Свет
Еврокомесарот за конкурентност на ЕУ ги повика членките да купуваат акции за да избегнат кинески преземања
Земјите на ЕУ треба да бидат подготвени да откупуваат акции како сопственици на компании во услови на криза поради Ковид-19 за да се избегнат кинеските аквизиции, предупреди комесарот за конкурентност и потпретседател на Европската комисија, Маргрета Вестагер, пренесува „Спутник“.
Вестагер рече дека ЕУ нема ништо против земјите членки да дејствуваат како играчи на финансиските пазари ако се смета дека е неопходно за да се спречи непријателско преземање.
„Многу е важно да се биде свесен дека постои реален ризик ранливите компании да бидат изложени на преземање. Ситуацијата моментно е таква што навистина мора да работиме интензивно за да се спротивставиме на ваквиот развој“, рече Вестагер, цитирана од Данското радио.
Додека многу компании во цела Европа се погодени од последиците од пандемијата на Ковид-19 и се борат во надеж за пакети помош, Вестагер предупреди на друг проблем што демне под површината.
Според Вестагер, Кина може да истапи и да ги преземе оптоварените европски компании, нешто што ЕУ треба да го избегне. Затоа, земјите треба да се подготват да купуваат како сопственици на компании во своите земји за да ја држат Кина понастрана.
Дописникот за бизнис на Данското радио, Јакоб Усинг, истакна дека пандемијата на Ковид-19 ги потресе пазарите и ја разниша вредноста на многу европски компании,правејќи ги поевтини за откуп.
„Едноставно, постои страв во Германија и Франција, двете најголеми економии на ЕУ, но и во многу други европски држави, дека и важните инфраструктурни и технолошки компании може да завршат во кинески раце“, рече Усинг.
Усинг исто така потсети дека Германија и Франција одамна туркаат кон нови правила за подобро да ги заштитат европските компании од паѓање во рацете на кинески компании. Ова е особено нагласено ако овие компании се во сопственост или се под контрола на кинеската држава.
„Кина во голема мера веќе го покажа својот интерес. По финансиската криза, државната кинеска компанија „Коско“ ја презеде контролата врз најголемото грчко пристаниште во Пиреја, Атина, а државните кинески компании купија холдинзи во пристаништа на многу други места во Европа “, потсети Усинг.
„Иронично, токму земјите од Еврозоната ја принудија Грција да го продаде пристаништето Пиреја за да ѝ помогне на земјата да излезе од должничката криза, но оттогаш стравот од кинеските преземања во Европа се искачи на повисоко ниво на агендата, а правилата на ЕУ веќе се затегнати.“
Во заклучокот Усинг го истакна силното присуство и интерес на Кина во Данска фокусирајќи се на зелените технологии. Според него, голем број помали дански компании се целосно купени од Кинезите.
Глобалните надворешни директни инвестиции во Кина пораснаа на рекордно ниво во 2016 година, при што ЕУ им е омилена дестинација на кинеските инвеститори. Додека нивоата на инвестиции малку паднаа, кинеската аквизиција на високотехнолошки средства, особено во производството и машините, сè уште поттикнуваат европска дебата за вклученоста на кинеската држава во ваквите зделки и долгорочните ризици од губење на клучната индустриска технологија во корист на Кина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.