Свет
Европа на нозе, безбедносните служби на готовност поради новата руска закана: „Длабоко сме загрижени“

Безбедносните служби во Европа се во состојба на готовност од потенцијално ново оружје на руската војна – подметнување пожар и саботажа. Имено, низа пожари и напади на инфраструктура се забележани во балтичките држави, Германија и во Велика Британија.
По избувнувањето пожар во ИКЕА во Вилнус, Литванија, во мај, полскиот премиер Доналд Туск сугерира дека тоа можеби е дело на странски саботер.
Инспекторите веќе ја наведоа потенцијалната вмешаност на Русија во пожарот во источен Лондон, пожарот што го уништи најголемиот трговски центар во Полска, обидот за саботажа во Баварија, Германија, и антисемитските графити во Париз, пишува „Гардијан“.
Иако нема конкретни докази дека овие напади во континентот се координирани, безбедносните служби веруваат дека тие би можеле да бидат дел од систематскиот обид на Москва да го дестабилизира Западот, кој ја поддржува Украина.
Загриженоста дека овие хибридни напади би можеле да бидат дело на Русија е таква што тие беа дискутирани на самитот на министрите за надворешни работи и за одбрана во Брисел оваа недела со холандски, естонски и литвански безбедносни претставници, сите предупредувајќи на националните ранливости.
Министер, кој сакаше да остане неименуван, рече дека тие се длабоко загрижени за „саботажа, физичка саботажа, организирана, финансирана и извршена од руски полномошници“.
Туск минатата недела откри дека полските власти уапсиле девет лица во врска со саботажа, наводно извршена по наредба на руските служби.
Тој рече дека злосторствата наводно вклучуваат „тепање, палење и обид за палење“ и дека иследниците испитуваат дали Русија е вмешана во пожарот во трговскиот центар во Варшава, тврдење што руската амбасада го опиша како теорија на заговор.
Во април Британец беше обвинет дека организирал подметнати пожари во две единици поврзани со украински бизнисмен во индустриски имот во Лејтон, источен Лондон, и наводно бил регрутиран од руското разузнавање. Обвинителството објави дека мажот бил „вклучен во однесување што таргетирало компании поврзани со Украина со цел да има корист на руската држава“.
Во вторникот, естонскиот министер за одбрана, Хано Певкур, во Брисел на одбранбениот самит на ЕУ, рече дека земјата веќе е жртва на руска саботажа.
„Тие спроведоа слични операции во Естонија. Ангажирале 10 лица да го нападнат автомобилот на министерот за внатрешни работи и новинарите. Ова е нормално однесување на Русија. Жал ни е што мораме да го кажеме тоа, но мораме да разбереме дека Русија е сè поагресивна кон европските земји, а исто така и кон земјите од НАТО“, рече тој.
Во 2023 година Германија беше погодена од бран сајбер-напади за кои беше одговорна хакерска група поврзана со руското разузнавање, пренесува медиумот.
Минатиот месец двајца германско-руски државјани беа уапсени под сомнение дека планирале напади, вклучително и напади врз воена база во Баварија. Главниот осомничен е обвинет за планирање на експлозијата, подметнување пожар и одржување контакт со руското разузнавање.
Инспекторите во Франција истражуваат дали графитите напишани на споменикот на холокаустот во Париз минатата недела биле нарачани од руските безбедносни служби.
Нападите, стравуваат европските претставници, придонесуваат за веќе растечката кампања за дезинформации. Во средата неколку училишта во Атина беа евакуирани по лажни закани за бомби. Полицијата му влезе во трага на рускиот сервер и рече дека целта била „да се наруши јавниот ред“.
Земјите од ЕУ ги следат сите овие настани. Литванскиот Национален центар за управување со кризи (НКВЦ) ги предупреди бизнисите, вклучително и трговските центри и организациите што ја поддржуваат Украина, да ја зголемат будноста.
Во понеделникот холандскиот национален координатор за безбедност и борба против тероризмот предупреди на ризикот од субверзивни операции во Холандија, вклучително и „шпионажа и подготовка за саботажа на виталната инфраструктура“.
Во вторникот во Брисел, холандската министерка за одбрана, Кајса Олонгрен, рече дека Русија „се обидува да ги заплаши“ земјите од НАТО правејќи ги земјите членки на ЕУ ранливи.
„Да, ние сме ранливи. Мислам дека сите сме ранливи, имаме инфраструктура на морското дно, имаме снабдување со електрична енергија, снабдување со вода, ранливи сме на сајбер-напади. Сега во неколку европски земји гледаме дека Русија се обидува да нѐ дестабилизира и заплаши“, посочи таа.
„Мислам дека тоа беше начинот на кој Русија и Советскиот Сојуз работеа во поновата историја и мислам дека често сме го гледале тоа во 75-те години на НАТО“, додаде таа.
И генералниот секретар на НАТО, Јенс Столтенберг, го впери прстот кон Москва. „Забележавме зголемена активност на руската разузнавачка служба во целата алијанса. Затоа ја зголемивме нашата будност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп ја повика Турција да престане да купува нафта од Русија

