Свет
Гутереш: Ако Израел ги прекине врските со УНРВА, ќе мора сам да ги задоволи потребите на бегалците

Генералниот секретар на Обединетите нации, Антонио Гутереш изјави дека доколку Израел почне да спроведува нови закони со кои се прекинуваат врските со Агенцијата на ОН за палестински бегалци (УНРВА), според меѓународното право, ќе мора да ги задоволи потребите на бегалците. Во писмото испратено до израелскиот премиер Бенјамин Нетанјаху, до кое дојде агенцијата АП, Гутереш наведува дека нема алтернатива за агенцијата УНРВА.
Тој во писмото посочува како што пренесува агенцијата, дека УНРВА била спас за време на војната меѓу Израел и Хамас во Газа и дека новиот закон на Израел „ќе има катастрофални последици за палестинските бегалци“ во Газа, Западниот Брег и Источен Ерусалим.
Тој нагласи дека Израел, како окупаторска сила, според меѓународното хуманитарно право, треба да обезбеди задоволување на потребите на Палестинците, вклучувајќи храна, здравствена заштита и образование. Тој додаде дека доколку Израел не е во позиција да ги задоволи овие потреби, тогаш има обврска да дозволи и да ги олесни активностите на ОН во таа област.
„УНРВА е главното средство со кое се обезбедува помош за палестинските бегалци“, рече Гутереш.
Гутереш рече дека доколку активностите на УНРВА бидат ограничени или запрени, Израел ќе мора да го пополни вакуумот „за да се осигура дека потребите на населението се задоволени“. Агенцијата на ОН за деца, здравје и миграција, исто така, нагласи дека УНРВА е „рбетот“ на операциите на меѓународната организација во Газа, каде луѓето се потпираа на помошта во храна и здравствените центри кои доаѓаа преку УНРВА за време на повеќе од една година војна, во која загинаа илјадници луѓе, а голем дел од енклавата остана во урнатини.
Портпаролот на ОН Стефан Дужарик рече дека ОН се охрабрени од изјавите за поддршка на УНРВА кои доаѓаат од сите страни. Израелскиот парламент во понеделникот го одобри законот со кој се забранува агенцијата на Обединетите нации за палестинските бегалци да работи во Израел поради обвинувањата дека УНРВА има блиски врски со членовите на Хамас и дека некои од 13.000 вработени на УНРВА во Газа учествувале во нападите на Хамас на 7 октомври 2023 година што ја предизвика војната, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белорусија испраќа рекордни количини бензин во Русија

Белорускиот железнички извоз на бензин во Русија се зголеми за четири пати во септември во однос на претходниот месец, бидејќи Москва се справува со недостиг на гориво предизвикан од украинските напади врз нејзината енергетска инфраструктура, објавија извори од индустријата синоќа, објави „Ројтерс“.
Неколку руски региони беа принудени да воведат мерки за штедење и привремено да ги замрзнат цените на горивата во последните недели. Причината е недостигот на популарни видови бензин предизвикан од напади со беспилотни летала насочени кон рафинерии и други енергетски објекти.
Како одговор, Москва, исто така, го ограничи извозот на бензин и дизел. Ова не е првпат Русија да се потпира на соседна Белорусија, таа, исто така, го зголеми увозот на гориво минатата година за да го покрие недостигот на пазарот.
Според извори, пратките на бензин со железница од белоруските рафинерии до рускиот домашен пазар минатиот месец достигнаа 49.000 метрички тони, што е еквивалентно на 14.500 барели дневно. Заедно со бензинот, испораките на дизел во септември изнесуваа 33.000 тони.
Свет
Киев бесен на Меркел: „Зборовите на поранешната канцеларка се неприфатливи“

Киев остро реагираше на тврдењата на поранешната германска канцеларка Ангела Меркел дека Полска и балтичките земји ги саботирале обидите за решавање на украинскиот конфликт во 2021 година, што, како што изјави таа, индиректно придонело за почетокот на „Новата светска војна“, објавува Политико.
Меркел во интервју изјави дека Франција и Германија потоа предложиле воспоставување нов формат за преговори со Русија, кој би ги заменил договорите од Минск, но Варшава и балтичките престолнини одбиле да ја поддржат иницијативата.
Таа проценка предизвика негодување во Киев, каде што висок украински функционер, според Политико, рекол дека зборовите на поранешната канцеларка се „неприфатливи и, искрено, одвратни“.
Во истото интервју, поранешната германска канцеларка, исто така, оцени дека обвинувањето дека унгарскиот премиер Виктор Орбан е „тројански коњ“ на рускиот претседател Владимир Путин во рамките на Европската Унија е „глупост“, посочувајќи на потребата да се запрат меѓусебните обвинувања во рамките на ЕУ и да се обнови дипломатскиот дијалог.
Фото: принтскрин
Свет
Светската здравствена организација тестира смртоносен сируп против кашлица

Светската здравствена организација (СЗО) побара информации од Индија за тоа дали сирупот против кашлица поврзан со смртни случаи кај деца во земјата е извезен во други земји, соопшти денес агенцијата.
СЗО изјави за Ројтерс дека ќе разгледа издавање глобално предупредување за медицински производ во врска со сирупот Колдриф откако ќе добие официјални информации од Њу Делхи, објави Ројтерс.
Според информациите од локалните власти, најмалку 17 деца под петгодишна возраст починале во текот на изминатиот месец откако консумирале сируп што содржел високи концентрации на токсичното соединение диетилен гликол, речиси 500 пати над законската граница.
Фото: принтскрин