Свет
Стапуваат во сила повисоките кинески царини за САД
 
																								
												
												
											Кина ги зголеми увозните давачки за американски стоки од 84 на 125 отсто, а одлуката стапи во сила денеска. Тоа е одговор на одлуката на американскиот претседател Доналд Трамп, кој претходно ги зголеми американските царини за кинески стоки на вкупно 145 отсто.
„Доколку САД продолжат да воведуваат царини за кинески стоки што се извезуваат во САД, Кина ќе игнорира“, се вели во соопштението на Државниот совет на Кина, според Ксинхуа. Според властите во Пекинг, наметнувањето на уште повисоки американски царини за кинески стоки „веќе нема да има економска смисла“ и би станало „шега“ во историјата на светската економија, пренесува CNBC.
Откако Кина дополнително ги зголеми царините за американскиот извоз денес, еве брз преглед на тоа како настана оваа ситуација:
• 1 февруари: Доналд Трамп објави царина од 10% за речиси сите кинески стоки што влегуваат во Соединетите држави.
• 4 февруари: Кина одговори со царини од 10 до 15% за одредени американски производи.
• 4 март: САД ја удвојуваат царинската стапка за кинески стоки на 20%.
• 2 април: Трамп објави дополнителна царина од 34% за кинескиот увоз како дел од пошироката глобална тарифна стратегија, со што вкупната царинска стапка (вклучувајќи ги и претходните царини) се искачи на 54%. Кина одговара со идентична мерка – царина од 34 отсто за повеќето американски стоки.
• 7 април: Трамп се заканува со дополнителни 50% царини ако Кина не ги повлече контрамерките – вкупната стапка на царини достигнува 84%.
• 9 април: Кина објави дека ќе воведе царини од 84% за американските стоки почнувајќи од 10 април (наместо претходните 34%). „Реципрочните“ тарифи на Трамп стапуваат на сила, а царините на Кина официјално се зголемуваат на 84%, што вкупно значи 104% царини. Трамп потоа најавува дека царините за кинески стоки ќе се зголемат на 125%, со што вкупната стапка (вклучувајќи ја и првата од февруари) на 145%.
• 11 април: Пекинг ги потврди тарифите од 125% за американските стоки и вели дека нема да одговори на дополнителни зголемувања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Свет
Хамас предаде тела, Израел порачува: „Борбата за нашите заложници не запира“
 
														Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
 
														Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
 
														Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.


 
									 
																	 
									 
																	 
									 
																	 
									 
																	 
									 
																	 
									 
																	 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											