Бебе старо околу три месеци било пронајдено во црна кеса покрај контејнер околу 17 часот во Атина.

Се почнало кога мајка пријавила во полиција околу 15.00 часот. дека непознат маж и ја киднапирал ќерката во супермаркет во центарот на Атина. Според нејзините зборови, мажот пришол и рекол дека сака да купи нешто за детето, а потоа и го одзел бебето, пишува „Прототема“.

Полицијата почнала да трага по детето кое било пронајдено два часа подоцна. Девојчето било пронајдено во црна кеса до контејнер како плаче. Случајниот минувач кој го пронашол веднаш ги алармирал полицијата и брзата помош.

Бебето веднаш со возило на Брза помош било пренесено во болница каде и било прегледано. Според првичните информации нејзината здравствена состојба е стабилна.

Полицијата ги приведе на распит мајката и бабата на детето, додека се истражуваат сите аспекти на овој необичен случај. Се уште не се познати идентитетот и мотивите на лицето кое наводно го киднапирало детето, а надлежните не исклучуваат никаква можност.

Довербата на украинските граѓани во претседателот Володимир Зеленски се зголеми од 69 отсто во март на 74 отсто во првата половина на мај, покажува новото истражување објавено денеска од Киевскиот меѓународен институт за социологија (КИИС), пишува Киев Индепендент.

Ова е највисокото ниво на доверба забележано од КИИС од декември 2023 година, кога 77 отсто од испитаниците го поддржаа Зеленски.

Анкетата е спроведена во време кога украинскиот претседател се подготвува за можна директна средба со рускиот претседател Владимир Путин на 15 мај во Турција, како дел од мировните преговори.

Споредено со истражувањето од март, нивото на доверба е зголемено за пет процентни поени, додека недовербата паднала од 28 на 22 отсто. Вкупната разлика помеѓу доверба и недоверба изнесува +52 процентни поени.

Истражувачите известуваат дека Зеленски ужива мнозинска доверба во сите региони на Украина.

Истражувањето е спроведено од 2 до 12 мај на примерок од 1.010 полнолетни граѓани кои живеат на територии под украинска контрола.

Москва ја покани Украина на директни преговори во Истанбул, откако го отфрли повикот за 30-дневен безусловен прекин на огнот, кој беше поддржан од Украина, Европската унија и Соединетите Американски Држави.

Зеленски ја прифати поканата и рече дека е подготвен утре лично да се сретне со Путин во Истанбул. Кремљ се уште не потврди дали Путин ќе учествува на разговорите, но соопшти дека Русија ќе испрати делегација.

Доколку се одржи средбата, тоа ќе биде прва директна средба меѓу Зеленски и Путин од декември 2019 година, кога тие се сретнаа во Париз како дел од таканаречениот формат Нормандија. Од почетокот на целосната руска инвазија во февруари 2022 година, немаше ниту една директна средба меѓу лидерите на двете земји.

Во февруари оваа година, американскиот претседател Доналд Трамп, да потсетиме, го нарече Володимир Зеленски „диктатор“, обвинувајќи го дека одбил да одржи претседателски избори и покрај истекот на неговиот мандат.

Трамп ја објави таа изјава на 19 февруари на неговата платформа Truth Social, а ја повтори и за време на говорот на Флорида.

Изјавите на Трамп предизвикаа осуда од голем број западни лидери, вклучително и британскиот премиер Кир Стармер и францускиот претседател Емануел Макрон, кои истакнаа дека Зеленски е демократски избран претседател и дека одложувањето на изборите за време на војната е легитимно.

Американскиот претседател, Доналд Трамп, и катарскиот емир шеикот, Тамим бин Хамад ал-Тани, потпишаа серија договори во Доха, за време на вториот ден од четиридневната турнеја на Трамп низ земјите од Персискиот Залив.

Според соопштението на Белата куќа, потпишани се договори кои треба да генерираат „економска размена во вредност од најмалку 1,2 трилиони долари“, додека конкретните билатерални зделки се проценуваат на повеќе од 243,5 милијарди долари.

Покрај Боинг, големи договори добија и американската компанија Парсонс (технолошка инфраструктура) со договор вреден 97 милијарди долари и енергетската инженерска компанија Мекдермот со договор од 8,5 милијарди долари.

Белата куќа, исто така, го нагласи „забрзувањето на одбранбените инвестиции на Катар во САД“, вклучувајќи го и системот за контра-дронови произведен од „Рејтеон“.

Денешната посета на Катар доаѓа еден ден по спектакуларниот престој на Трамп во Саудиска Арабија, каде што тој и принцот Мохамед бин Салман потпишаа рекорден договор за одбрана вреден 142 милијарди долари, а саудиската страна најави инвестиции кои во иднина би можеле да достигнат 1.000 милијарди долари.

Утрото Трамп учествуваше на самитот со лидерите на земјите од Персискиот залив во Доха и рече дека сака „да постигне договор со Иран“.

Тој најави и укинување на сите санкции за Сирија, а утрото се сретна со сирискиот претседател Ахмед ал Шара, кого го опиша како „згодно и силно момче“.

Трамп вечерва ќе присуствува на свечена државна вечера во главниот град на Катар, а во петок ќе ја продолжи турнејата со посета на Обединетите Арапски Емирати.