Свет
Еден од заложниците на Хамас, кој осум месеци беше заробен: Не покриваа со ќебиња кога беше топло
Семејството на еден од заложниците спасен во израелската операција за време на викендот објави дека претрпел психичко малтретирање во текот на осумте месеци кога Хамас го држеше во заробеништво во Газа, пишува Си-ен-ен.
Андреј Козлов (27) беше спасен заедно со Ноа Аргамани (25), Алмог Меир Јан (21) и Шломи Жива (40) за време на рацијата во бегалскиот камп Нусејрат во центарот на Газа во саботата.
Козлов и другите заложници Хамас ги држеше во две цивилни згради во густо населена област. Израелските одбранбени сили (ИДФ) соопштија дека рацијата била извршена во двете згради истовремено од страв дека киднаперите ќе убијат некои од заложниците доколку дознаат дека операцијата е во тек.
Рускиот државјанин Козлов се преселил во Израел пред речиси две години. Тој работеше како обезбедување на музичкиот фестивал „Нова“ на 7 октомври кога беше киднапиран и одведен во Газа, според Си-ен-ен.
Во интервју за Си-ен-ен семејството на Козлов откри некои детали за голготата низ која поминале нивниот син и брат, вклучително и дека тој првично верувал оти израелските сили кои го спасиле биле испратени да го убијат.
Таткото на Козлов, Михаил Козлов, рече дека син му бил многу исплашен затоа што милитантите на Хамас со месеци лажно зборувале дека „Израел сака да ги убие сите“ тврдејќи дека „тие биле проблем за Израел“.
„Му беше кажано дека Израел сака да го убие. Не му беше јасно зошто дојде ИДФ. Се плашеше дека од ИДФ дошле да го убијат. Му требаше време да сфати дека дошле да го спасат“.
Михаил рече дека син му не сакал да ги открие сите начини на кои го малтретирале, но рекол дека „не го третирале како маж“.
„Би рекол дека го казнувале за секое однесување за кое сметале дека е погрешно“, рече тој.
Еден од примерите што ни ги наведе Андреј е дека во најжешкото време од денот го покривале со ќебиња“, вели тој.
„Тоа е многу тешко искушение. Да се дехидрира за време на жештините“.
Брат му Дмитриј рече: „Се трудеа да не остават никакви физички траги. Но, сепак, ќе го казнеа на овој или оној начин. Многу често за тривијални работи“.
Му било кажано, вели, да не зборува на хебрејски, туку да шепоти на англиски.
Опишувајќи ја нивната повторна средба, Михаил рече дека првата средба била многу трогателна.
„Очекувавме да имаме радосна средба, но, наместо тоа, тој клекна, почна да плаче и тоа беше многу трогателно за нас“, додава тој.
Дмитриј рече дека брат му се чувствува должен кон Израел.
Со спасувањето на четворицата заложници, 116 остануваат во Газа од нападот на 7 октомври. Се верува дека 41 се мртви.
Михаил рече дека се залага за ослободување на преостанатите заложници со какви било средства – преговори или понатамошна воена акција.
Лекарот задолжен за лекување на заложниците изјавил дека тие биле тепани додека биле во заробеништво на Хамас во Газа.
„Тоа беше грубо, сурово искуство, со многу злоупотреба, речиси секој ден“, изјави д-р Итаи Песах за Си-ен-ен. „Секој час, на физичка и ментална и други видови злоупотреба, тоа е нешто што е неразбирливо“.
Песах рече дека осумте месеци поминати во заробеништво „оставиле значителен белег врз нивното здравје“ и покрај тоа што првично се појавиле во добра состојба, сите биле неисхранети. „Тие немаа протеини, па нивните мускули се екстремно истрошени“.
Тој рече дека заложниците му рекле оти биле преместувани неколкупати. Снабдувањето со храна и вода било нестабилно.
„Имало периоди кога речиси воопшто не добивале храна“, нагласи тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Северна Кореја гради ѕид на границата со Југот
Северна Кореја гради ѕид на неколку локации во близина на границата со Јужна Кореја, откриваат сателитски снимки анализирани од Би-би-си. Дополнително, исчистено е земјиште во Демилитаризираната зона (ДМЗ), што според експертите може да биде прекршување на долгогодишното примирје со Јужна Кореја.
ДМЗ, инаку, е тампон зона широка четири километри меѓу двете Кореи, кои технички се уште се во војна бидејќи никогаш не потпишаа мировен договор. Зоната е поделена на два дела, а секоја земја ја контролира својата страна.
Експертите ја коментираат изградбата на ѕидот за Би-би-си како „невообичаена активност“ која доаѓа во време на зголемени тензии меѓу двете земји.
„Во овој момент, можеме само да шпекулираме дека Северна Кореја сака да го зајакне своето воено присуство и утврдувања долж границата“, вели Шрејас Реди, дописник на специјализираната страница НК Њуз со седиште во Сеул.
Би-би-си нарача сателитски снимки од граничниот дел од седум километри, како дел од проектот кој ги разгледува промените што Северна Кореја ги направи во областа.
