Професорот по сеизмологија, Костас Папазахос, оцени дека по серијата земјотреси што се случија во неделата на грчкиот полуостров Халкидики, чијшто епицентар беше на Света Гора, нема причина за загриженост и оти земјотреси од оваа јачина се секојдневна појава во Грција.

Сепак, тој посочи дека не е исклучена можноста од земјотрес со јачина од 6 степени според Рихтеровата скала и ги советуваше населението и монасите на Света Гора да бидат внимателни.

Папазахос и порталот „Халкидикињуз“ соопштија дека вчера имало „сеизмичка серија на локација која е стимулирана во последните неколку недели“ и оти оваа серија може да заврши по неколку месеци, но дека може да има и земјотрес што би надминувал 5,5 и да достигне блиску до 6 степени според Рихтеровата скала.

„Најблиските области како Уранополис, сè до Амуљани и Неа Рода и особено Света Гора треба да бидат внимателни и да не користат стари објекти“, додаде Папазахос.

Епицентарот на вчерашниот најсилен земјотрес од 4,2 степени според Рихтеровата скала бил на 19 километри од Неа Рода на Атос, а другите земјотреси од таа серија биле со јачина од 2,4 до 2,8 степени, покажуваат податоците на Европско-медитеранскиот сеизмолошки центар (ЕМСЦ).

Тајландското Министерство за здравство предложи нов закон со кој ќе се регулира производството на канабис и ќе се ограничи употребата на марихуана првенствено за здравствени и медицински цели, објавија денеска локалните медиуми.

Според нацрт-законот, употребата на марихуана ќе биде дозволена за медицински третмани и истражувања спроведени од државните агенции на Тајланд, како и во храна и козметички производи, пренесува ВНА.

Секој што користи канабис или негови екстракти за други цели освен оние наведени во законот, ќе биде казнет до 1.800 долари.

Министерството за здравство на Либан соопшти дека најмалку 50 луѓе се убиени, а повеќе од 300 се ранети, вклучително и деца, жени и медицински работници, во насилните израелски напади врз јужен Либан. Ова се најмоќните воздушни напади против Хезболах од војната меѓу Израел и исламистичката милитантна група во 2006 година.

„Според првите бројки, 50 луѓе загинаа, а повеќе од 300 се повредени во израелските напади врз локалитети и села на југот“, се вели во соопштението на Министерството и додаваат дека меѓу нив има деца, жени и работници на итната служба.

Израелците ги предупредуваат Либанците да се оддалечат од позициите на Хезболах

Израелската армија денеска започна нови напади врз позициите на Хезболах во Либан, откако откри дека проиранската група се подготвува да го нападне Израел, изјави портпаролот на израелската војска. Тој ги повика либанските жители да се држат настрана од тие места.

Жителите на јужен Либан, исто така, добиле предупредувачки повици од либански број веднаш да се оддалечат 1.000 метри од позициите што ги користи либанската вооружена група Хезболах, изјави репортер на Ројтерс.