Свет
Демонстранти со вили протестираа пред имотите на богатите на Хемптонс
Караван од демонстранти, од кои дел со вили во рацете, протестираа во средата на Хемптонс за да ги критикуваат богатите и да ја осудат нееднаквоста на приходите во нацијата, пренесува „Пејџ сикс“.
Повеќе од 100 возачи и околу 200 пешаци ги посетија домовите на дел од најбогатите луѓе во светот, вклучувајќи го и поранешниот градоначалник на Њујорк, Мајк Блумберг.
„Оданочете ги богатите, а не сиромашните!“, извикуваа демонстрантите пред палатата на Блумберг вредна 20 милиони американски долари во Саутхемптон, а некои го нарекоа неуспешниот претседателски кандидат „ограбувач“.
Демонстрантите, од кои дел дојдоа од Њујорк, побараа од њујоршкиот гувернер Ендрју Куомо да ги зголеми даноците на 118 милијардери за државата да надомести за големиот пад на приходите, во екот на пандемијата на коронавирус.
Групата ја осуди идејата на Куомо да намали 20 отсто од државните средства наменети за училиштата, болниците и за агенциите за домување. Тие посочија дека иако избувнувањето на пандемијата има големо влијание врз сиромашните заедници, богатството на американските милијардери се зголемило.
„Што е многу, многу е – време е државата Њујорк да ги зголеми даноците на богатите наместо да ги скратува услугите за работните луѓе“, рече Алис Нашименто, директор за политика и истражување во њујоршката Заедница за промени, која помогна да се организира акцијата.
Организаторите ја вклучија и Њујоршката алијанса на таксисти со околу 40 регистрирани такси-возила. Таксистите веќе беа во должничка криза пред да се појави вирусот и се тешко погодени од пандемијата.
На протестот учествуваа и припадници на индијанската нација Шинекок, вклучувајќи ја и Ребека Генија, која во изјавата рече дека милијардерите ја земаат земјата за да изградат терени за голф и куќи, да профитираат од пустошот на коронавирусот и да го искористат трудот на останатите.
„Јасно е дека вистинските ограбувачи во Њујорк се милијардери – и време е да ги натераме да го платат својот фер удел за да можеме сите да напредуваме“.
Групата, исто така, запре пред куќите во сопственост на извршниот директор на „Блекстоун“, Стивен Шварцман и инвеститорот за недвижнини Стивен Рос, а планираше да го посети имотот на инвеститорот и директорот на хеџ фондови, Даниел Лоб.
„Милијардерите се експерти за социјално дистанцирање“, рече Нашименто . „Тие избраа да живеат во својот свет и се одвоени од реалноста на обичните луѓе и луѓето врз чиј живот имаат огромно влијание“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белгија издвојува девет милиони евра за украинската енергетска инфраструктура
Белгија ќе додели дополнителна помош од девет милиони евра за да придонесе за поправка на оштетената енергетска инфраструктура во Украина, најави белгиската министерка за развојна соработка, Каролин Генез.
„Преку ОН, Белгија ќе придонесе за поправка на енергетската инфраструктура околу градот Харков, кој сега секојдневно трпи бомбардирање од руската армија. Со воена поддршка, овие средства ќе помогнат да се изгради отпорноста на Украина“, рече министерот, пренесува RTBF.
Според неа, Белгија ќе одвои средства за поддршка на проекти во рамките на Програмата за развој на Обединетите нации, која е специјализирана за економски развој.
Свет
Генералното собрание на ОН го повика Советот за безбедност да ја прими Палестина за членка
Генералното собрание на Обединетите нации ги зајакна правата на Палестина во рамките на организацијата и повика таа да биде прифатена како членка, пренесува Би-Би-Си.
Палестина има статус на земја-набљудувач не-членка од 2012 година, што дозволува некои права помалку од полноправна членка.
За членството може да одлучува само Советот за безбедност на ОН.
САД неодамна ставија вето на кандидатурата за полноправно членство, но гласањето денска може да се смета како гест на поддршка за Палестинците.
Палестинскиот претседател Махмуд Абас ја поздрави резолуцијата, велејќи дека таа ги поддржува палестинските напори за уште едно гласање за ова прашање од страна на Советот за безбедност.
Свет
Шпанија, Ирска и Словенија ќе ја признаат Палестина на 21 мај
Шпанија, Ирска и Словенија планираат симболично да ја признаат Палестинската држава на 21 мај, изјави шефот за надворешна политика на ЕУ, Жозеп Борел.
Тој го потврди датумот во интервју за шпанското јавно радио, откако ирскиот јавен радиодифузен сервис РТЕ објави дека тоа е моментот кога сите три земји планирале да дејствуваат.
Словенечката влада вчера соопшти дека донела декрет за признавање на палестинска држава, што ќе биде внесен во нејзиниот парламент до средината на јуни.
Потоа, најверојатно ќе има повеќе нации што ќе го следат примерот бидејќи и Белгија одлучи да го стори тоа, додаде Борел.