Снимката покажува најмалку три дела каде што се поставени бариери во близина на демилитаризираната зона, покривајќи вкупно еден километар од источниот крај на границата. Можно е и понатамошна изградба на бариери. Меѓутоа, поради недостигот на претходни слики со висока резолуција од областа, не се знае точно кога започнала изградбата. Сепак, такви структури нема на снимките од ноември 2023 година.
„Моја проценка е дека ова е првпат да градат бариера во однос на одвојувањето на местата едни од други“, изјави за Би-би-си, Ук Јанг, воен и одбранбен аналитичар во Институтот за политички студии Асан во Сеул.
„Во 1990-тите, Северна Кореја подигна противтенковски ѕидови за да го одврати напредувањето на тенковите во случај на војна. Но, неодамна Северна Кореја подигнува ѕидови високи два до три метри“, рече Јанг.
„Обликот на ѕидовите сугерира дека тие не се само бариери за тенковите, туку се наменети да ја поделат областа“, додаде Јанг, кој ги прегледал сателитските снимки. Најновите сателитски снимки на источниот крај на границата покажуваат нешто што изгледа како новосоздаден пристапен пат.
Официјален началник на здружениот генералштаб на Јужна Кореја во неодамнешно интервју изјави дека војската идентификувала тековни активности поврзани со „зајакнување на тактичките патишта, поставување мини и расчистување на пустош“.
„Расчистувањето на копното може да биде наменето и за воени и за невоени аспекти“, рече Кил Џо Бан, професор по меѓународна безбедност на Универзитетот во Кореја.
Свет
(Видео) Нетанјаху објави снимка во која ги критикува САД; Белата куќа: Длабоко сме разочарани
Белата Куќа изрази длабоко разочарување поради критиките на израелскиот премиер Бенјамин Нетанјаху кон САД, во услови на тензии меѓу двата сојузници околу војната на Израел во Газа.
Одговорот на Белата куќа дојде по состанокот меѓу советникот за национална безбедност Џејк Саливан и двајца од главните соработници на Нетанјаху на разговори за конфликтот во Газа.
Give us the tools and we'll finish the job. pic.twitter.com/eQHpyd9q0X
— Benjamin Netanyahu – בנימין נתניהו (@netanyahu) June 18, 2024
Во вторникот, Нетанјаху објави видео на англиски јазик во кое раскажува разговор со шефот на американската дипломатија, Ентони Блинкен, кој, според израелскиот премиер, му дал збор дека администрацијата на претседателот Бајден работи на отстранување на ограничувањата на испорака на оружје за Израел. Но, највисокиот американски дипломат одби да го потврди ова.
Продолжувајќи да ја истакнува содржината на неговиот разговор со Блинкен, Нетанјаху додаде дека го нарекол незамисливо одбивањето на испораките на оружје и муниција за Израел во последните месеци.
Портпаролот за национална безбедност на Белата куќа Џон Кирби се осврна на овие коментари на брифинг со новинарите, велејќи дека САД го изразиле своето незадоволство од Израел.
„Мислам дека многу јасно и недвосмислено им го пренесовме на нашите израелски колеги нашето длабоко разочарување од изјавите дадени во тоа видео, како и нашата загриженост за точноста на изјавите“, рече Кирби.
„Наводите дека сме престанале да му помагаме на Израел во однос на нивните одбранбени потреби се целосно лажни“, рече тој.
Свет
САД: Изјавите на Путин за испраќање оружје во Северна Кореја се многу загрижувачки
Изјавите на рускиот претседател Владимир Путин дека Москва би можела да и испорача оружје на Северна Кореја по потпишувањето на одбранбениот пакт со Пјонгјанг се многу загрижувачки, изјави Метју Милер, портпарол на американскиот Стејт департмент.
По посетата на Северна Кореја оваа недела, рускиот претседател посочи дека снабдувањето на земјата со оружје ќе биде одговор на западните земји да ја вооружат Украина.
Тој исто така предупреди дека Јужна Кореја, инаку американски сојузник, ќе направи голема грешка доколку одлучи да испрати оружје во Украина. Во тој случај, реакцијата на Москва би била „многу болна“ за Сеул, додаде Путин.
„Таквите зборови се многу загрижувачки“, рече Милер на брифинг со новинарите на прашањето за изјавите на Путин за можна испорака на оружје за Северна Кореја.
„Ова, се разбира, ќе го дестабилизира Корејскиот полуостров и, во зависност од видот на оружјето, ќе ги прекрши и резолуциите на Советот за безбедност на ОН, кои беа поддржани и од Русија“, рече тој.
Пактот потпишан во средата од Владимир Путин и севернокорејскиот лидер Ким Џонг-ун ги обврзува двете страни да обезбедат итна воена помош во случај на вооружена агресија врз една од нив.
Портпаролот на Белата куќа за национална безбедност Џон Кирби рече дека споменатиот пакт, иако загрижувачки, не е изненадување. Тој ја смета потребата на Русија за такво партнерство како показател за очај.
„Ние веќе неколку месеци зборуваме за ова и предупредуваме за зголемената одбранбена соработка меѓу двете земји, преку низа разузнавачки податоци што ги објавивме“, рече тој.