Димна бомба е фрлена на седницата на Уставниот комитет на Парламентот на Црна Гора.

Ова уследи откако потпретседателот на Комитетот и пратеник на Демократската партија на социјалистите, Нермин Абдиќ изјави дека тој и неговите колеги нема да дозволат седницата да продолжи, пренесе „Вијести“.

И покрај фрлањето димна бомба, седницата продолжи и беа донесени заклучоци да се објави оглас за избор на двајца судии на Уставниот суд избрани од Собранието и да се разговара со претседателот на Црна Гора, Јаков Милатовиќ, за тој да објави оглас за избор на уште двајца судии на Уставниот суд за кои одговара, пренесува медиумот.

Не се знае кој ја активирал димната бомба, а на видеото се гледа дека во делот од салата каде седат дел од пратениците на ДПС почнал да излегува чад. Во еден момент пратеникот на таа партија Абаз Диздаревиќ зел запалена димна бомба и ја ставил на масата.

На дневен ред на седницата беше „разгледување на прашања поврзани со објавувањето на јавен повик за избор на судии на Уставниот суд на Црна Гора“.

Претседателката на Европската комисија Урсула фон дер Лајен објави дека Турција ќе добие уште една милијарда евра оваа година за помош на сириските бегалци во Турција.

„Оваа сума треба да се додаде на речиси 10 милијарди евра што Анкара веќе ги доби од 2011 година за да им помогне на луѓето кои бегаат од режимот на сирискиот претседател Башар ал Асад, кој сега е соборен“, рече фон дер Лајен.

„Речиси три милиони сириски бегалци живеат во Турција, а повеќе од еден милион добија азил во Европската унија.

Новите пари треба да се искористат за здравство и образование, но и за управување со границите и финансирање на доброволното враќање на бегалците“, додаде таа.

„Едно е јасно, сите враќања мора да бидат доброволни, безбедни и достоинствени. Работиме со УНХЦР за да се осигураме дека се исполнети сите неопходни услови“, заклучи Урсула фон дер Лајен, зборувајќи заедно со турскиот претседател Реџеп Таип Ердоган во Анкара.

Ердоган истакна дека долгорочната и сеопфатна помош на ЕУ, вклучително и инвестициите во основната инфраструктура во Сирија, е клучна за да им се овозможи на Сиријците да се вратат во својата татковина.

По средбата, и Ердоган и Фон дер Лајен ја истакнаа потребата од постигнување стабилност и зачувување на единството на Сирија, при што таа рече дека Турција има клучна улога во рехабилитацијата на регионот.

Унгарија и Словачка ги блокираа плановите на Европската Унија да ја санкционира Грузија поради насилство врз проевропските демонстранти и опозициските лидери, објави утринава германската новинска агенција ДПА.

Унгарскиот министер за надворешни работи, Петер Сијарто, ја оправда одлуката на неговата земја во понеделникот по состанокот на ЕУ во Брисел тврдејќи дека Унијата ја зазема страната на демонстрантите и дека Грузија била цел само затоа што на изборите победила патриотска и конзервативна партија наместо либералните сили.

Планот на ЕУ беше да воведе забрана за влез во ЕУ на неколку функционери одговорни за полициското насилство и да ги замрзне сите средства што тие можеби ги имаат во ЕУ. Сепак, тоа овој пат не успеа.

Сепак, планот за укинување на безвизниот режим за Грузијците со дипломатски пасоши или за луѓето што работат за владата во странство сè уште е на маса. Планот е ова да се предложи на крајот на годината, изјави еврокомесарот за надворешна политика и безбедност, Каја Калас. За ова би било доволно само мнозинство гласови од земјите членки, а не едногласна согласност како во случајот со санкциите.

Огромното мнозинство од членките на ЕУ веруваат дека грузиските власти неодамна користеа незаконско насилство и произволни апсења против демонстрантите и лидерите на опозицијата.

Противставувањето на Унгарија и Словачка на санкциите дојде откога Литванија најави проширување на санкциите на уште 17 лица, кои ги смета за одговорни за насилството.

Литванија исто така го стави грузискиот премиер Иракли Кобахидзе на листата на санкционирани лица, на кои, како и другите на списокот, му е забранет влез во Литванија. Естонија претходно додаде 14 дополнителни грузиски политичари на својот список.

Австрискиот министер за надворешни работи, Александар Шаленберг, повика да не се уништуваат сите мостови кон Грузија.

„Би сметал дека е геостратешка грешка да се оттргне оваа земја во овој момент“, рече Шаленберг додавајќи дека е неопходно да се одржи дијалогот и дека мнозинството Грузијци сè уште сакаат да ѝ се приклучат на Унијата.

Тој исто така јасно стави до знаење дека Австрија не е склона да го следи примерот на Литванија и Естонија во воведувањето санкции на премиерот Кобахидзе и другите водечки политичари.

Протестите во Грузија избија по наводните нерегуларности на неодамнешните парламентарни избори и одлуката на владејачката партија Грузиски сон да го суспендира процесот на пристапување во ЕУ на четири години.