Свет
Директорот на „АстраЗенека“: Вакцината бара дополнителна студија

Вакцината против Ковид-19 развиена од британската лабораторија „АстраЗенека“ и Универзитетот во Оксфорд, бара понатамошно истражување, рече извршниот директор на „АстраЗенека“ по критиките за објавените резултати за ефикасноста.
„Сега, кога се чини дека ја најдовме најдобрата ефикасност, треба да ја потврдиме, затоа треба да спроведеме дополнителна студија“, рече Паскал Сориот во интервју за „Блумберг“.
Резултатите од оваа нова меѓународна студија, додаде тој, може да се постигнат побрзо затоа што знаеме дека ефективноста е висока и затоа ни требаат помалку пациенти.
Сориот не верува дека овој дополнителен тест ќе го забави одобрувањето на вакцините што треба да го дадат регулаторите во Европската унија и Велика Британија, но на американските власти ќе им треба повеќе време да дадат зелено светло.
Британската лабораторија во понеделникот, врз основа на големи клинички испитувања во Велика Британија и Бразил, објави дека вакцината е во просек ефикасна 70 проценти.
Сепак, зад овој просечен резултат лежат големи разлики помеѓу два различни протоколи. Така, ефикасноста беше 90 проценти за волонтерите кои прво добија половина од дозата, а потоа и целата доза еден месец подоцна, а за групата што ја прими целосната доза двапати, исто така, со разлика од еден месец, ефикасноста беше 62 проценти.
Лабораторијата објави дека инјектирањето на половина од дозата во првата група е резултат на случајна грешка, така што само 3.000 пациенти биле подложени на ваков протокол. Сепак овие резултати сугерираат дека таквата шема предизвикува подобар имунолошки одговор.
Сепак, критиките дојдоа токму затоа што станува збор за мала група волонтери и затоа што откритието е направено по грешка.
Понатаму, просечната возраст на групата која примила половина од дозата не надминува 55 години, со што се исклучуваат ризичните групи.
Новата студија треба да ја процени ефикасноста на вакцината со давање помала доза.
„АстраЗенека“ има предност во однос на конкурентите затоа што користи потрадиционална технологија и затоа е поевтина и полесна за чување. Вакцината може да се чува на температура од обичен фрижидер, а не на екстремно ниски температури како во случајот на вакцината на „Модерна“ (-20 степени Целзиусови), или -80 за вакцината што ја развиваат „Фајзер“ и „Бионтек“.
Во понеделникот, „АстраЗенека“ објави дека брзо ќе започне со производство на 3 милијарди дози што ќе бидат достапни во 2021 година. За споредба, „Фајзер“ и нејзиниот партнер „Бионтек“ објавија дека ќе произведат 1,3 милијарди дози до крајот на 2021 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Дете остана без рака при експлозија на плажа кај Будва

Страшна несреќа се случи на плажа во близина на Будва, каде што вчера експлодираше боца за нуркање. Во таа прилика, едно дете беше тешко повредено.
Црногорската полиција го уапси М. Б. (45), граѓанин на Белград, кој е обвинет за предизвикување јавна опасност и нелегални активности. Според официјалните информации, осомничениот управувал со опрема за нуркање без потребната регистрација или одобрение, што, како што е наведено, ги загрозило животите на присутните.
Детонацијата се случила во непосредна близина на плажата, кога експлодирала боцата за нуркање. Делови од неа одлетале на поголемо растојание и го погодиле детето, странски државјанин, во раката, што довело до ампутирање на неговата рака. Повреденото дете веднаш било пренесено во болница.
До него, уште две лица се здобиле со полесни повреди од експлозијата и побарале медицинска помош.
На местото на настанот дошол обвинителот на Основното државно обвинителство во Котор, заедно со експерти од машинската струка, каде што била спроведена истрагата. По спроведените мерки и дејствија, М.Б. бил уапсен и приведен од надлежните органи.
Несреќата предизвика голема вознемиреност кај туристите и локалните жители, додека истрагата треба да ги утврди сите околности и одговорноста на осомничениот, пренесуваат медиумите во соседството.
Фото: принтскрин
Свет
Меркел: Сè уште стојам зад политиката на отворени граници за мигрантите

