Свет
Германската министерка: Русите се обидуваат да ја дестабилизираат ЕУ со хибридна војна

Германската министерка за надворешни работи Аналена Баербок предупреди дека европските земји мора сериозно да ја сфатат заканата од хибридна војна што доаѓа од Русија, која на тој начин се обидува да ја дестабилизира Европската Унија.
„Има обиди да се дестабилизираат нашите демократии однатре“, рече Баербок за новинарите во Сараево, каде што беше во официјална посета. Таа го кажа тоа додека ја коментира последната криза во германско-руските односи, врз основа на обвинувањата на Москва дека високи германски воени офицери подготвувале војна против Русија кога разговарале за тоа како може да се урне мостот на Крим.
Ваквите тврдења од Москва следуваа по објавувањето на наводите за тајно прислушувани разговори на германски офицери.
Баербок потсети дека канцеларот Олаф Шолц и министерот за одбрана, Борис Писториус, веќе најавија брза и темелна истрага за овој случај, но таа посочи дека зад целата наводна афера стои обидот на Русија да го сврти вниманието од вистинската димензија на војната против Украина и нејзината цивилното население.
Хибридното војување, како што рече, е војна со наративи и замена на улогите на жртва и напаѓач.
„Тоа треба да се сфати многу сериозно“, рече Баербок.
Таа оцени дека затоа сајбер-безбедноста сега добила уште поголемо значење и неопходна е соработка на сите земји членки на ЕУ, но не само нив, бидејќи на такви закани се изложени и државите што не се членки на ЕУ, особено оние од Западен Балкан.
Таа потсети дека Албанија минатата година беше цел на огромен сајбер-напад, па веројатно таквите инциденти ќе се повторат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Јордан го затвора воздушниот простор по израелските напади врз Иран

Јордан привремено го затвора својот воздушен простор како превентивна мерка, по израелските напади врз Иран.
„Оваа превентивна мерка е преземена поради на воената ескалација во регионот“, објави Јорданската регулаторна комисија за цивилно воздухопловство (CARC), објави CNN.
Главниот комесар на CARC, Хајтам Мисто, рече дека одлуката е во согласност со меѓународните стандарди за цивилно воздухопловство и обврските за безбедност на летот, и дека привременото затворање ќе биде континуирано оценувано и преиспитувано.
И Израел и Иран привремено го затворија својот воздушен простор. Веб-страницата за следење на летови Flightradar24 покажува дека небото над двете земји било практично празно рано наутро во петок по локално време.
Израелската армија денес објави дека во текот на ноќта започнала напади врз неколку места во Иран, како и дека целите на нападите биле, меѓу другото, цели поврзани со нуклеарната програма.
Портпаролот на израелската војска денес изјави дека Иран лансирал повеќе од 100 беспилотни летала кон Израел во последните неколку часа, откако земјата вети одмазда за израелските напади, објави Sky News.
Свет
Израелската војска тврди дека Иран имал конкретен план да го уништи Израел

Израелските одбранбени сили (ИДФ) објавија дека Иран има „конкретен план за уништување на Израел“, кој, според израелски извори, бил наречен „План за уништување на Израел“.
Во соопштението се вели дека Иран, покрај напорите за развој на нуклеарно оружје, произведува десетици илјади ракети и беспилотни летала и подготвува „комбиниран копнен напад на повеќе фронтови истовремено“.
Израелските одбранбени сили тврдат дека анализата на огромните количини разузнавачки информации што ги собрале открила координација меѓу иранскиот режим и лидерите на Хамас и Хезболах, со цел вооружување на тие групи.
„Државата Израел немаше избор“, се вели во соопштението, додавајќи: „Израелските одбранбени сили се должни да дејствуваат во одбрана на израелските граѓани и ќе продолжат да го прават тоа“.
Израел изврши голем воздушен напад врз повеќе цели во Иран како дел од операцијата Rising Lion.
Свет
Авион на Ер Индија изврши принудно слетување по закана за бомба

Авион на Ер Индија што леташе од Пукет, Тајланд до индискиот главен град Њу Делхи, денес доби закана за бомба и изврши принудно слетување во Тајланд, соопштија властите на аеродромот во Пукет.
Патниците беа евакуирани од летот AI 379, во согласност со плановите за вонредни ситуации, соопшти официјален претставник на аеродромите на Тајланд.
Во авионот имало 156 патници, а заканата за бомба била примена во авионот, се вели во соопштението.
Авионот полетал од аеродромот Пукет кон индискиот главен град во 9:30 часот наутро во петокот, но направил широк круг над Андаманското Море и слетал назад на тајландскиот остров.