Американскиот претседател, Доналд Трамп, ја повика Турција да престане да купува нафта од Русија, објави денес Би-Би-Си.
Трамп му рече на турскиот претседател Реџеп Таип Ердоган во Белата куќа дека прекинувањето на увозот би било „најдоброто нешто“ што Анкара може да го направи.
Средбата во Овалната соба заврши без решение за прашањето за санкциите на САД против Турција или продажбата на напредни борбени авиони Ф-35, но Трамп изрази оптимизам.
Турција со години не може да набави американски авиони Ф-35. Во 2020 година, Трамп воведе санкции врз Турција затоа што купи руски противвоздушни системи С-400, а една година претходно поради ова, беше исфрлена од програмата во која произведуваше делови за тој авион.
За време на кратките изјави за медиумите, Трамп денес изјави дека сака Турција „да не купува нафта од Русија додека таа продолжува со своите напади во Украина“.
„Најдоброто нешто што може да го направи е да не купува нафта и гас од Русија“, рече Трамп.
Заедно со Индија и Кина, Турција е еден од најголемите купувачи на руски енергетски производи.
Трамп додаде дека верува оти Ердоган е почитуван и од украинскиот претседател Володимир Зеленски и од рускиот претседател Владимир Путин, што значи дека би можел да има големо влијание врз војната ако сака, пишува Би-Би-Си.
Фото: ЕПА
Свет
Лавров: НАТО и Европската Унија се во војна со Русија

Министерот за надворешни работи на Русија, Сергеј Лавров, изјави дека НАТО и Европската Унија водат војна против Русија „користејќи ја Украина како посредник“ и „директно учествуваат“ во конфликтот.
Пораката на Лавров беше објавена на јавниот канал Телеграм и е продолжение на честите тврдења на Кремљ дека западната воена и финансиска помош за Украина претставува директна непријателска акција против Русија.
Изјавата доаѓа во време кога се регистрирани нови упади на руски беспилотни летала и авиони во воздушниот простор на членките на НАТО. Алијансата во вторникот ја предупреди Москва дека е подготвена да го брани „секој сантиметар од територијата“ откако Естонија минатата недела пријави повреда на нејзиниот воздушен простор.
Сличен инцидент се случи претходно овој месец во Полска, кога околу 20 руски беспилотни летала влегоа во полскиот воздушен простор. Оваа недела, Данска пријави повеќе беспилотни летала во близина на критична инфраструктура, додека руски десантен брод беше забележан покрај нејзиниот брег.
Кремљ, исто така, вчера реагираше на изјавата на американскиот претседател Доналд Трамп, нарекувајќи ја Русија „хартиен тигар“ и рече дека Владимир Путин „ги цени неговите напори за решавање на војната во Украина“.
Портпаролот на Кремљ, Дмитриј Песков, рече дека Русија е мечка, а не тигар, додавајќи: „Не постои такво нешто како хартиена мечка“. Коментирајќи ја изјавата на Трамп дека Украина би можела да ја врати целата окупирана територија под своја контрола, Песков рече дека „руските сили напредуваат на сите фронтови во Украина“, додавајќи дека „динамиката на војната е очигледна“.
Песков, исто така, коментираше за можноста за средба меѓу рускиот претседател Владимир Путин и украинскиот претседател Володимир Зеленски, велејќи дека „средба меѓу двајцата без соодветна подготовка би била ПР-шоу осудено на неуспех“.
Трамп претходно изјави дека земјите-членки на НАТО треба да соборуваат руски авиони што го нарушуваат нивниот воздушен простор. Тој, исто така, рече дека верува оти Украина, со поддршка на Европската Унија и НАТО, може да ја врати целата територија што Русија ја зазеде од почетокот на инвазијата, откако долго време тврдеше дека и Киев и Москва ќе мора да се откажат од дел од територијата за да се стави крај на војната.
Свет
Сијарто: Крајот на војните е можен само преку преговори

Ниеден вооружен конфликт никогаш не завршил на бојното поле, а решение може да се најде само преку дипломатија, поради што медијацијата меѓу завојуваните страни е исклучително важна, изјави денес во Њујорк унгарскиот министер за надворешни работи Петер Сијарто.
За време на состанокот за медијација меѓу завојуваните страни на маргините на Генералното собрание на Обединетите нации во Њујорк, Сијарто истакна дека медијацијата е особено важна за Унгарија, која се соочува со безбедносни предизвици поради војната во соседна Украина, како и поради нелегалната миграција, што е исто така последица од вооружените конфликти, според соопштението за медиумите на министерството, пренесено од МТИ.
„Затоа се залагаме за мир низ целиот свет и ја поддржуваме секоја иницијатива насочена кон постигнување мирно решение. Колку побрзо завојуваните страни седнат на преговарачка маса, толку побрзо ќе има шанса војната да заврши, да се спасат повеќе животи и да се спречи поголемо уништување“, рече Сијарто.