дека производството на долгоочекуваниот авион 777X се одложува до 2027 година, што ќе ја чини дури 5 милијарди долари казни за доцнење на испораките. Причината се сè построгите регулаторни пречки што мора да ги надмине, пишува Би-Би-Си.
Одложувањето доаѓа во време на растечка побарувачка за меѓународни патувања, додека Боинг се обидува да го промовира својот најнов модел како наследник на легендарните 747 и 777. И покрај проблемите со довербата на компанијата по низа инциденти, вклучувајќи го и оној во кој вратата на авионот паднала од лет, Боинг соопшти дека приходите во трите месеци што завршија во септември се зголемиле за 30 проценти на 23,27 милијарди долари во споредба со истиот период минатата година.
Главниот извршен директор Кели Ортберг изјави дека компанијата работи на „враќање на довербата кај сите наши засегнати страни“.
Тој изрази разочарување поради доцнењето на 777X, но додаде дека авионот „се покажал добро на тестирањето во летот“. Тој нагласи дека Боинг работи на „стабилизирање на нашите операции за да можат перформансите на нашата компанија целосно да се опорават“.

