Свет
Деца во Австралија развиле антитела на Ковид-19 без да бидат позитивни на вирусот
Бизарен случај во Австралија ги зачуди медицинските истражувачи откако децата на родителите позитивни на Ковид-19 развија екстремно ефикасни антитела без никогаш да бидат позитивни на вирусот, пренесува РТ.
Во студија објавена во медицинското списание „Нејчр комјуникејшнс“, истражувачите дискутираат за петчлено семејство во кое и двајцата родители се заразиле со Ковид-19 откако присуствувале на свадба во март без своите деца.
Приближно една недела по враќањето, мајката и таткото развиле симптоми како што се кашлица, затнат нос, треска и главоболка. Тогаш целото семејство било тестирано за вирусот, но само родителите биле позитивни и покрај постојаната близина на нивните деца, кои биле негативни.
„Беше неверојатно затоа што тие поминаа недела и пол со нас додека бевме позитивни на Ковид“, вели мајката Лејла Савенко.
Двата сина, на возраст од девет и седум години, развиле лесни симптоми како течење на носот, а целото семејство повторно било тестирано. И повторно тестовите на децата биле негативни.
Најмалото дете, петгодишно девојче, останало целосно асимптоматско во текот на целата епизода и покрај постојаниот близок контакт со родителите, вклучително и спиење во ист кревет.
Необичните резултати од тестот ги поттикнаа медицинските истражувачи да побараат од семејството да учествува во студија, за која тие се согласиле. Примероци од крв, плунка, столица, урина и брис од нос и од грло биле земани од секој член на семејството на секои два до три дена во текот на неколку недели.
Мистеријата продолжила бидејќи со ПЦР тестовите децата постојано биле негативни на Ковид-19, а сепак антителата на Сарс-КоВ-2, што ја предизвикува болеста, биле откриени во плунката на сите членови на семејството.
Со други зборови, и покрај тоа што никогаш не биле позитивни на вирусот, на сите им биле активирани имунитетните реакции до таа мера што се спротивставиле на потенцијалната инфекција или, како што вели мајката Лејла Савенко, вирусот бил уништен пред да се претвори во Ковид.
Сите членови на семејството кои се разболеле закрепнале без потреба од лекарска интервенција, а сепак точниот механизам со кој имунитетните реакции на децата биле активирани толку ефикасно сè уште е мистерија.
„Фактот дека овие деца биле во можност да отфрлат вирусот дури и без да покажат позитивен резултат од тестот, сугерира дека тие имаат одредено ниво на имунолошки систем што е во состојба да одговори и ефикасно да се справи со вирусот, без да стане многу лошо“, вели педијатарот Шидан Тосиф од Универзитетот во Мелбурн.
Истражувачите сега се сомневаат дека децата биле заразени со Сарс-КоВ-2, но нивниот имунолошки систем успеал да постави толку жестока одбрана што вирусот никогаш не се активирал правилно и затоа никогаш не се појавил на тестовите.
Истражувачите исто така се сомневаат дека вирусното оптоварување во детските системи може да се намали под забележливите нивоа при ПЦР тестирање благодарение на нивниот силен имунолошки одговор. Засега, научниците од Кралската детска болница во Мелбурн и Детскиот истражувачки институт „Мардок“ (МЦРИ) ќе продолжат да го следат семејството за да набљудуваат како имунитетниот систем се менува со текот на времето.
Нивното истражување може да одговори зошто децата имаат тенденција да не се разболуваат сериозно со Ковид-19.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.