Поранешната германска канцеларка Ангела Меркел изјави дека е изненадена што сè уште е критикувана за нејзината политика за мигрантите и фразата „ние можеме да го направиме тоа“, велејќи дека стои зад неа затоа што се грижи за човечкото достоинство.
Меркел во документарецот на ARD „10 години – Ние можеме да го направиме тоа!“ рече дека морала да го направи тоа „со човечко достоинство“ и дека за неа „пристапот кон прашањето е важен“, објавува денес „Tageschau“.
„Се осврнувам наназад и сфаќам дека тоа беше посебна одлука со која се соочив. Но, исто така, во последниве години, бев изненадена колку често тие три збора, „можеме да го направиме тоа“, ми беа возвратени назад. Тие не требаше да изразат ништо друго освен дека се соочуваме со огромна задача“, рече Меркел во единственото телевизиско интервју што го даде по повод десетгодишнината од отворањето на границите на Германија за бегалци и мигранти.
Таа рече дека ѝ било јасно дека нејзината одлука „ги навела луѓето да се приклучат на Алтернатива за Германија (АфД)“, која беше основана во 2013 година, и дека тоа „сигурно ја зајакна АфД“, но дека тоа не е причина да не се направи нешто што таа го смета за правилно, важно и хумано.
За време на разговорот, Меркел се дистанцира од пресвртот во политиката на Христијанските демократи (ЦДУ) и нивното затворање на границите за мигрантите, пренесува Танјуг.
„Ова е процес, но досега постигнавме многу. И она што сè уште треба да се прави, мора да продолжи да се прави“, рече таа.
Германскиот канцелар Фридрих Мерц неодамна даде лоша оценка за својот претходник од ЦДУ на прес-конференција кога беше прашан дали Германија навистина успеала во својата политика кон мигрантите.
„Денес знаеме дека очигледно не успеавме во областа за која таа (Меркел) размислуваше во тоа време“, рече Мерц.
Фото: принтскрин
Свет
Масовно труење во хотел во Шпанија: со салмонела завршиле повеќе од 100 лица, меѓу нив и бебе

Повеќе од сто туристи беа заразени со салмонела во познат хотел во Ла Манга, популарно одморалиште во близина на Мурсија, Шпанија. Меѓу заболените се 15-месечно бебе, седум деца, како и бремена жена во осмиот месец од бременоста, пренесуваат медиумите во регионот.
Околу 20 гости биле пренесени во болница, додека привремена теренска болница била поставена во самиот хотел на брегот. Симптоми на труење: гадење, повраќање, дијареја и висока температура, се појавиле по саботниот ручек во ресторанот на хотелот. Првично биле пријавени 28 случаи, но бројот на пациенти наскоро се зголемил на повеќе од сто. Децата и бебето се пренесени во болницата „Санта Лучија“ во Картагена за лекување на треска и други симптоми, според написите.
Санитарната инспекција зеде примероци од храна од кујната на хотелот, а хотелот беше привремено затворен. Регионалните здравствени власти го третираат инцидентот како можна епидемија на салмонелоза. Хотелот, еден од најпознатите на Коста Калида, има ресторан на шведска маса (кој моментално е под истрага), бар на плажа, ресторан и англиски паб, кој исто така е привремено затворен.
Здравствените инспектори продолжуваат со истрагата, додека хотелот продолжува да добива критики за лоша комуникација со гостите. Бројот на пациенти би можел да продолжи да расте, а властите го истражуваат изворот на контаминацијата и преземаат дополнителни здравствени мерки за да спречат понатамошно ширење на инфекцијата.
Фото: принтскрин