Свет
Германските претставници овој месец по втор пат дојдоа во Тајван поради конфликтот со Кина

Шест претставници на германскиот Бундестаг пристигнаа во Тајван, што е втора посета на германска парламентарна делегација овој месец, поради зголемените регионални тензии.
Делегацијата ја предводи членот на Либералната партија, Питер Хајд, и на островот во Јужното Кинеско Море ќе престојува до среда, а ја пречека заменик-министерот за надворешни работи Минг-Јен Цаи.
Владејачката коалиција, која се состои од социјалдемократи, зелени и либерали, вети дека ќе ги поддржи демократските земји, рече Хајд, додавајќи дека односите меѓу Тајван и Кина се најголемиот предизвик во тој дел од светот.
„Заканите испратени од Кина не треба да не спречат да дојдеме во Тајван и да го поддржиме како земја со која споделуваме вредности како слободата и демократијата. Секогаш ќе го правиме тоа“, изјави Хајд.
Тајван има своја независна влада од 1949 година. Меѓутоа, ако се праша Пекинг, Тајван е дел од Народна Република Кина, затоа најнаселената земја во светот се противи на какви било официјални контакти меѓу Тајван и други земји. На почетокот на овој месец, Тајван веќе беше посетен од група германски претставници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп разреши членка на одборот на Федералните резерви

Претседателот на САД, Доналд Трамп, објави дека ја разрешил членката на одборот на Федералните резерви, Лиза Кук, од функцијата, наведувајќи наводни неправилности поврзани со хипотекарните кредити.
Во писмо до Кук, кое го сподели на неговата мрежа Truth Social, Трамп напиша дека има „доволно причини да се верува“ дека гувернерката дала лажни изјави. Во 2021 година, Кук на документите за одделни хипотекарни кредити за имоти во Мичиген и Џорџија наведе дека и двете биле нејзини примарни резиденции.
Тој се повикува на закон од 1913 година. Според американскиот закон, претседателот може да ги разреши гувернерите на Федералните резерви само од основана причина, што ја зголемува можноста одлуката на Трамп да биде предмет на правни оспорувања. Трамп ги сигнализираше своите намери неколку дена претходно, велејќи им на новинарите: „Ќе ја отпуштам ако не поднесе оставка“.
Во писмото, Трамп ја обвини Кук за „измамничко и криминално однесување во финансиски прашања“ и нагласи дека нема доверба во нејзиниот „интегритет“.
„Најмалку, спорното однесување покажува еден вид небрежност во финансиските трансакции што ја доведува во прашање вашата компетентност и доверливост како финансиски регулатор“, рече тој, додавајќи дека имал овластување да ја отпушти Кук според Уставот на САД и Законот за Федералните резерви од 1913 година.
Кук одговори неколку часа подоцна во изјава испратена по е-пошта до новинарите, велејќи дека Трамп нема законски основи и овластување да ја отстрани од работното место на кое беше назначена во 2022 година од поранешниот американски претседател Џо Бајден.
„Ќе продолжам да ги извршувам моите должности за да ѝ помогнам на американската економија“, објави таа. Таа потврди дека ќе ја оспори одлуката на Трамп.
Трамп со месеци врши притисок врз Федералните резерви да ги намалат каматните стапки, барање кое централната банка не го исполни бидејќи креаторите на политиките остануваат загрижени за инфлацијата, делумно поттикната од увозните тарифи на Трамп.
Претходните повици на Трамп до претседателот на Федералните резерви, Џером Пауел, да поднесе оставка беа неуспешни.
Кук, економистка, се приклучи на одборот на гувернери на Федералните резерви во мај 2022 година. Нејзиниот мандат требаше да трае до 31 јануари 2038 година. Пред нејзиното назначување, таа беше професорка по економија и меѓународни односи на Државниот универзитет во Мичиген.
Свет
Русија сака да се повлече од конвенцијата за забрана на тортура

Рускиот премиер Михаил Мишустин вчера потпиша резолуција со која бара Москва да се повлече од Европската конвенција за спречување на тортура, пишува Kyiv Independent.
Иако Русија формално останува потписник на конвенцијата, воените злосторства и тортурата на Русија врз украински цивили и војници се документирани постојано, додава Kyiv Independent.
Резолуцијата го повикува рускиот претседател Владимир Путин да ја повлече Русија од деценискиот договор.
„До претседателот на Руската Федерација се поднесува предлог за раскинување на Европската конвенција за спречување на тортура и нечовечко или понижувачко постапување или казнување“, се наведува во текстот на резолуцијата.
Дејствијата на Русија на окупираните украински територии дополнително го потврдуваат нејзиното непочитување на меѓународните механизми за заштита, според украинските медиуми.
Свет
Австралија: Иран нарача најмалку два антисемитски напади во нашата земја

Австралија денес објави дека ќе го протера амбасадорот на Иран во Канбера, а премиерот Ентони Албанезе го обвини Техеран за извршување на два антисемитски напади во клучните градови Сиднеј и Мелбурн.
Од почетокот на војната меѓу Израел и Газа во октомври 2023 година, австралиските домови, училишта, синагоги и возила беа цел на антисемитски вандализам и палење, пишува „Ројтерс“.
„Австралиската безбедносна агенција собра веродостојни разузнавачки информации дека иранската влада наредила најмалку два напади“, изјави Албанезе на прес-конференција.
„Иран се обиде да го прикрие своето учество, но ASIO верува дека стои зад нападите врз „Луис Континентал Кујн“ во Сиднеј на 20 октомври минатата година и синагогата Адас Израел во Мелбурн на 6 декември“.
Австралиската безбедносно-разузнавачка организација додаде дека е веројатно дека Иран наредил дополнителни напади.
„Ова беа вонредни и опасни акти на агресија оркестрирани од странска држава на австралиска почва“, рече Албанезе. „Ова беа обиди за поткопување на социјалната кохезија и сеење раздор во нашата заедница“.
„Австралија ја суспендираше својата амбасада во Техеран и сите дипломати се безбедни во трета земја“, рече Албанезе, додавајќи дека неговата влада ќе ја прогласи Иранската револуционерна гарда за терористичка организација.