Свет
Гутереш: Затворањето на африканските граници поради омикрон е неправедно
Генералниот секретар на ООН, Антонио Гутереш, рече дека затворањето на границите поради новиот сој на коронавирус омикрон е многу неправедно, казнено и неефикасно, нарекувајќи го еден вид на форма на апартхејд кон Африка.
„Со вирус кој не познава граници, ограничувањата за патување што изолираат една земја или регион не само што се длабоко неправедни и казнени, туку се и неефикасни“, им рече тој на новинарите, додавајќи дека смета дека е скандалозно да се осуди Африка затоа што има ниска стапка на вакцинација.
Шефот на ОН рече дека земјите не треба да бидат колективно казнети за споделување клучни научни и епидемиолошки информации со светот.
Тоа е неправедно и неморално, повтори тој.
„Затоа, упатувам силен апел, апел до разумот. Имаме инструменти за безбедно патување. Ги користиме тие инструменти за да избегнеме таков вид апартхејд, што го сметам за неприфатливо“, нагласи Гутереш.
„Африка нема доволно вакцини за своето население, ги нема потребните финансиски средства за закрепнување на економијата, ги трпи најтешките последици од климатските промени, иако не придонесе за тоа и ги нема потребните ресурси за да изгради отпорност“, изјави генералниот секретар на ОН.
Застанувајќи покрај него, претседателот на Комисијата на Африканската унија, Муса Факи Махамат, исто така, го осуди стигматизирањето, нагласувајќи дека помалку од 6 отсто од Африканците се вакцинирани, повикувајќи на меѓународна солидарност.
„Ги повикувам владите да претпочитаат да ги земат предвид тестовите за патници, како и други соодветни и навистина ефективни мерки“, додаде Гутереш.
Новиот сој на коронавирус, наречен омикрон, веќе е откриен на сите континенти, но Европа се чини дека е најтешко погодена и почна, како и другите земји, да ги заострува мерките и да воведува гранични контроли и да ги забранува патувањата од Јужна Африка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.