Свет
Европската комисија предлага закон против детска порнографија

Европската комисија објави дека ќе предложи закон со кој ќе се обврзат мрежните платформи да детектираат и пријавуваат споделување на детска порнографија и формирање на Европски центар за превенција и сузбивање на сексуална злоупотреба на деца.
„Злоупотребата на деца и сексуалната злоупотреба преку интернет се застрашувачки кривични дела. Пандемијата на коронавирус го влоши проблемот. Денес можам да соопштам дека ќе предложиме закон коj oд мрежните платформи ќе налага откривање и извештај за споделување на оваа нелегална содржина. Ќе размислиме и за формирање на нов Европски центар за спречување и сузбивање на сексуална злоупотреба на деца со цел да се одржи Европа во првите редови на борбата против злоупотребата“, рече комесарот за внатрешни работи, Илва Јохансон.
Комесарот Јохансон и Маргаритис Шинас, потпретседател на Комисијата за унапредување на европскиот начин на живот, во петокот претставија три нови иницијативи за спроведување на стратегијата на Унијата за безбедност: стратегија на ЕУ за поефикасна борба против сексуалната злоупотреба на децата, нова агенда и акциски план на ЕУ за борба против дроги и акционен план на Унијата за контрола на трговијата со огнено оружје.
Јохансон предупреди за „експоненцијален раст“ на содржината со детска порнографија.
Две третини од оваа содржина доаѓаат од ЕУ, претежно од Холандија. Минатата година беа пријавени 725 илјади фотографии или видеа, додека во 2018 година се снимени 23 илјади.
„Во моментов, известувањето за ваква содржина е прашање на добра волја на оние кои се среќаваат со тоа, а следната година Комисијата ќе предложи закон со кој ќе се присилат дигиталните платформи и социјалните мрежи да откриваат, да известуваат и да ја отстранат таа содржина“, рече Јохансон.
Комисијата проценува дека едно од пет деца во Европа е жртва на некаква форма на сексуално насилство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се водат чувствителни разговори за предлогот на Трамп за прекин на војната во Газа

Белата куќа денес објави дека се водат „чувствителни дискусии“ за предлогот на американскиот претседател Доналд Трамп за прекин на војната во Појасот Газа.
„Можам да ви кажам дека се водат некои многу чувствителни разговори, но секако не сакам да ги превенирам најавите од оваа говорница. Ќе им препуштам на специјалниот пратеник (Стивен) Виткоф и на претседателот на Соединетите Американски Држави да се справат со тоа“, изјави портпаролката на Белата куќа, Каролин Ливит, на редовниот брифинг за медиумите, објави Ројтерс.
Висок функционер на Хамас изјави за Би-Би-Си дека палестинската група веројатно ќе го отфрли мировниот план на американскиот претседател, тврдејќи дека тој „им служи на интересите на Израел“ и „ги игнорира интересите на палестинскиот народ“.
Фото: принтскрин
Свет
Трамп го потпиша указот за американски безбедносни гаранции за Катар

Претседателот на САД, Доналд Трамп, потпиша извршна наредба со која САД се обврзуваат да ја гарантираат безбедноста на Катар, што претставува значајна нова обврска кон клучен арапски сојузник кој не е член на НАТО, пишува CNN.
„САД ќе го сметаат секој вооружен напад врз територијата, суверенитетот или критичната инфраструктура на Државата Катар за закана за мирот и безбедноста на САД“, се вели во наредбата потпишана во понеделник.
Оваа одлука доаѓа во време кога израелскиот премиер Бенјамин Нетанјаху, за време на посетата на Белата куќа, му се извини по телефон на катарскиот премиер за израелскиот напад врз Доха минатиот месец. Потоа, Трамп, во заеднички настап со Нетанјаху, го претстави својот план од 20 точки за мир во Газа.
„Во случај на таков напад, САД ќе ги преземат сите законски и соодветни мерки – вклучувајќи дипломатски, економски и, доколку е потребно, воени – за да ги одбранат интересите на САД и Државата Катар и да го вратат мирот и стабилноста“, се вели во документот, според медиумот.
Фото: принтскрин
Свет
Макрон: Ја потценивме Русија

Францускиот претседател Емануел Макрон изјави дека не исклучува никакви опции доколку руските борбени авиони влезат во европскиот воздушен простор.
„Во согласност со доктрината за стратешка двосмисленост, можам да ви кажам дека ништо не е исклучено“, рече Макрон во интервју за весникот „Франкфуртер алгемајне цајтунг“, одговарајќи на прашање дали би поддржал соборување на руски борбен авион доколку влезе во европскиот воздушен простор без дозвола.
Макрон истакна дека ја потцениле Русија. Тој тврдеше дека Русија е најголемата структурна закана за Европејците, наведувајќи мешање во изборните кампањи, кибернапади, атентати на противници и ширење лажни информации.
„Постои француски нуклеарен чадор“
„Наивни сме ако не препознаеме дека тајната армија на Русија се шири во нашите демократии. Таа се состои од оние мали анонимни воини што ги нарекуваме дигитални ботови. Тие ја манипулираат демократијата во Франција, Германија и низ цела Европа“, предупреди тој.
Кога беше прашан за предлогот на Европската комисија да се користат замрзнати руски средства како колатерал за исплати на воени репарации на Украина, Макрон повтори дека средствата не можат едноставно да се конфискуваат, бидејќи тоа би го прекршило меѓународното право.
Макрон, исто така, потврди дека ќе одржи говор на почетокот на следната година за француската нуклеарна доктрина, која моментално се ажурира.
„Францускиот нуклеарен чадор постои. Моментално работам на ажурирање на нашата доктрина и сакам да продолжам со продлабочување на нашиот стратешки дијалог со Европејците кои сакаат да учествуваат“, рече тој.
Фото: принтскрин